Read Loma LOOMƐITIƐ 11 Bible Online

LOOMƐITIƐ 11 - Loma bible

LOOMƐITIƐ 11

¹Na ma gà gaa‐zaɣa‐kɛɛ wosu gìɛ ɣɛ tea, Gala ge ɣɛlɛɛ ná numaitiɛ va ʋaa ve? Ɛ́ lɛ wɔlɔ‐wɔlɔ ŋɛ na! Nà kagi gà ga Yezɔi nui ta. Gà ga Eeƃɔlɔhɛ̃ɛ manu zuwu, gè ga Bɛ̃jemɛ̃ɛ mazii ta.

²Gala gɛ lɛ ɣɛlɛni ná numai niitiɛ va é te maʋaa yɛga ná luo é te wɛ̃ɛ? Nii Gala kɔlɔi bosu é vile Yiilaija va, wɛ lɛ kwɛ̃ni ʋaa ve? Na ɣa ga velei é Yezɔitiɛ ɣɛɛ‐zɔgi laazu la Gala bɛ yɛ ɣɛ tea,

³“Màliɣii, te è laa woo‐wo beaitiɛ vaa. Te è mayeke‐kɛɛ vanagi zu ŋala‐ŋala. Nà ɣilekpu nɔ sa zɛ̀gɛi na wulu tiɛ pele ɣaa ziɛ ga te zɛ̀ʋui wulo zèea.”

⁴Zɛƃɛ ɣa sa Gala ge Yiilaija woi ɣaa woteni la? É ɣɛni ma, “Gè wulu dɔfela zei‐zu ɣɛɛ ƃɔɔ ʋaa ma, niitiɛ tɛ lɛ vɛɛni maa‐niini galagi Beeya wɔwɔ wu.”

⁵Vele nɔ na é la ga siɛgi nii zu. Nu ɣile‐gilega ta na Gala zee ƃakogɛi te va ná maa‐wõi‐ɣaa ƃɔ‐bai mavele ma.

⁶Tɔwɔ ani kɛɛvɛ bɛ́ maa‐wõi‐ɣaa ƃɔ‐bai mavele ma, maʋai lɛ sa ziɣia tii‐ɣɛɛ ʋaa la nu vɛ. Nà ɔ́ ɣɛɛ na maa‐wõi‐ɣaa ƃɔ‐bai lɛ ƃega wɔlɔ‐wɔlɔ ɣɛ sa ga kpɔ‐ba ƃɔɔƃɔɔ.

⁷Zɛƃɛ ve sa? Nii Yezɔitiɛ te ɣɛni gaa ziɛzu tɛ lɛ maa zɔlɔ woni. Taitiɛ Gala ge yee ƃakoga te va ta ɣa te sɔlɔ woni. Kɛ̀ mataitiɛ wui zu ƃɔlɔgɛi ɣɛ.

⁸È ɣɛ velei ponɛi la Gala kɔlɔi zu mawoi ga “Gala ge te ɣɛɛni ga faa ɣaa‐ɣaa lala vea, te ɣaazuvɛ lɛ ƃega ŋada maa ƃɛ te wui lɛ ƃega faa mɛni, é yɛga su é ziitia zai ŋɛ ni ma.”

⁹Deeve boni wɔnɔ yíɛ ɣɛ tea, “Ƃe ba ta laa‐mii ŋɛni ɣɛ te luo ga sɛlɛ ta bɛli, nii a ɣɛ ga zeɣe vɛli te ʋaa ma é ga te ɣɛɛ‐zɔgi zu‐loa.

¹⁰Ƃe ba te ɣaazu ƃidi kɛɛ ʋaa ma te mɛ lɛ zoo tɔ wɛlɛ, na ɣa ɣɛɛ na te yɛ maa vɛɛzu wɔ ta ɣasɔi wu.”

¹¹Na ma gà gaa‐zaɣa‐kɛɛ wosu ga Yezɔitiɛ ɣali ka te boga ʋaa ve ga te loo? Ɛ́ lɛ wɔlɔ‐wɔlɔ ŋɛ na! Kɛ̀ ta ʋaa yowũi mazaƃu ɣa balolai ziitia la zii ƃalaagitiɛ ma, kɛɛ ʋaa ma tolo vili te yii zu zii ƃalaagitiɛ ʋaa ma.

