Read Loma LOOMƐITIƐ 1 Bible Online

LOOMƐITIƐ 1 - Loma bible

LOOMƐITIƐ 1

¹I Nài gè ga Pɔɔ, gà ga Ziizɛ Kolai na tii‐ɣɛɛ nu, tìligɛi ga gè ɣɛ ga ná keelai ta. Kùlovɛ su ga tee ga gè Gala na goo niinɛ vagɔi wo.

²Na ɣa ga nii Gala ge zɛni powũ é kɛ dáa woo‐wo beaitiɛ te maʋai wo ná kɔlɔi zu.

³Tɔ ga woo niinɛ vagɔi pilegɛi dúi nii va é ga Deeve manu zuwui ta nu ƃuse ŋeteai mavele ma.

⁴Tɔwɔ yá lii na ga Gala baa ŋinɛ maa wuai maʋai wɔ vele, maʋaa ɣaa wodovɛ ga tɔ ga Gala duu gaa‐ƃaa zéea. Nii ɣɛɛni ga velei é wu ziɣini la saa ya. Tɔ ga de maliɣii Ziizɛ Kolai,

⁵nii gé gaazu‐maa‐wõi‐ɣaa ƃɔ‐ba maa zɔlɔ woga sáala zu. Sáala zu ɣa wɔnɔ gé levegɛi la ga keela, kɛɛ ʋaa ma zii pɛ ge goo‐mɛni kulo zee‐la‐ma ɣɛ wɔnɔ te ya ná daa‐zeigi mazaƃu ma.

⁶Wa ƃalaa pɛ wo vɛɛvɛ te va, wai wo liligɛi ga wo ɣɛ ga Ziizɛ Kolai na dɔ.

⁷Wai nɛpɛ wo ga Gala wõila vea Loomɛ lai Zu wo ga numaitiɛ te wuloai su leelaa ga te ɣe ga Gala na dɔa, wa ɣa gè kɔlɔi nii wonɛzu wo wɔ. Gaazu‐maa‐wõi‐yaa ƃɔ‐bai ƃɔga zii‐lai kuloai de yeea Gala zeea ta de maliɣii Ziizɛ Kolai ta ɣɛ wo ʋaa ma fãa.

⁸Mamaa wũgi pa gà mama feezu nà Galagi vɛ wo pɛ wo ʋaa ma Ziizɛ Kolai zaala zu, ƃɔvɛlaale wa yee‐la‐mai maʋaa wogɛ ga seeze zuu ɣaazɔ zu.

⁹Galagi nii gè tii ɣɛɛzu bɛ́ ga nà ki‐gaa‐ziɛi dúi na woo niinɛ vagɔi‐wo pele ma bɛ̀, tɔ ga nà seele nii vaa ma. Na ɣa ga siɛ nɛpɛ gà ɣɛ na Gala felizu gè dɛ wɔlɔ‐wɔlɔ ƃeni felizu wo ʋaa ma.

¹⁰Gà ɣɛ Gala maa nɛɛnɛsu ga ani yá ʋaa na bu é zolowo zèea pele ta zu ga gè va wo wɔ vɛ.

¹¹Toku ge zei ga gà ná maa‐wõi‐wõi kulozu ga gè wɛlɛ wo va, kɛɛ ʋaa ma gè Gala baa ŋinɛgi na faa nɛi ta ʋe ga wo zaba é wo zu ƃaa.

¹²Na ɣa ga diɛ ɣiini zii lɔ ga da yee‐la‐mai. Wa ɣɛ zii lɔɔzu gìɛ wo yii lɔ.

¹³Nà numaa, gè wõini wo kwɛ̃ ga tɔ kigi zu wɔ ga gè va wo wɔ vɛ, kɛɛ ʋaa ma gè tii ɣɛ gè su lɔnɔ zɔlɔ wo wo zaama è ɣɛ velei è ɣɛɛzu la ga zii ƃalaagi zɔitiɛ ɣaazɔ. Kɛ̀ é yɛga su dɛ é ziitia vɛ yɔɔzu ma, pàa ʋai zu ɣa nɔ ƃala‐ƃalasu.

¹⁴É ɣɛni ga Geliikia ƃaa é ƃe ɣɛɛzu ga Geliikia, é ɣɛ wɔnɔ ga kele‐ɣele bea ƃaa titi bea, te pɛ te maʋai ɣa mà ga kui.

¹⁵Na ma kàvele ƃɛtɛvɛ ƃɔɔ nɔ sa ga gè woo niinɛ vagɔi wo wo ma ƃalaa pɛ wai wo Loomɛ lai zu.

¹⁶Su‐wulo‐zu ɣa ga gɛ̀ lɛ wũfesu woo niinɛ vagɔi‐wo faa zu. Tɔ ɣa é ga Gala na gaa‐ƃai balolai ʋaa ma nui nɛpɛ faa ma zee‐la‐ma ɣa ɣɛ zéea. Mamaa wũgi pa towaa ɣɛ Dusiitiɛ ʋaa ma é ɣɛ wɔnɔ Geliikiitiɛ ʋaa ma.

¹⁷Ƃɔvɛlaale woo vagɔi zu ɣa Gala na tele‐bo tuoi wuloa la kɛnɛ ma zee‐la‐ma zaala zu é wɔnɔ zee‐la‐ma ʋaa ma. È ɣɛ velei ponɛi la mawoi ga “Nui nɛpɛ é ga tele‐bo tuo‐wo nu zee‐la‐mai zaala zu manui yɛvui ɣa yɛ zéea.”

¹⁸Gala na zii‐ɣaa‐wãlai wulovɛ gee wɔlɔgi zu maʋaa ɣaa wodo ga tɔ numai niitiɛ ɣaazɔ ʋaa ma tɛ lɛ Gala tuo wosu, gaamai zogɛi te vɛ te kpa kpe ta luo vele yowũi mavele ma.

