Read Loma LOOMƐITIƐ 7 Bible Online

LOOMƐITIƐ 7 - Loma bible

LOOMƐITIƐ 7

¹Gà ƃɔɛzu numai niitiɛ wɔ te tɔgi wẽni? Nà numaa, wɛ lɛ kwɛ̃ni ga nui nɔ zɛʋui dɛ zéea towa báa ʋaa ga é ziɛ ga tɔgi laa woi?

²Nii mavele ma zini‐bɛ ŋaza nu ɣa ɣɛ tɔgi ɣee wu pɔɔ nui ʋaa ma ani nɔ pɔɔ nui ɣa dɛ ŋetea. Kɛ̀ ani pɔɔ nui ɣa zaa na, ɛ́ lɛ sa ɣɛɛ tɔgi nii yee wu pilegɛi ba.

³Na ma ani nɔ pɔɔ nui yɛʋui ɣa zéea é zei zunu ta ƃɔnɔ bɛ, ta bo ga é wɛ̃ɛ‐ziɛ boga pɔɔ nui ma. Kɛ̀ ani pɔɔ nui ɣa zaa na, kuloa ɣa na tɔgi yee wu. Anɛɛ ƃalaa sa é zei zunu ta ƃɔnɔ bɛ, ɛ́ lɛ ɣɛɛ ga nui é wɛ̃ɛ‐ziɛ bosu pɔɔ nu ma.

⁴Vele nɔ na é la ga wiɛ, nà numaa. Wo zaa ga wo ƃe ge leve tɔgi va Kolai malɔtɔi zaala zu, kɛɛ ʋaa ma wo yɛ zéea. Tɔ ga nui nii é wu ziɣia saa ya ga de lɔnɔ ɣɛ de va Gala faa ma.

⁵Tei de ɣɛni ŋeteai ɣɛɛzu nu ƃuse yii‐mai mavele ma, tɔgi é ŋɛni‐wõi leve‐ma ʋai wũ bu ziɣini de lɔtɔi zu ga de faa yowũ ɣɛ. De lɔtɔi lo‐suvɛtiɛ tiɛ sa malii ɣɛ. Saa wɔ ka é ga su‐lɔnɔ

⁶Tɔwɔ de wulovɛ sa, tɔgi yee wu. Na ɣa ga tɔgi nii é de zoni ga duo de ƃe tevevɛ ba, kɛɛ ʋaa ma a de mɛ lɛ ɣɛ tii yɛɛzu tɔ pɔlɔ‐zaɣagi nii yee wu ponɛi, kɛ̀ a diɛ tii ɣɛ Gala baa ŋinɛgi na ŋetea niinɛi zu.

⁷Zɛƃɛ mu ka sa da bo? ?Da bo ga Gala na tɔgi ɣa ga faa yowũ? Ɛ́ lɛ wɔlɔ‐wɔlɔ ŋɛ na! Na ƃalaa ɣɛɛvɛ è ɣɛ lɛ ŋɛni ga ná tɔgi, gɛ̀ lɛ ƃega faa yowũ wɛ̃ɛ. E ɣɛ tɔgi nii lɛ boni ɔ́ ɣɛ tea, “Mɛ lɛ nu weli mayii vili wuu zu,” gɛ̀ lɛ ƃega kwɛ̃ɛ ga nii é ga nu weli mayii‐viligai nu wuu zu.

⁸Kɛ̀ tei tɔwɔ tɔgi nii é pele laa laoga faa yowũ luo, faa yowũ é zii‐kuu‐zu ʋaa mazii ɣaazɔ ƃɛtɛɛ kigi zu. Tɔgi wɔɔ laa ɣa ziɣi na ba, faa yowũ ɣɛɛ‐zu lɛ ɣɛɛ na.

⁹Zɛ̀vui ɣɛni wɔlɔ zèea tɔgi wɔɔ laa ziɣi ba. Kɛ̀ tei tɔgi vaani faa yowũ ɣɛɛ‐zu zɔlɔ woni, nà wɔ gè za.

¹⁰Tɔgi nii ƃɔɔƃɔɔgi é ki toni ga zɛʋu tɔ nɔ ɣa é saa laa ziitia mà.

