Read Loma LOOMƐITIƐ 10 Bible Online

LOOMƐITIƐ 10 - Loma bible

LOOMƐITIƐ 10

¹Nà numaa, nii ƃɔɔ mawõi levegɛi zìi zu é ga nà Gala‐feliai Yezɔi veaitiɛ ʋaa ma tɔ ga te valo.

²Gà seele woo ʋeezu te ʋaa ma ga te wɔɔlɔvɛ Gala fai zu, kɛ̀ maʋai ɣaa lɛ wodoni te ya.

³Toku ge zei ga Gala na tele‐bo tuoi maʋai tɛ lɛ gaa ɣaani te vɛɛ ga pele ɣaa zia ga te ƃɔɔ ɣele maala leve, towa é kɛɛ tɛ lɛ ʋaani bu ga te tele‐bo tuoi nii wo Gala ge daa te ya.

⁴Su‐wulo‐zu ɣa ga Kolai ɣa é ga tɔgi maʋaa mawɛ̃ɛ pele ma. Nii ɣɛɛvɛ ga nui nɛpɛ zee‐la‐ma ɣa ɣɛ zéea kɛɛ‐zɔ yowũi mɛ lɛ ɣɛ ba ga faa.

⁵Mooze ponɛni ga nui nɛpɛ yá tele‐bo tuoi nii wo maʋai ziɣiai Gala na tɔgi la manui ɣa zɛʋu zɔlɔ wo tɔgi maazu‐vɛtɛ pele ma bɛ́.

⁶Kɛ̀ tele‐bo tuoi nii maʋai ziɣiai zee‐la‐ma la su‐wulo‐zu ɣa ga “È mɛ lɛ bo ɣigi zu ɔ̀ ɣɛ tea, ‘Ƃɛ ɣa a lɛ gee wɔlɔgi zu?’ Na zu‐wulo‐zu ɣa ga é lɛ é vile ga Kolai.

⁷Ɔɔ è mɛ lɛ bo ɣigi zu ɔ̀ ɣɛ tea, ‘Ƃɛ ɣa yá yii zeɣei nii zu kpo‐ma lɛ ba?’ Na zu‐wulo‐zu ɣa ga é Kolai wulo saa vea ɣɛɛ‐zuvɛ é vaa la.”

⁸Kɛ́ zɛƃɛ ɣa tele‐bo tuoi dɛɛzu? Tɔ dɛɛzu ga yiɛ ga woi ɣa è woba, é è la é è yii zu. Na ɣa ga zee‐la‐ma woi nii gé bosu wiɛ Gala goi zu.

⁹Ƃɔvɛ‐laale ani yà kulo na la è bo ga woo ga Ziizɛ ɣa é ga de maliɣii, na ɣa ɣɛɛ na è siɣi ga gaama è ɣigi zu ga Gala ge bu ziɣini saa ya, yà valo.

¹⁰Toku ge zei ga nu ɣa Kolai maʋaa ziɣi ga gaama ɣigi zu, na ɣɛ ga zaƃu manui ɣɛɛ‐zɔ yowũi lɛ ɣɛɛ ba ga faa. É maʋai wulo la é bo ga woo, na ɣɛ ga zaƃu é valo.

¹¹Gala kɔlɔi ɣa bosu yíɛ ɣɛ tea, “Nu ta nɛpɛ gɛ lɛ maʋaa ziɣia ga gaama manui ɔ́ wũfe.”

¹²Toku ge zei ga Dusi nu lɛ ga tee Geliiki nu ɔ́ ɣɛ ga tee. De maliɣi gilagi nɔ ɣa é ga zɛ‐sɛ pɛ maliɣi yíɛ weli tama‐tamagi ɣɛ ga faa‐nɛɛ niitiɛ ɣaazɔ vɛ te ná daa‐zeigi lilisu.

¹³Ƃɔvɛlaale “Nui nɛpɛ é de maliɣii na daa‐zeigi lilisu towaa valo.”

¹⁴Kɛ̀ numaa ta leve ɣɛ le te nu na daa‐zei tili nii tɛ dɛ maʋaa ziɣini ga gaama? Ta leve ɣɛ le te nui nii maʋaa ziɣi ga gaama tɛ lɛ dɛ wɔlɔ‐wɔlɔ faa mɛnini ɔ́ vile ba? Tɔwɔ ta leve ɣɛ le te faa mɛni é vile ba ani Gala goo‐wo nu lɛ na?

¹⁵Numaa wɔ ta Gala goi wo ɣɛ le ani tɛ lɛ te leveni na ma? È ɣɛ velei ponɛi la Gala kɔlɔi zu mawoi ga “Taitiɛ te vaazu tiɛ woo niinɛ vagɔi wo te wɔwɔitiɛ maʋaa wala maa nɛɛvɛ siɛi nii zu!”

¹⁶Kɛ̀ nui pɛ gɛ lɛ dɛ wui toni woo vagɔi ma. Ƃɔvɛlaale Aizeea ɣa bosu Gala kɔlɔi zu yiɛ ɣɛ tea, “Gé maliɣii, ƃɛ ɣa é nii ziɣia ga gaama é mɛniga gé la?”

¹⁷Na ma zee‐la‐ma ɣa wulo fai nii zu nu mɛniga. Nii wɔgi nu mɛniga maʋai ɣa wulo Kolai mawoi‐wogai zu.

¹⁸Kɛ̀ gà gaa‐zaɣa‐kɛɛ wosu gìɛ ɣɛ tea, tɛ lɛ dɛ mɛnini ʋaa ve? Ƃɔɔƃɔɔ su te mɛniga. Ƃɔvɛlaale ponɛvɛ Gala kɔlɔi zu mawoi ga “Te woi zia zuu ɣaazɔ zu te woi ziiti zui wɛ̃ɛ ma.”

¹⁹Gà gaa‐zaɣa‐kɛɛ wosu wɔnɔ ga Yezɔitiɛ tɛ lɛ gaa ɣaani ʋaa ve? Mamaa wũgi pa ka ga Gala daa woi wonɛvɛ Mooze na kɔlɔi zu Gala giɛ ɣɛ tea, “Niitiɛ tɛ lɛ ga zii, gà tolo vili wo wuu zu te maʋaa ma, na ɣa ɣɛɛ na zii niitiɛ te litigɛi gè wom yii yowũ te maʋaa ma.”

²⁰Aizeea ɣa mu ga duo lala nu ga velei é bosu la Gala kɔlɔi zu yíɛ bo ga Gala ka ɣɛɛzu tea, “Pɛ̀tɛgɛ niitiɛ vɛ tɛ lɛ gàa ziɛni. Gè ƃɔɔ lɛɛ ga niitiɛ tɛ lɛ màɣaa‐zaɣa‐kɛɛ woni.”

²¹É ƃɔɛni é vile Yezɔitiɛ va yiɛ ɣɛ tea, “Gè lua yee zu zakpazu ga gè numai niitiɛ vɛɛ yii la te ga goo‐mɛni tala vea te ga numai niitiɛ te logɛi dà.”