Read Loma LOOMƐITIƐ 14 Bible Online

LOOMƐITIƐ 14 - Loma bible

LOOMƐITIƐ 14

¹A li na ga nui nii fii ƃɛi zee‐la‐mai zu pɔ́ɔ laa vele, a yee zei maʋaa wu. Kɛ̀ wa tiɛni a mɛ lɛ sakpe too faitiɛ ma wa ɣi‐gaa‐ziɛi lɛ wuuni kii ma te zu.

²Ɣee ta nui ta ɣa siɣi ga gaama ga é daa‐mii ŋɛni mazii ta nɛpɛ mi, tɔwɔ nui nii fii ƃɛi zee‐la‐mai zu gulu‐wulu nɔ ɣa manui ɣa mi.

³Yài nɛpɛ yà ɣɛ ŋɛni mazii ta miizu, mɛ lɛ ɣɛ ga nu ta è ɣaazu ɔ́ wude nui nii maazu é ƃe tevea ŋɛnii na mii ʋaa va. Yài nɛpɛgi wɔnɔ è ƃe tevea ŋɛni mazii ta mii ʋaa va, mɛ lɛ nui nii maa wulo yá ɣɛ ŋɛnii na miizu. Ƃɔvɛlaale Gala ge yee zeiya maʋaa wu.

⁴È lo‐su ɣa ga minɛ è nu ƃɔnɔ na tii‐ɣɛɛ nu maa wulozu? Towaa ziɛ ná wu ƃaa ɛ́ lɛ zia ná wu, minɛ ɣa ná nu keea nu yii la. Tɔwɔ towaa ziɛ ná wu, ƃɔvɛlaale zobo ka de maliɣii vɛ ga é kɛ é ziɛ ná wu.

⁵Nu ta ɣa folo ɣila siɣi ga folo wala é leve foloi zɔitiɛ va, nui zɔi wɔ yíɛ foloi pɛ siɣi nɔ ga ta ga ɣavele. Zɔi nɛpɛ nu ta nɛpɛ ka laa la faa felegɔi niitiɛ zu pagɛ manu loo ga ná laa ɣigi zu ga ƃɔɔƃɔɔ su.

⁶Nui nɛpɛ yá folo ta wulo su ga folo wala, manui ɣa na ɣɛ ga é ƃaa la de maliɣii ma. Nui wɔnɔ yá ɣɛ ŋɛni mazii ta miizu, towaa mi de maliɣii na wũfe‐mai zu, tei tɔwɔ yá ɣɛ mama feezu Gala bɛ. Tɔwɔ nui nii yá ƃɔɔ ƃe teve ŋɛni mazii ta mii ʋaa va, manui ɣa kɛ de maliɣii na wũfe‐mai zu yíɛ mama fe Gala bɛ.

⁷De ta nɛpɛ gɛ lɛ ŋetea ƃɔɔ yee ma, de ta nɛpɛ gɛ lɛ wɔnɔ zaa ƃɔɔ yee ma.

⁸De yɛni ŋetea, da yɛ na de maliɣii vɛ. Da za kɔnɔ, de kɛ de maliɣii vɛ. Na ma de yɛni ŋetea‐oo, de zaani‐oo da nɔ ga de maliɣii wo.

⁹Ƃɔvɛlaale nii mazaƃui ɣa Kolai zaani la é ʋulu kɔnɔ. Zaƃui na ɣa ga saa vea pɛ, ʋulu vea pɛ, é ɣɛ ga te pɛ te maliɣi.

¹⁰Zɛƃɛ mu ka sa yá kɛ nu yìɛ ƃɔɔ nu maa wulo? Ɔɔ yà ƃalaa pɛ aƃɛi yá kɛ è ɣaazu yìɛ wudɛ è wɔɔ nu maazu? Toku ge zei ga de pɛ da vaazu losu Gala na faa‐wo‐bo kpɔkpɔgi laa wu.

¹¹Ponɛvɛ Gala kɔlɔi zu de maliɣii yìɛ ɣɛ tea, “Tei tɔwɔ gè na, nu pɛ ka vɛɛ kɔ̀wɔ wu. Na ɣa ɣɛɛ na nu pɛ ka laa wu ziɣi ma ga te dàa maa lɛ, nài gè ga Gala.”