¹¹Su‐wulo‐zu ɣa ga faa yowũ pele zɔlɔ woga ga tɔgi wɔ vele é gàa wɔlɔ. E leve sa ga tɔgi wɔ vele é pàa.

¹²Na ma Gala na tɔgi ɣagi maa wuovɛ. Ná deʋei dai de ya maa wuovɛ maʋaa pele ma pagɛi.

¹³?Fai nii pagɛi towa mu é saa laa ziitini ma? Ɛ́ lɛ wɔlɔ‐wɔlɔ ŋɛ na! Faa yowũ ɣa é nii ɣɛɛni. Faa vagɔ wɔ vele ɣa é leveni da ga é pàa. Nii ɣɛɛni ga faa yowũ maʋai ɣaa wodo ga tɔ ga fai yowũai. Na ɣa ɣɛɛ na faa yowũ maʋaa yowũ é teve kɛɛzu va tɔgi zaala zu.

¹⁴De kwɛ̃ni ga tɔgi maʋaa ɣa ga Gala faa. Kɛ̀ gà ga nu ƃusei nii sɔ̃wɔ wuloai faa yowũ ma.

¹⁵Gɛ̀ lɛ ƃɔɔ ɣɛɛ‐zɔgitiɛ ɣaa ɣaazu. Ƃɔvɛlaale nii gè wõini gè kɛ gè lɛ na ɣɛɛzu, kɛni nii mugi bɛlɛ ziɣiai bɛ̀.

¹⁶Tɔwɔ ani nii gɛ̀ lɛ wõini gɔ̀ kɛ gà ɣɛ na nà ɣɛɛzu, a kɛ tii fàavɛ bu ga tɔgi maʋaa vagɛ

¹⁷Na ma nà ƃɔwɔi lei gɔ ɣɛ kɛɛzu. Faa yowũi é kigi zu tɔ vee de.

¹⁸Ƃɔvɛlaale gè kwɛ̃ni ga faa vagɔ ta nɛpɛ gɛ lɛ kigi zu, na ɣa ga faa vagɔ ta nɛpɛ gɛ lɛ nu ƃuse ŋeteai zu gè kɛɛzu. Gà zoo gè deʋe ga nii é pele ma giɛ na ɣɛ, kɛ̀ gɛ̀ lɛ zoosu gɔ̀ kɛ.

¹⁹Ƃɔvɛlaale faa vagɔi nɛpɛ gè wõini gè kɛ gɛ̀ lɛ na ɣɛɛzu. Kɛ̀ faa yowũi mugi gɛ̀ lɛ wõini towa gè kɛɛzu.

²⁰Tɔwɔ ani nii gɛ̀ lɛ wõini gà ɣɛ na nà ɣɛɛzu, a kɛ tii nà lei gɔ̀ ɣɛ kɛɛzu. Kɛ̀ faa yowũi é kigi zu tɔ vee de.

²¹Na ma gà wɛlɛzu na va ga tɔ mà ga tɔ ga gà ɣɛ na gè fai nii ɣe é pele ma, faa yowũ maa ɣa ƃuo bà.

²²Ƃɔvɛlaale Gala na tɔgi ziɣivɛ ƃɔɔ bɛ̀ ɣigi zu ga zii‐ma ʋaa.

²³Kɛ̀ gè wɛlɛɛ na va ga tɔgi ta ƃɔnɔ ka dɔ̀tɔi zu yiɛ ŋapi wɔ Gala na tɔgi nii wɔ é nà ki‐gaa‐ziɛi ʋaa ma. Tɔ kɛ̀ɛzu ga duo faa yowũ‐ɣɛɛ lɔgi ya é dɔ̀tɔi zu.

²⁴Màa wõivɛ ga gwala! Ƃɛ ɣa a kùlo dɔ̀tɔi nii ya é saa laa ziitizu ma?

²⁵Kɛ̀ Gala mama! Tɔ kɛɛzu bɛ̀ de maliɣii Ziizɛ Kolai zaala zu! Na ma gà tii ɣɛɛzu Gala na tɔgi yee wu nà ki‐gaa‐ziɛi zu vele. Kɛ̀ a lii na ga nu ƃuse lɔtɔi zu vele, gà tii ɣɛɛzu faa yowũ na tɔgi yee wu.