Read Loma LOOMƐITIƐ 6 Bible Online

LOOMƐITIƐ 6 - Loma bible

LOOMƐITIƐ 6

¹Zɛƃɛ ɣa sa da bo mu? ?A da ɣata faa yowũ‐ɣɛɛ va kɛɛ ʋaa ma maa‐wõi‐ɣaa ƃɔ‐bai zu wɔɔlɔ ma de ya?

²Ɛ́ lɛ wɔlɔ‐wɔlɔ ŋɛ na!? Dai de zaa ga de ƃe ge leve faa yowũ‐ɣɛɛ va da leve ɣɛ le diɛ da ŋeteai ɣɛ faa yowũ zu dɛ kpɛ?

³?Wɛ lɛ kwɛ̃ni ga daitiɛ ɣaazɔ bataize ɣɛɛ ga diɛ da Ziizɛ Kolaini de ɣɛ su ɣilekpu, de ƃɔni da tiɛni de za bataizɛi mavele ma?

⁴De zaani da Kolaini te de loowu bataize‐ɣɛɛ vele ma ga diɛ, kɛɛ ʋaa ma velei nɔ é wu ziɣini la saa ya kéea na bɔɔlɔlai zaala zu, da ƃalaa pɛ de ziɛ ŋɛ na ŋetea niinɛ zu.

⁵Toku ge zei ga ani da ɣɛ na su ɣilekpu de zaa vele ma da Kolaini, ƃɔɔƃɔɔ su da ɣɛ su ɣilekpu da tiɛni de wu‐ziɣi vele ma saa ya è ɣɛ velei é wu ziɣia la saa ya.

⁶De kwɛ̃ni ga de luo vele wɔlɔ‐zaɣagi malɔtɔi vɛɛni Kolai va te kpako pɛɛ‐pulu wulu likpii ma, kɛɛ ʋaa ma faa yowũ‐ɣɛɛ lɔtɔi zu ŋala‐ŋala. Na ɣa ɣɛɛ na de mɛ lɛ wɔlɔ‐wɔlɔ ɣɛ sa ga duo faa yowũ ya.

⁷Ƃɔvɛlaale nui nii é zaa wũ maa wogɛ sa faa yowũ ya.

⁸Kɛ̀ ani de vɛɛ Kolai va da tiɛni de za, siɣivɛ de vɛ ga gaama ga a da vɛɛ ba da tiɛni de ŋeteai ɣɛ.

⁹Ƃɔvɛlaale de kwɛ̃ni ga tei tɔwɔ Kolai wu ziɣia saa ya, ɛ́ lɛ sa wɔlɔ‐wɔlɔ zaa wɔnɔ. Saa na gaa‐ƃaa lɛ sa maazu wɔlɔ‐wɔlɔ.

¹⁰Sai é boni, é boni faa yowũ mazaƃu ma. Tɔwɔ tii nɔ na sa. Kè ŋeteai é kɛɛzu tɔ kɛɛzu Gala bɛ.

¹¹Na ma kɛni wa ɣi gaa ziɛ ƃɔɔ ʋaa ma ga wo zaavɛ ga wo ƃe teve faa yowũ va wo ŋeteai ɣɛ Gala bɛ wo ɣɛɛ vele ma su ɣilekpu wa Ziizɛ Kolaini.

¹²Na ma a mɛ lɛ ƃe ba faa yowũ na gaa‐ƃaa ɔ́ ɣɛ saa lɔtɔi maazu é wo ma ɔ́ kɛ wo laa zei bu ga wo nu ƃuse yii‐ma ŋɛniitiɛ te mawõi leve ƃɔɔ ma.

¹³A mɛ lɛ laa zei bu faa yowũ ɔ́ wo lɔtɔi lo‐suvɛtiɛ ɣɛ ga tuo vele yowũ lii‐ɣɛɛ zɔɔlaa. Kɛ̀ tei tɔwɔ wo wuloa saa ya wo zɛʋui maa zɔlɔ wo, a ƃɔɔ ʋe Gala zeea wo lɔtɔi lo‐suvɛtiɛ ʋe zéea ga tele‐bo tuoi malii‐ɣɛɛ zɔɔlaa.

