Read Loma 1KƆLĨITIƐ 11 Bible Online

1KƆLĨITIƐ 11 - Loma bible

1KƆLĨITIƐ 11

¹A wiɛ masa mà, è ɣɛ velei nɔ gè masasu la Kolai ma.

²Gà wo laa maa lɛɛzu, ƃɔvɛlaale dàa ɣi ka wo ɣa fai ɣaazɔ zu. Na ɣa ɣɛɛ na wo yee ɣatagɛ de ɣɛɛ ʋai va, è ɣɛ velei nɔ gè zee laa la wo ya.

³Gè wõini wo gaa ɣa ga zunu ɣaazɔ mawũ ka ga Kolai. Ŋaza nu mawũ ka ga sinigi. Kolai mawũgi wɔ ka ga Gala.

⁴Zunu nɛpɛ ka ɣɛ na Gala felizu ɔɔ yíɛ daa woo wo ŋɛni ta vɛɛni wũmɔ, ɛ́ lɛ ɣɛɛ ƃaa laazu wũgi ma.

⁵Kɛ̀ ŋaza nu nɛpɛ ka ɣɛ na Gala felizu ɔɔ yíɛ daa woo wo é ga wũmɔ yãka, ɛ́ lɛ ɣɛɛ ƃaa laazu wũgi ma. Maʋaa ɣa wulo è ɣɛ wũgi ɣa ƃolo.

⁶Ani ŋaza nu lɛ ɣɛ bɔɔlɔ ziini ga wũ, maa nɛɛvɛ te na wũ deɣai leve ma. Kɛ̀ ani tɔ ga wũfe faa ga te ŋaza nu na wũ teve ma ɔɔ te kpolo, pagɛ é bɔɔlɔ pɛɛ wũmɔ.

⁷Ɛ́ lɛ zunu ma ga kui ga é ŋɛni ta vɛɛ wũmɔ, toku ge zei ga tɔ ɣa é ga Gala mawo‐kɔ̃ɔ, saalai é Gala ma nàa má. Kɛ̀ zunu na saala ɣa é ŋaza nu ma.

⁸Ƃɔvɛlaale ŋaza nu ta lɛ ziɣini bá ɔ́ ƃɛtɛ ga zunu. Kɛ̀ zunu ɣa ta ziɣiai bá é ƃɛtɛ ga ŋaza nu.

⁹Gala gɛ lɛ ŋɛni ʋɔlɔ ƃalaa zunu ƃɛtɛni ŋaza nu ʋaa ma. Kɛ̀ é ŋaza nu ƃɛtɛni zunu ʋaa ma.

¹⁰Na ɣa é kɛɛ é ŋaza nu ma ga kui ga é bɔɔlɔ zii ga wũ Gala ta ɣeelaitiɛ zaƃu ma.

¹¹Na pɛ ge ɣɛɛvɛ, de maliɣii na siɛ‐pululai zu, ŋaza nu lɛ ziɣini zunu va ɔ́ ɣɛ ga tee ɔ́ nɔ ɣɛ ga zunu ziɣi ŋaza nu va é ɣɛ ga tee.

¹²Velei nɔ zunu ta ziɣiai la bá é ƃɛtɛ ga ŋaza nu, vele nɔ na ƃalaa kɔnɔ ŋaza nu é zunu ɣaazu la. Tɔwɔ ŋɛni pɛ kulovɛ nɔ Gala zeea.

¹³Wa ƃɔɔ a nii ɣaa leve.? Tɔ pele ma ga ŋaza nu yíɛ Gala feli ga wũmɔ yãka?

¹⁴Kɛ̀bɛ ŋeteai ɣagi ɣa wo ɣala bosu ga zunu na wũ deɣa ɣa ɣɛ na yaƃa‐yaƃa, towaa ɣɛ ga mazunui vɛnɛ ʋaa,

¹⁵tɔwɔ a ɣɛ na ŋaza nu wũmɔ é ga ŋɛnii yá bɔɔlɔ ƃɔɔ ɣaazu, kɛlɛɛ? Wũ deɣai ʋeevɛ zéea ga é wũ kɔlɔgi maazu vɛɛ.

¹⁶Ani nu ta nɛpɛ ge wõini é daa‐zaa lɔ dà, gà bosu manui ma ga gɛ́ lɛ yee zeiya tuo ta ƃɔnɔ nɛpɛ bu ɔ́ nɔ ɣɛ ga Gala na pɛlɛi wu veaitiɛ te kɛ.

