Read Loma 1KƆLĨITIƐ 10 Bible Online

1KƆLĨITIƐ 10 - Loma bible

1KƆLĨITIƐ 10

¹Nà numaa, gè wõini wo kwɛ̃ɛ ga tine ƃiligi pele wuloni ga de mama gwɔlɔni gaazɔ. Te pɛ te vileni yuwu yii ma zuu ʋɔɔ ma te teve.

²Te pɛ bataize ɣɛɛni ga tiɛ ga ta Moozeni te ɣɛ su ɣilekpu. Bataizei‐ɣɛɛ vele ɣɛni ga te ɣɛi te bo tine ƃiligi wu ta yuwu levegi te bo.

³Te pɛ te Gala ta laa‐mii ŋɛnii miini

⁴te ƃoale ga Gala ta yiɛi, ƃɔvɛlaale Gala ta wɔtii nii é vileni te wulu ziɛ ɔ́ wulo ba tiɛ kpoale, tɔwɔ kwɔtii na ɣɛni ga Kolai.

⁵Na pɛ ge ɣɛɛvɛ Gala zii lɛ ŋɛni laani ƃɔɔlɔ‐zu ʋaa ma. Ƃɔvɛlaale te zu ŋala‐ŋalani kpooʋei zu.

⁶Tɔwɔ fai niitiɛ ta ga de lɛnɛ goo, kɛɛ ʋaa ma de mɛ lɛ faa yowũ ziɣi ga yii‐ma è ɣɛ velei te kɛɛni la.

⁷A mɛ lɛ ɣɛ ga maa‐niini gala‐feli vea ga velei te taniga te ɣɛni la. È ɣɛ velei ponɛi la Gala kɔlɔi zu mawoi ga “Numaitiɛ te zeini ga te laa mi te dɔɔ ƃoale te wu ziɣi sa ga te ɣaa.”

⁸A de mɛ lɛ yee vili wɛ̃ɛ‐ziɛ‐boga zu è ɣɛ velei te taniga te kɛɛni la, na ɣa ɣɛɛ na nu wulu zee felegɔ kai saagɔ za te va ga folo ɣilekpu kpẽe.

⁹A de mɛ lɛ de maliɣii zu wɔ̃ɔ è ɣɛ velei te taniga te kɛɛni la, kaaliitiɛ wɔ te te zu ŋala‐ŋala,

¹⁰ɔ́ nɔ ɣɛ ga de zili zaɣa è ɣɛ velei te taniga te kɛɛni la, Gala ta ɣeelai va é te zu ŋala‐ŋala.

¹¹Tɔwɔ fai natiɛ te ɣɛɛni ga tiɛ ga tɛnɛ goo, kɛ̀ te wonɛvɛ Gala kɔlɔi zu de ɣala‐bo faa ma, dai ŋeteai maʋaa vaazu wɛ̃ɛsu da yɛmini su.

¹²Na ma ƃe ba nui nɛpɛ é kigi zu ga tɔ loni kpãa, é wɛlɛ ƃɔɔ wũ maazu va é mɛ lɛ va loozu.

¹³Tɛ‐ga nɛpɛ gɛ dɛ woni ga wiɛ nii ɛ́ lɛ woga ga nu ƃuse. Gala ka ga nui nu ɣa laa la. Ɛ́ lɛ ƃega ba tɛ‐gai nii zobo gɛ lɛ wiɛ ga wo lo zéea kpãa nà ɔ́ wo ga wiɛ. Kɛ̀ towaa pele wulo ga wiɛ ga velei wa leve da tɛ‐gai wudɛ wo wũ maazu. Nii ɣɛɛ velei ɣa ga towaa kɛ wo yii lɔ gá é yɛsu é wudɛ wo wũ maazu.

¹⁴Na ma ẁõila veaitiɛ, a ƃe teve maa‐niini gala‐felia va.

¹⁵Gà ƃɔɛzu è ɣɛ velei nu ɣa ƃɔɛ la faa‐ɣaa‐ɣaa vea wɔ. Fai nii gè bosu, a ɣaazu lɛɛ la wo zii la ƃɔɔ ʋaa ma.

¹⁶?Tuuyiɛi mawɔpui nii maʋai wulo su leelaa ga faa ɣaa wua, tɔ lei ɔ́ ɣɛ ga de wɔɔ‐laa‐loai Kolai maŋamai va? ?Kpooloi da su ɣale‐ɣale de mi, tɔ lei ɔ́ ɣɛ ga de wɔɔ‐laa‐loai Kolai malɔtɔi va?

¹⁷Tei tɔwɔ kpoolo‐ʋɔɔ ƃumɛi nɔ ɣile, de lamagɛ pɛ da nɔ ga dɔtɔ ɣilekpu, toku ge zei ga de pɛ da wɔɔ laa loo kpoolo‐ʋɔɔ ƃumɛ ɣilagi nɔ maʋaa va.

¹⁸A ɣi gaa ziɛ lɛɛ nii ma Yezɔitiɛ te kɛɛzu. Kɛ̀bɛ taitiɛ te zalaɣa ŋɛniitiɛ miizu te wɔɔ laa ɣa Gala zeke‐kɛɛ vanagi maʋaa va, kɛlɛɛ?