¹⁴Ƃɔvɛlaale gaa‐ƃaa nɛpɛ gɛ lɛ ɣɛɛ faa yowũ ya wo maazu, toku ge zei ga wɛ lɛ Gala na tɔgi yee wu, ná maa‐wõi‐ɣaa ƃɔ‐bai ɣa wo zée wu.

¹⁵Zɛƃɛ mu be sa? ?Tei dɛ lɛ Gala na tɔgi yee wu ná maa‐wõi‐ɣaa ƃɔ‐bai ɣa de zée wu, na ma a da faa yowũ ɣe? Ɛ́ lɛ wɔlɔ‐wɔlɔ ŋɛ na!

¹⁶?Wɛ lɛ kwɛ̃ni ga ani wa laa zei na nu nɛpɛ daa ƃɔɛ wu é ɣɛ duoi niitiɛ ta goo‐mɛni kulo, wa ɣɛ ga duo nui nii ya wo goo‐mɛnigi wulozu zéea? Na ɣa ga ani wa laa zei na bu ƃalaa wo faa yowũi nii ɣɛ yá kɛ wo za ɔɔ wa laa zei bu ga wo goo‐mɛnigi nii wulo yá kɛ wo ɣɛ ga tele‐bo tuo‐wo bea.

¹⁷Kɛ̀ Gala mama. Toku ge zei ga wo ɣɛni wɔlɔ ga duo faa yowũ ya, tɔwɔ wo kuloa yii zu wo ɣɛ ga goo‐mɛni‐kulo vea. Wo maʋai zolowo sa su kala‐bogi nii ʋaa ma wo lɔɔ bu

¹⁸Tei tɔwɔ te wo wũ maa woga faa yowũ ya, wo ɣɛɛ sa ga duo tele‐bo tuoi yee wu.

¹⁹Gà woi nii wosu wiɛ nu pɛ ka gaa ɣa, ƃɔvɛlaale wo wɛ̃ɛ tevevɛ faa ɣaa‐ɣai zu è ɣɛ velei nɔ é la ga nu ƃuse ɣaazɔ. Velei nɔ wɔlɔ wo lɔ́tɔi maa woloni la faitiɛ zu te maa lɛ wuoni ta faa yowũ ƃakpa‐ɣɛɛ, a ƃɔɔ maa wolo ŋɛ na tele‐bo tuo‐woga zu, kee ʋaa ma wo ɣɛ ga numaitiɛ te wuloai su ga tee Gala faa ma.

²⁰Tei wo ɣɛni ga faa yowũ na dua, wo yee laa ʋũigɛi ɣɛ. Na ɣa ga tele‐bo tuo‐woga lɛ ŋɛni ga wo ƃala‐ma ʋaa.

²¹Kɛ̀ tɔwɔ zɛƃɛ ɣa é ɣɛni ga fai niitiɛ te mawulo‐nu‐ma niitiɛ te ga wo wũfe faa zai ŋɛ ni? Fai natiɛ te mawɛ̃ɛ pele ma ɣa nɔ ga saa.

²²Kɛ̀ tei tɔwɔ sa te wo wũ maa woga faa yowũ ya wo ɣe ga Gala na dua, na mawulo‐nu‐mai ɣa ga wo wulo su ga tee Gala faa ma. Na laa‐wulo‐zuvɛ wɔ ka ga zɛʋui nii kwẽɛ gɛ lɛ ba.

²³Ƃɔvɛlaale faa yowũ maʋɔɔnɛ‐ʋee ɣa ga saa. Kɛ̀ Gala na faa‐nɛi nu ta lɛ maa mɔɔlɛ woni tɔ ga zɛʋui nii kwɛ̃ɛ gɛ lɛ ba nii da sɔlɔ wo de ɣɛɛ vele ma su ɣilekpu da de maliɣii Ziizɛ Kolaini.