¹²Tɔwɔ ta ʋaa yowũ‐ɣɛɛ ʋai mu ka kɛɛ na kpɛtɛla ziiti zɛ‐sɛ pɛ ma, te ʋɛŋɛɛ te boni nà ɣa kpɛtɛla ziiti zii ƃalaagitiɛ ma, kaali ma teɣa tɔ na nii ɣɛɛzu te pɛ te vɛɛ de va.

¹³Gà sa ƃɔɛzu wo wɔ wai wo ga zii ƃalaagitiɛ. Tei tɔwɔ tèvegɛi ga Ziizɛ na keela zii ƃalaagitiɛ ʋaa ma, gà nà tii maʋaa maa viizu,

¹⁴kɛɛ ʋaa ma tolo vili baa Lusiitiɛ yii zu, te taniga te valo na mavele ma.

¹⁵Toku ge zei ga ani Gala kɛlɛ ʋai te va su‐wulo‐zu ɣa ɣɛ na ga Gala kpɔga zɛ‐sɛ pɛ te yɔɔzu‐ƃɛtɛ ʋaa, zɛƃɛ ƃɔnɔ ka su‐wulo‐zu ɣa ɣɛ ga Gala zee‐zei ʋai te wu? Na zu‐wulo‐zu nɔ ga zɛʋu ɣɛ saa vea ya.

¹⁶Ani kpoolo‐ʋɔɔ ɣati maa wũgi maa wuovɛ, vele nɔ na kpoolo‐ʋɔi pɛ puai kii ma te maƃuumɛi maa ɣa wuo la. Ani kɔnɔ gulu ŋasai maa wuovɛ, vele nɔ na gulu mavekegitiɛ ta ɣɛɛ la.

¹⁷Kɛ̀ ani ale wului mavekegi taniga ta ɣale na ba, yài wɔgi è ga ale wului nii mu lɛ seini, te è maƃuʋugi zei te wo ga, yìɛ sa yà dɔ yii‐ma‐ɣɛɛ wo ale wului mayiɛi zu yà sɔlɔ wo maŋasai zu,

¹⁸mɛ lɛ yoka teve ga gulu vekegitiɛ. Ani yà ɣɛ na yoka tevezu, ɣi zɛ su ga yà lei ɔ̀ ɣɛ yee kasu ŋasai va, ŋasai mu ka é yee kasu è va.

¹⁹Yà ɣɛ tea, “Gulu vekegitiɛ te ɣaleni ba kɛɛ ʋaa ma te sèi te wo ga.”

²⁰Na ɣa ga gaama. Te ɣaleni ba ta yee‐la‐ma lalai zaƃu ma. Kɛ̀ yà yee‐la‐mai zaala zu nɔ ɣa è logɛi la kpãa. Na ma mɛ lɛ wɔɔlɔ ƃɔɔ ɣaazu. Kɛ̀ ɣɛ ga duo‐faa‐va nu.

²¹Toku ge zei ga gulu vekegi niitiɛ mugi te yɛga gului va é wulo ga tiɛ ŋetea, natiɛ mu ka Gala gɛ lɛ zɛni te ma ga kui, kaali ma teɣa yà?

²²Ɣi gaa ziɛ lɛɛ Gala na tuola nɛi ma ta velei yá nu zo da ga kpaanaga. Niitiɛ te ziɣia pulu towaa te zo ga kpaanaga, yà wɔ tuola nɛɛ ga yìɛ ani nɔ yà ɣata na ná tuola nɛɛ luoi yee wu. Ani ɛ̀ lɛ ɣɛ ɣatani bu, yà ƃalaa towaa è leve gului va.

²³Tɔwɔ zɔitiɛ ƃalaa ani tɛ lɛ ɣɛni ɣatani ta yee‐la‐ma lala luoi va, ta te zei gului va ga te wɔ̃nɔ. Ƃɔvɛlaale gaa‐ƃaa ɣa Gala zeea ga é te zei wɔnɔ te wɔ̃nɔ.