¹⁹Wo ɣigi zu, nii gè boga su‐wulo‐zu ɣa sa ga minɛ? ?Daa‐mii ŋɛnii ta maa‐niini galaga wɔɔ la kɛ́i ɣa bogɛi ga ŋɛni‐ɣɛɛ ŋɛni ta nɛpɛ? ?Ƃaa maa‐niini gala kɛ́i ɣa bogɛi ga ŋɛni‐ɣɛɛ ŋɛni ta nɛpɛ?

²⁰Ɛ́ lɛ ŋɛ na. Nii gè boga su‐wulo‐zu ɣa ga nii Gala tuo‐wo tala veaitiɛ ta kulo ga zalaɣa ta fe gɔʋɛ yowũa ya. Tɛ lɛ feea Gala zéea. Gɛ̀ lɛ wõini wa gɔʋɛ yowũa wɔ ƃɔ faa ma.

²¹Wɛ lɛ zooga wɔ de maliɣii na kpoale ŋɛnii zu ŋɛni ƃoale wɔ wɔnɔ gɔʋɛ yowũa ta dɛi zu ŋɛni ƃoale. Wɛ lɛ zooga wɔ wɔɔ laa loo de maliɣii na daa‐mii ŋɛni ʋaa va wo wɔɔ laa ɔ́ wɔnɔ ɣɛ gɔʋɛ yowũa ta laa‐mii ŋɛni ʋaa va.

²²?A da tolo vili de maliɣii yii zu ʋaa ve? ?A de zu ƃaavɛ é leve ba ʋaa ve?

²³“De yee laa ʋũigɛ ga de faa pɛ kɛ,” kɛ̀ tɔwɔ fai pɛ ge lei yá ƃɔ nu va. “De yee laa ʋũigɛ ga de faa pɛ kɛ,” kɛ̀ tɔwɔ fai pɛ ge lei yá nu na ŋetea yee leve tuo.

²⁴Pagɛ nu ta mɛ lɛ pele ɣaa ziɛ ƃɔɔ wulo‐nu‐ma ʋaa ma, kɛ̀ to mu yíɛ kɛ bɔɔ nu na kulo‐nu‐ma ʋaa ma.

²⁵Daƃai nɛpɛ ta ɣɛ sɔ̃wɔ wulozu dɔwɔi zu, a mi, sakpe nɛpɛ ge mɛ lɛ ɣɛ wo yii zu ga ani pagɛ wo mi ƃaa wo mɛ lɛ mi.

²⁶Ƃɔvɛlaale ponɛvɛ Gala kɔlɔi zu mawoi ga “Zui vɛɛ su ŋɛni ta nɛpɛ ba ta ga de maliɣii wo.”

²⁷Ani niitiɛ tɛ lɛ Kolai ʋaa ziɣini ga gaama te ta nɛpɛ ka wo lili na daa‐mii ŋɛni ma, wa wɔ wo yii lai ga wo li na, wa li. Zɔi nɛpɛ ta fe wo ya wo mi, sakpe nɛpɛ ge mɛ lɛ ɣɛ wo yii zu ga ani pagɛ wo mi ƃaa wo mɛ lɛ mi.

²⁸Kɛ̀ ani nu ta ɣa ɣɛ na wo ma, “Te daa‐mii ŋɛnii nii wuloa ga zalaɣa,” wa ɣi gaa ziɛ nui nii é wo loa ɣi su ná zii‐zɛlɛ fai mazaƃu ma wo ƃe daa‐mii ŋɛnii‐mii ʋaa va.

²⁹Nii gè bosu su‐wulo‐zu ɣa ga manui na zii‐zɛlɛ fai, ɛ́ lɛ ga wa yii‐zɛlɛ faa. Zɛƃɛi yá kɛ nà zee‐laa‐ʋũi fai ziɣi nu ƃɔnɔ na zii‐zɛlɛ faa la?

³⁰Tei tɔwɔ gà mama fe Gala bɛ nà dɔ laa‐mii ŋɛnii ʋaa ma, zɛƃɛi yá kɛ nu dàa woo ga yowũa ŋɛnii nii ʋaa ma gè mamama feezu?

³¹Na ma wo ɣɛni laa miizu ƃaa wiɛ ŋɛni ta ƃoale ɔɔ wiɛ faa ta nɛpɛ kɛ, a wiɛ kɛ ga wo ƃaa la Gala ma.

³²A mɛ lɛ Dusi nu wãla‐ma ʋaa ɣɛ ɔ́ nɔ ɣɛ ga Geliiki nu ɔɔ Gala pɛlɛi wu veaitiɛ.

³³È ɣɛ velei nɔ gè nu pɛ zii‐laa vele ɣaa ziɛzu la fai ɣaazɔ zu, gà kɛɛzu, kɛ̀ nà wɔ gɛ̀ lɛ kɛɛzu kpɔ̀ɔ wulo‐nu‐ma ʋaa ma. Kɛ̀ to mu gà kɛɛzu nu lamaa ʋaa ma ga te valo.