¹²Na ma de yile‐giledai da vaazu woo zu wulozu da ƃɔɔ Gala gaazu.

¹³Nii mavele ma a de mɛ lɛ sa wɔlɔ‐wɔlɔ ɣiini maa wulo, kɛ̀ nii mugi da kɛ tɔ ga de deʋe ga de mɛ lɛ sa wɔlɔ‐wɔlɔ de wɔɔ nu luo wu ɔ́ nɔ ɣɛ ga de de wɔɔ nu loo pulu ŋeteai zu.

¹⁴Nài gè ga Pɔɔ, è ɣɛ velei gè la ga Kolai maa nu kwɛ̃ɛgɛ bɛ̀ tòai ga ná laa ga ŋɛni ta nɛpɛ gɛ lɛ na ƃaa ɔ́ ƃe ɣɛɛzu ma. Kɛ̀ ƃaa ɣa ziɣi ŋɛni ma nui nii ɣaazu é ná ki‐gaa‐ziɛi zu ga ƃaa lɛ ma.

¹⁵Ani yà è wɔɔ nu wãla‐ma ʋaa ɣɛɛ na ga yà laa‐mii ŋɛni‐miai, a kɛ tii ɛ̀ lɛ ŋeteai ɣɛɛzu wõila zu. Mɛ lɛ ƃe ba yà laa‐mii ŋɛni‐miai ɔ́ ɣɛ ga zaƃu nui nii Kolai za maʋaa ma su ɔ́ ƃɔnɔ wo.

¹⁶Na ma a mɛ lɛ ʋa bu ŋɛnii nii é ga ŋɛni vagɔ wo ʋaa ma tɔ ɣɛ bosu ga ɛ́ lɛ vani.

¹⁷Ƃɔvɛlaale Gala na masadai maʋaa zu‐wulo‐zu lɛ ga daa‐mii‐ŋɛni‐mia ta kpoale‐ƃoale‐ŋɛni‐ƃoalea. Kɛ̀ maʋaa zu‐wulo‐zu ɣa ga tele‐bo tuo‐woga ta zii‐laa luo‐ɣɛɛ é vɛɛ kuu‐zu‐nɛɛ va yá ɣɛ nu ya Gala baa ŋinɛgi zaala zu.

¹⁸Nui nɛpɛ yá tii ɣɛ Kolai vɛ pelei nii zu, towaa ɣɛ ga nui nii Gala ka yee zei bu, nu ƃusea te yii la maʋaa ma.

¹⁹Na ma a de vile fai nii wulu yá va ga zii‐laa é kɛ a de wɔɔlɔ kpɔ‐ba‐wogai zu ga ɣiini.

²⁰Mɛ lɛ Gala kɛɛ ʋai zu ŋala‐ŋala daa‐mii ŋɛni zaƃu ma. Ƃɔɔƃɔɔ su ŋɛni pɛ maa ziɣivɛ. Kɛ̀ ɛ́ lɛ pele ma nu ta nɛpɛ faa ma ga é kɛ zɔitiɛ te ziɣi pele va ná daa‐mii ŋɛni‐mii ʋaa zu.

²¹Tɔ pele ma ga è mɛ lɛ daƃa mi è mɛ lɛ dɔɔ ƃoale ɔɔ è mɛ lɛ fai nii ta nɛpɛ kɛ yá kɛ è wɔɔ nu ziɣi pele va.

²²Zee‐la‐mai nii é è ya, ƃe ba maʋai ɣɛ wo yɔɔzu wa Gala. Nui nii sakpe ta nɛpɛ gɛ lɛ ki su ƃɔɔ ʋaa ma fai nii zu é yee zeiya bu, kuu‐zu‐nɛɛ ɣa ɣɛ manui ya.

²³Nui nɛpɛ yá ŋɛnii nii mi ɛ́ lɛ laani la ga pagɛ é mi, faa ɣa yɛ ma, ƃɔvɛlaale tuoi nii yá bo ɛ́ lɛ ƃɔɔ laa la yɛ kɛ. Tɔwɔ fai nɛpɛ nu ɣa kɛ ɛ́ lɛ laani la tɔ ga faa yowũ.