Read Loma LOOMƐITIƐ 16 Bible Online

LOOMƐITIƐ 16 - Loma bible

LOOMƐITIƐ 16

¹Gà gé maŋaza nui Fiibii lɛɛzu ga wiɛ. Tɔ ga Kɛ̃ikulia Ɣala pɛlɛi wu lii‐ɣɛɛ nu.

²Gà dɛɛzu ga wiɛ ga wo yee zei bu wo ɣɛɛ vele ma su ɣilekpu wa de maliɣiini, è ɣɛ velei solowogɛi la numai niitiɛ ʋaa ma te wuloai su ga tee ga Gala na numaa. A wiɛ ƃɔ ba fai nɛpɛ su yá bo wo ma ga wo kɛ bɛ́, ƃɔvɛlaale tɔ ga nu lamaa ƃɔ‐ba nu, nà kagi pɛ.

³Gè Peleseka luoni ta Akuila niitiɛ te ga bàa lii‐ɣɛɛ veaitiɛ gé ɣɛɛ vele ma su ɣilekpu gá Ziizɛ Kolaini.

⁴Saa maʋaa ƃoei ɣɛni zɛlɛni te maazu te ɣi kulo ƃɔɔ ʋaa zu kɛɛ ʋaa ma zɛ̀ʋui yɛ zèea. Ɛ́ lɛ nɔ ga nà ɣilekpu, kɛ̀ Gala pɛlɛitiɛ ɣaazɔ te zii ƃalaagitiɛ ʋaa ma te wu veaitiɛ ta mama feezu te vɛ.

⁵Gala pɛlɛ wu veaitiɛ ta wũi ta vɛlɛi wu, gè natiɛ luo ƃalaa pɛ. Gè ẁõila nui Ɛpainitɔ luo wɔnɔ. Na ɣa ga nu maa wũgi é Kolai maʋaa ziɣini ga gaama Eezia yui zu.

⁶Gè Meele luo nii é tii ɣɛɛ ga kpaanaga wo zaama.

⁷Gè Aidɔlɔ‐nikɔ luo ta Junia niitiɛ te ga kàa yɔ̃wɔa te ga numaitiɛ te vɛɛni wɔnɔ bà gá tiɛni gé ɣɛ ga pilisinea. Ta ga nu ɣaa wua Ziizɛ na keelaitiɛ zaama. Ta Kolaini te ɣɛɛni su ɣilekpu tùo.

⁸Gè Ãpili‐yatɔ luo nii é ga wõila nui gé ɣɛɛ vele ma su ɣilekpu gá gé maliɣiini.

⁹Gè Ɔbaanɔ luo nii é ga gé wɔɔ lii‐ɣɛɛ nui gé ɣɛɛ vele ma su ɣilekpu gá Kolaini é vɛɛ ẁõila nui Sitakɔ va.

¹⁰Gè Apɛlɛ luo nii maʋai numaa yii la te ɣɛɛ vele ma su ɣilekpu ta Kolaini. Gè numai niitiɛ luo te ga Alese‐tɔbulu ná pɛlɛi wu vea.

¹¹Gè kàa yɔ̃wɔi Hɛloodiã luo. Gè numai niitiɛ luo ta de maliɣiini te su ɣilekpu te ga Nasiisɔ na pɛlɛi wu vea.

¹²Gè tii‐ɣɛɛ veai niitiɛ luo ta de maliɣiini te su ɣilekpu. Natiɛ ta ga Tele‐faina ƃɔga Tele‐foosa. Gè ẁõilanui Pɔisisi luo nii é tii ɣɛɛ ga kpaanaga te ɣɛɛ vele ma su ɣilekpu ta de maliɣiini.

¹³Gè Luufɔ luo. Tɔ ga nu ɣaa wua te ɣɛɛ vele ma su ɣilekpu ta de maliɣii. Gè dée luo ƃalaa pɛ. Dée ɣa luo gàazu è ɣɛ nu duu.

¹⁴Gè Asĩi‐koluitɔ luo, gè Felegɔ̃ luo, gè Hɔɔmi luo, gè Patɔlɔba luo, gè Hɛɛma luo é vɛɛ sa de vai zɔitiɛ va ta tiɛni te na.