¹⁹Nii nɛpɛ nu ɣa zoo é kwɛ̃ɛ é vile Gala ba maʋaa ɣaa wodovɛ ga tiɛ, ƃɔvɛlaale Gala ge dɛɛ ga tiɛ.

²⁰Kai ti! É ziɣi ƃɔɔ zui‐ƃɛtɛ ʋolo ma Gala bɛ fai niitiɛ nu lɛ ɣaazu laa te ma Gala maʋaa va, natiɛ ta ga ná gaa‐ƃai maʋaa wɛ̃ɛ gɛ lɛ ba ta kɛ́ɛ ʋai ga Gala, te maʋaa ɣaa ɣaavɛ sa ga gaa wodoa ŋɛnii niitiɛ é te ƃɛtɛɛ te zaala zu. Na ma te woo‐zu‐wulo vele ta nɛpɛ gɛ lɛ ma.

²¹Velei ƃalaa te ɣɛ ga Gala kwɛ̃ɛga la, tɛ lɛ wũfeni ma ga velei nu ɣa wũfɛ da Gala ma ɔ́ nɔ ɣɛ ga te mama fe bɛ́. Kɛ̀ te ɣɛni ga ki‐gaa‐ziɛ yãka‐wo bea, na ya ɣɛɛ na ta yaa‐vala‐ba ɣi‐gaa‐ziɛi maʋaa ɣaa ƃidi sa.

²²Te ɣɛni bosu ga te ɣele‐ɣelegɛ, tɔwɔ te li te ɣe ga titi bea.

²³Na ɣa ɣɛɛ na Galagi nii ɛ́ lɛ zaa te ná saala‐malai maa ʋeli ga po‐kɔ̃ɔgi niitiɛ te wuloai ga nu ƃuse ɔɔ wɛ̃nia ɔɔ kpeɣa zua ƃɔga kpokpo sua. Natiɛ wɔ te ga saa ŋɛnia.

²⁴Na ma Gala ge laa wuloni te maʋaa zu te vile ŋɛni yii‐leve‐kuu‐zu yekegi wulu te yɛ sa maa‐wuo lala logi zu. Na ɣa ɣɛɛ na tiɛ ƃaa wulo ƃɔɔ lɔtɔi ma.

²⁵Ƃɔvɛlaale gaamai pilegɛi Gala ba te na maa ʋeliga ga zɛɛ ʋaa. Ŋɛniitiɛ mugi te ƃɛtɛɛ natiɛ ɣa te te ʋelini te mɔɔlɛ te vɛ, nui mugi é ŋɛni pɛ kpɛtɛɛ tɛ lɛ kɛɛni nà vɛ. Na ɣa ga nui pagɛi daa‐maa‐lɛi yiɛ wo da wɔlɔ‐wɔlɔ ta wɔlɔ‐wɔlɔ! Tɔwɔ na nɔ ɣa yá ɣɛ.

²⁶Nii mazaƃu ma Gala ge laa wuloa te maʋaa zu tiɛ kuu‐zu‐yii wulo ga ƃaa‐wulo‐ma vele. Tuoi nii te maŋazaitiɛ te wuloa la Gala ta, te na maa ʋeliga ga tuoi nii tɛ lɛ wuloni la Gala ta

²⁷Vele nɔ na é la ga te mazi‐naitiɛ. Te ƃega te ŋazaitiɛ va te ɣiini kɛ ga te ŋazaa. Na ɣa ɣɛɛ na te ƃɔɔ maa ƃoale ga sɣiini mawõi. Zinaitiɛ ta wũfe tala luo wo ga ɣiini. Na ɣa ɣɛɛ na tɔgi pagɛi é ƃɛ te ma pele‐ma lala luoi ʋaa ma ta ƃɔɔ tiɛ ɣɛ ga zaƃu nà yìɛ ziiti te ma.

²⁸Tei tɔwɔ Gala kwɛ̃ɛ fai te vɛ ɛ́ lɛ te ɣaazu ga faa maa nɛɛ, Gala ge laa wuloa te maʋaa zu ki‐gaa‐ziɛ yowũ ɣɛ te ma tiɛ ƃaa‐wulo‐ma luo wo.

²⁹Te yii laa ʋegɛ ga tuo vele yowũ mazii ɣaazɔ ta faa yowũ, kuu‐zu‐yii é vɛɛ wãla‐lɔɔ luo va. Te yii laa ʋegɛi wɔnɔ ga nu weli mayili‐lɛɛ ʋai ma ta nu vaa ɣi‐gaa‐ziɛ, kpɔɛ‐wõi, gaa‐wɔlɔ‐boga, kuu‐zu‐ƃɔlɔ é vɛɛ daa‐wo‐boga va.

³⁰Ta ga nu laa‐ŋala‐ŋala bea te ziliai ga Gala. Te ɣaazu maa nɛɛvɛ te ɣaazu lɛi te ga yoka‐teve vea te ga faa yowũ maala‐leve vea tiɛ goo‐mɛni tala wulo te ɣaa veaitiɛ ya.

³¹Te litigɛ te ga nui nu lɛ laa la. Te ɣaazu ʋɔɔvɛ nu maa‐wõi lɛ te ma.

³²Velei ƃalaa kwɛ̃ɛgɛi la te vɛ ga Gala na deʋei é daa de ya tɔ ga taitiɛ ta na ɣavele ʋaitiɛ ɣe kulovɛ bu te vɛ ga te za, tɛ lɛ nɔ kɛɛzu ɔ́ wẽɛ na va. Kɛ̀ niitiɛ te kɛɛzu ta te yii wɔɔlɔzu ga tiɛ kɛ.