Read Loma TE ƔƐƐ VAITIƐ 8 Bible Online

TE ƔƐƐ VAITIƐ 8 - Loma bible

TE ƔƐƐ VAITIƐ 8

¹Na ɣa ɣɛɛ na Sɔɔ yii‐ma ɣɛni ga paa ʋai. Na maʋoloi ɣa Gala pɛlɛi‐ƃɔɔla fai wu ziɣini la ga kpakpaa Yɛlusulɛɛ. Na ɣa ɣɛɛ na é wulo Ziizɛ na keelaitiɛ wulu, Gala pɛlɛi wu vea ɣaazɔ te yɛzɛni Yudiiya ligi zu wɔlɔ‐kɔlɔ ma ɣaali ta Sameelia.

²Zinaitiɛ te zɔƃɛlɛ ɣɛni Gala fai zu te Setiifɛ̃ loowuni te maƃee loo ga kavele teegɔ.

³Kɛ̀ Sɔɔ ɣɛni Gala pɛlɛi ŋala‐ŋalasu. Ɔ́ lɔ pɛlɛ ɣile‐giledai wu yíɛ zinaa mai ta ŋazaa yíɛ te wu kpidi vɛlɛ wu.

⁴Tɔwɔ niitiɛ te yɛzɛgɛi ɣɛ te vileni ga Gala goi woga.

⁵Fele liini Sameelia lai ta zu é Kolai maʋai wo na tiɛ ga woo maa zeezea.

⁶Kpɔ gwalai woi ɣɛni su ɣile te wui lo nii ma Fele boni, tei te goi mɛnini te wɛlɛ wɔnɔ faitiɛ va é te ɣɛɛni é dɛ ga seele.

⁷Ƃɔvɛlaale gɔʋɛ yowũa te ziɣini nu lamaa wulu niitiɛ te ɣɛ te wulu, gɔʋɛ yowũitiɛ ƃɔɔ tiɛ loba ga ʋike. Na ɣa ɣɛɛ na niitiɛ te mɛlɛ‐ŋɛlɛgɛi ɣɛ ɔɔ te wɔwɔ zai tiɛ te lamaa te valoni.

⁸Na ma kuu‐zu‐nɛɛ ƃakpa ɣɛni tai na zu.

⁹Kɛ̀ zunu ɣila ge ɣɛni na daa ga Saimɔ é ɣaʋuni dɛ pa yíɛ pote kɛ tai zu. Maʋai é Sameelia yui ɣaazu laa ʋeni yíɛ bo tɔ ƃɔɔ ga é ɣɛni ga nu ɣaa‐wua ta.

¹⁰Te pɛ te wui toni goo ma é ziɣi ƃɔɔ to‐su‐vala‐bɛ vea ma é loo to‐su‐ba vea ma tiɛ ɣɛ tea, “Zunui nii ɣa é ga gaa‐ƃai na é Gala zéea daa ga gaa‐ƃaa walai.”

¹¹Te wui toni goo ma, ƃɔvɛlaale é te ɣaazu laa ʋeni ga potegi ga su woozaa.

¹²Kɛ̀ tei te Fele nii woi ziɣini ga gaama é woo vagɔi woni é vile Gala na masadai va ta Ziizɛ Kolai na daa‐zeigi, te bataize ɣɛɛni ga tiɛ, na ɣa ga zinaa vɛɛ ŋazaa va.

¹³Saimɔ tɔ ɣagi siɣini ga gaama. Tei sa ná bataize‐ɣɛɛ ʋai wuloni ba, é wũ kpadoni ɣɛɛ ʋai va Fele va. Faitiɛ é te vɛtɛni tiɛ ɣɛ ga seelea é vɛɛ pote kpaazagitiɛ va te ɣɛɛni, te gaazu laa ʋeni.

¹⁴Tei Ziizɛ na keelaitiɛ te ɣɛ Yɛlusulɛɛ te mɛnini ga Sameelia yui yee zeini Gala goi wu, te Pite leveni ta Jɔ̃ te wɔ vɛ.

¹⁵Niitiɛ te vaani te Gala feli te ʋaa ma ga te Gala baa ŋinɛgi yee maa zɔlɔ wo.

¹⁶Ƃɔvɛlaale ɛ́ lɛ ŋɛni dɛ vaani te ta nɛpɛ pɔ. Kɛ̀ te bataize ɣɛɛni dɛ nɔ ga tiɛ de maliɣii Ziizɛ na daa‐zeigi zu.

¹⁷Pite ƃɔga Jɔ̃ te yee vɛɛ sa te wũmɔ te Gala baa ŋinɛgi yee maa zɔlɔ wo.

¹⁸Tei Saimɔ wɛlɛni na va ga Gala baa ŋinɛgi yee maa ɔ́ zɔlɔ wo Ziizɛ na keelaitiɛ ta yee‐vɛɛ‐nu‐wũmɔi zaala zu, é wuloni ga naʋolo

¹⁹é ɣɛ te ma, “Nà ƃalaa a gaa‐ƃai nii ʋe zèea, kɛɛ ʋaa ma nui nɛpɛgi gà yee vɛɛ wũmɔ é Gala baa ŋinɛgi yee maa zɔlɔ wo.”

²⁰Kɛ̀ Pite ɣɛni ma, “È vɛɛ yà ɣanigi va wo zu ɣa ŋala‐ŋala, ƃɔvɛlaale kɛɛvɛ è ɣigi zu ga yà zoo è Gala na faa‐nɛi nii maa zɔlɔ wo ga naʋolo!