²⁴Toku ge zei ga ani te è levea ale wului nii va nu lɛ seini te è zei ale wului nii va seiyai nu ƃuse vɛ è ƃɛtɛ ba, yà wɔ ɛ̀ lɛ yɛni ba ɔ́ wulo ga yìɛ ŋetea, mavekegi niitiɛ mugi te yɛga ba é wulo ga tiɛ ŋetea, ta ɣa ta te zei ba tɛ lɛ ƃɛtɛɛ?

²⁵Nà numaa, gè wõini wo doowu ʋai nii ɣaa ɣa, kɛɛ ʋaa ma wo mɛ lɛ ƃɔɔ ʋaa wɔɔlɔ. Gui‐zu‐ƃɔlɔ tuoi ziitini Yezɔitiɛ taniga ma, kɛɛ ʋaa ma nu liigoi pagɛi é va Gala pɔ zii ƃalaagitiɛ zaama te va ga gaa woolia.

²⁶Na ma Yezɔitiɛ ɣaazɔ ta valo. È ɣɛ velei ponɛi la Gala kɔlɔi zu mawoi ga “Da wulo‐faa‐zu nui ɣa wulo Zaayã é va. Towaa Gala tuo‐wo tala ʋai ƃale gá Yeekɔ nu zuwui zaama.”

²⁷Gala pɔ ka ɣɛɛzu tea, “Nii ɣa yá ɣɛ ga nà deʋei gà da te ya, gà ta ʋaa yowũitiɛ ziɣi na te va.”

²⁸A lii na ga woo niinɛ vagɔi wɔ vele, ta ga Gala kɔɔ yɔ̃wɔa wa wulo‐nu‐ma ʋaa ma, kɛ̀ a lii na ga zee‐ƃado‐ba ʋai wɔ vele ta ga Gala wõila vea te mama gwɔlɔni saƃu ma.

²⁹Ƃɔvɛlaale Gala na faa‐nɛi ƃɔga ná tiligi, faa ta lɛ zooga ɔ́ te maʋaa ziɣi ma.

³⁰Velei nɔ wo yɛga wɔlɔ la ga goo‐mɛni‐tala vea Gala zeea, tɔwɔ é wo ɣaazu‐maa‐wõi ɣaa toku ge zei Dusiitiɛ ta woo‐mɛni talai va,

³¹vele nɔ na te ɣɛɛ la ga goo‐mɛni‐tala vea, kɛɛ ʋaa ma gaazu‐maa‐wõi‐ɣai nii é woga ga wiɛ mazaƃui ma ta ƃalaa gaazu‐maa‐wõi‐ɣaa wo ga tiɛ.

³²Ƃɔvɛlaale Gala ge nu pɛ kɛɛni ga goo‐mɛni‐tala vea, kɛɛ ʋaa ma é te pɛ te ɣaazu‐maa‐wõi ɣa.

³³Ee Gala na kpɛtɛi ta ná kele‐ɣelegi te zuwuve! Ee Gala na faa‐ɣaa‐ɣai zuwuvɛ! Nu lɛ zooga ɔ́ ná deʋei ɣaa ɣa! Nu lɛ zooga ɔ́ ná tuoi zu‐wulo‐zu wɛ̃ɛ!

³⁴“Ƃɛ ɣa é de malìɣii wuu zu ʋaa wɛ̃ɛga? Ɔɔ ƃɛ ɣa é ɣɛɛ ga tɛnɛ nu?”

³⁵“Ƃaa ƃɛ ɣa é faa‐nɛɛ ɣɛɛ bɛ́ ga é su loo manui vɛ?”

³⁶Ƃɔvɛlaale towa ŋɛni pɛ kuloai zéea, tɔ nɔ wɔnɔ ŋɛni pɛ kuloai saala zu, é ga ŋɛni pɛ maʋaa mawɛ̃ɛ pele ma. Towa saala ma wɔlɔ‐wɔlɔ ta wɔlɔ‐wɔlɔ. Towaa ɣɛ ŋɛ na.