¹⁵Gè Filaa‐lɔgɔ luo, gè Juulia luo, gè Neelia luo ta ná seelai, gè Oolẽepia luo é vɛɛ sa niitiɛ ɣaazɔ va te wuloai su ga tee ga Gala na dɔa ta tiɛni te na.

¹⁶A wiɛ ɣiini tuo ga ná maa wua. Kolai na Gala pɛlɛi wu vea ɣaazɔ te wo luoni.

¹⁷Nà numaa, gà daazu wo vɛ ga wo yee la ga numai niitiɛ te vaazu ga gaa‐wɛɛ ʋaa ta faa ƃaa‐ƃaa te ɣɛlɛ velei ma kala‐bogi nii vɛ te wo ɣala boga la. A lɛɣi ga tiɛ.

¹⁸Ƃɔvɛlaale na ɣavele veaitiɛ tɛ lɛ ɣɛɛ tii ɣɛɛzu de maliɣii Kolai vɛ. Kɛ̀ ta ƃɔɔ ŋɛni‐wõi faa ɣa ta ɣɛ malii ɣɛɛzu. Na ɣa ɣɛɛ na numai niitiɛ te liti daa nɛi tiɛ sa natiɛ ɣaa wɔlɔ ga woo nɛɛ‐nɛɛ ta daa‐maa‐lɛɛ woo yãka.

¹⁹Tei tɔwɔ wa woo‐mɛni‐kulo ʋai wɛ̃ɛgɛi nu pɛ bɛ, gà wo mawuu‐zu‐nɛɛ wulozu. Gè wõini wo ɣele‐ɣele faa vagɔ zu, wo mɛ lɛ ɣele‐ɣele faa yowũ‐ɣɛɛ luo‐woga zu.

²⁰Na ɣa ɣɛɛ na zii‐laa Ɣalagi ɣa sa a Seeta zu wolo‐wolo é pu wo wɔwɔ wu. De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo woba fãa.

²¹Bɔ̀ɔ lii‐ɣɛɛ nui Temete é wo luoni. Vele nɔ na é la ga Lusia ta Jeesɛ̃ é vɛɛ Sosi‐peetɔ va. Natiɛ ta ga káa yɔ̃wɔa.

²²Nài gè ga Tɔɔtia gè Pɔɔ laa woi wonɛzu kɔlɔi nii zu gè wo luoni de ɣɛɛ vele ma su ɣilekpu da de maliɣiini.

²³Geea nii é ga nài gè ga Pɔɔ nà wɛ̃ɛ keeai, é kɔnɔ ga Gala pɛlɛ wu veaitiɛ ɣaazɔ ta wɛ̃ɛ keea, é wo luoni. Elasitɔ nii é ga taa veaitiɛ ta naʋolo laa‐zu‐ɣɛɛ nui é wo luoni. Gé wɔi Kwaitɔ é wo luo kɔnɔ. [

²⁴De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo pɛ wo woba fãa. Towaa ɣɛ ŋɛ na.]

²⁵Tɔwɔ daa‐maa‐lɛɛ ɣa wo ga nui nii yá zobo kɛ wiɛ é wo zu ƃaa ga woo niinɛ vagɔi gè bosu ta Gala goi pilegɛi Ziizɛ Kolai va. Na ɣa ga nii maʋaa loowugɛi ɣɛ ga su woozaa.

²⁶Tɔwɔ maʋaa wuloa kɛnɛ ma zii pɛ ge kwɛ̃ɛ Gala daa woo‐wo kɔlɔitiɛ te Gala kɔlɔi zu te zaala zu. Nii ɣɛɛvɛ Galagi nii maʋaa wɛ̃ɛ gɛ lɛ ba ná deʋei zaala zu. Na ɣa ga deʋei nii é daa de ya ga de goo‐mɛni kulo zéea ga de laa vele la.

²⁷Daa‐maa‐lɛɛ ɣa wo ga Galagi nii wɔlɔ‐wɔlɔ ta wɔlɔ‐wɔlɔ, nii tɔ ɣilekpu nɔ kele‐ɣelegɛi. Nii ɣa ɣɛ Ziizɛ Kolai zaala zu! Towaa ɣɛ ŋɛ na.