²¹È wɔɔ laa lɛ fai nii va. Yà dɔ lɛ su. Ƃɔvɛlaale yà ɣi‐gaa‐ziɛi lɛ ga gaama Gala gaazu.

²²Wulu ɣaa ʋe è luo vele yowũ‐yowũgi nii va è de maliɣii ʋeli, kɛɛ ʋaa ma ani yá zolowo na é è wuu zu ʋai nii zu ʋaa yɛ yìɛ.

²³Ƃɔvɛlaale è maʋai gè pɛtɛga kulovɛ è ɣɛ nu ɣa ŋɛni mawãla wɔ̃ɔ, è ɣiliai wɔnɔ faa yowũ va.”

²⁴Saimɔ gaa wote é ɣɛ tea, “A de maliɣii ʋeli màʋaa ma, kɛɛ ʋaa ma nii nɛpɛgi wo boga é ʋoolo bà.”

²⁵Tei sa te seele woo ʋeeni te de maliɣii woi wo, te galeni ma tiɛ li wulu Yɛlusulɛɛ tiɛ woo vagɔi wo Sameeliaitiɛ ta lai lamaa zu.

²⁶Kɛ̀ Gala ta ɣeelai nii kuloai de maliɣii wɔ vɛ é ɣɛni Fele ma, “Wu ziɣi è li ga nu wɔwɔ yee‐su vele foloi ʋaa va pelei nii zu é ziɣizu Yɛlusulɛɛ é li Geeza.” Nii ɣa ga zuu ʋɔɔ maa vele.

²⁷Bu‐ziɣi vele ɣa na é li. Nù wɔgi te kɛɛzu, Iitiopia zunu ɣila ge ɣɛni na ga Iitiopia ŋaza nu masa gwalai na daa ga Kãdee na tii‐ɣɛɛ nu walai. Towaa é ɣɛni ga ná sei‐kobai nii kwéligi ɣaazɔ ʋaa laa lɔgɛi ɣɛ ba. Zunui nii vaani ga é Gala feli Yɛlusulɛɛ.

²⁸É ɣɛni sa liizu wulu. É ɣɛni zeini kai nii zu ta daa lɔ soo va yíɛ lii la yíɛ Gala daa woo‐wo nui Aizeea na kɔlɔi lodo.

²⁹Gala baa ŋinɛgi ɣɛ Fele ma, “Li è vile kai nii ma.”

³⁰Fele ƃize vele ɣa na é ɣɛ é li zunui wɔ vɛ. É nà woo mɛni yíɛ Gala daa woo‐wo nui Aizeea na kɔlɔi lodo. É gaa‐zaɣa kɛɛni é ɣɛ ma, “?Yà nii ɣaa ɣaazu è dodosu?”

³¹Nà ɣɛ ma, “Gà leve ɣɛ le gè na ɣɛ, kɛni nu ta ɣa dɛ gàazu?” É Fele lili sa ga nà vili su é zei koba.

³²Tɔwɔ nii wɔgi é ɣɛni dodosu Gala kɔlɔi ʋaa va, towaa— “Te liini la ga te paa è ɣɛ baala. È ɣɛ velei nɔ baala zuwu maazu ɣa ɣɛɛ la ƃu maa‐leɣa‐leve nu laa wu, vele nɔ na dáa ɣa wulu da.

³³Pɛnɛ velei zu te vɛ te ná goo gaama ʋai zakpeni zéea. Ƃɛ ɣa yá zoo é mazuwui maʋaa zu wulo? Ƃɔvɛlaale zɛʋui wulovɛ sa zéea.”

³⁴Tii‐ɣɛɛ nu walai ɣɛ Fele ma, “È veevɛ bo mà. ?Gala daa woo‐wo nui ɣa fai nii wosu é vile ƃɔɔ va ƃaa tɔ bosu é vile nu ƃɔnɔ ba?”

³⁵Fele ƃɔɛ lɔɔ zei sa ga woo vagɔi woga é vile Ziizɛ va. É tɔɔ zeini Gala kɔlɔi zu woi nii va.

³⁶Tei te ɣɛni pelei ma tiɛ li, te ziitini ziɛ ta ma. Tii‐ɣɛɛ nu walai ɣɛ tea, “Wɛlɛ, ziɛ ɣa! Zɛƃɛi sa yá bataize‐ɣɛɛ ʋai ziɣi ma gàazu?” [

³⁷Fele ɣɛ má, “Ani síɣivɛ yìɛ ga gaama ga yii ɣaazɔ, towaa ɣɛ ga yìɛ.” É gáa woteni é ɣɛ tea, “Síɣivɛ bɛ̀ ga gaama ga Ziizɛ Kolai ɣa ga Gala dui.”]

³⁸É boni ga te kai lo. Te felegɔ te vile sa ziɛi wu, na ɣa ga Fele ƃɔga tii‐ɣɛɛ nu walai. Fele zɛba do é bataize ɣɛɛ la.

³⁹Tei sa te wuloni ziɛi wu te lɛ, de maliɣii vaa ŋinɛgi Fele ziɣini é lii la. Tii‐ɣɛɛ nu walai lɛ sa wɔnɔ pɛtɛni. É li sa ga lii‐zu vele yíɛ wuu zu nɛɛ.

⁴⁰Kɛ̀ te Fele vɛtɛni Azoota lai zu. É ɣɛni levesu yíɛ woo vagɔi wo tai ɣaazɔ zu é yesu é va Sɛsɔluiya lai zu.