¹⁷Kɛ̀ gɛ̀ lɛ wo laa maa lɛɛzu kala‐bogi nii zu. Ƃɔvɛlaale wa ƃɔ na ŋada ɣila faa vagɔ lei wa ɣɛ kɛɛzu, kɛ̀ to mu nii yowũai towaa wo kɛɛzu.

¹⁸Mamaa wũgi pa, gè mɛniga ga wa ɣaa kpɔ na ga velei wo la ga Gala pɛlɛ wu nu ƃulu, gaa‐wɛɛ ʋaa ɣa ɣɛ wo zaama. Tɔwɔ gà ta ziɣizu ga gaama.

¹⁹Toku ge zei ga kɛni nɔ gaa‐wɛɛ ʋaa ɣa ɣɛ wo zaama, kɛɛ ʋaa ma niitiɛ te wo zaama ga gaama vea nu te maa ƃɛɛ.

²⁰Wa ɣaa lɛɛ na ba ŋada ɣila, daa‐miigi wa ɣɛ bosu tɔ lei ɔ́ ɣɛ ga de maliɣii na daa‐mii ŋɛni‐miai.

²¹Ƃɔvɛlaale wa ɣɛ na daa‐miigi wosu wo ɣile‐giledai ɣa lo ná luo yíɛ ná dɔ laa‐mii ŋɛni mi. Nà wɔ ka ɣɛɛ na pulu ɣa ɣɛ nui ta ma, ta wɔ ge na sogɛi dɔɔ vɛ.

²²?Pɛlɛ lɛ wo ya ʋaa ve wɔ laa mi bu wɔ dɔɔ ƃoale bu? ?Ƃaa wo ɣaazu wudɛgɛ Gala pɛlɛi maazu wiɛ niitiɛ vɛnɛ ŋɛni ta nɛpɛ gɛ lɛ te ya? Zɛƃɛ ɣa gà bo wiɛ? ?Gè wo laa maa lɛ nii ʋaa ma? Ƃa! Gɛ̀ lɛ kɛɛ!

²³Ƃɔvɛlaale nii gè maa zɔlɔ woga de maliɣii ya towaa gè zee laa wo ya wa ƃalaa. Na ɣa ga nii. Kpidii te wuloni la ga de maliɣii Ziizɛ wɔwɔ wulu wɔɔ, é kpoolo‐ʋɔɔ ziɣini.

²⁴Tei é mama feeni Gala bɛ, é su ɣale‐ɣaleni é ɣɛ tea, “Màlɔtɔi ɣa nii é wo ʋaa ma. A nii ɣɛ dàa ɣigi‐yɛ faa ma wo ɣa.”

²⁵Pele zii ɣilagi nɔ zu é kpoale ŋɛnii ziɣini ƃalaa pɛ, tei sa daa‐mii fai wuloni ba. É ɣɛni tea, “Nii é kpoale ŋɛnii zu towa é ga deʋe niinɛi màŋamai daa. Siɛ nɛpɛ wa ɣɛ na kpoalezu, a kɛ dàa ɣigi‐yɛ faa ma wo ɣa.”

²⁶Ƃɔvɛlaale siɛ nɛpɛ wa ɣɛ na kpoolo‐ʋɔi nii miizu wiɛ nii ƃoale é kpoale ŋɛnii zu, de maliɣii na saa ʋai ɣa na wa ɣɛ bosu ga woo maa zeezea é yɛsu yíɛ va.

²⁷Na ma nu nɛpɛ ka kpoolo‐ʋɔi nii mii na ɔɔ é nii ƃoale é kpoale ŋɛnii zu ga pelei nii zu vele ɛ́ lɛ zolowoni ga é kɛɛ la, fai yá yɛ manui ma tɔ ga ƃaa‐wulo ʋai bɛ́ de maliɣii lɔtɔi ma ta máŋamai.

²⁸Kɛni nu ɣa wɛlɛ ƃɔɔ ɣavele va ƃɔɔ sɛ‐sɛ ɔ́ teɣa ɣɛ kpoolo‐ʋɔi miizu ɔ́ nii ƃoale é kpoale ŋɛnii zu.

²⁹Nui nɛpɛ yá mi é kpoale ɛ́ lɛ gaa ɣaani ga de maliɣii lɔtɔi ve, manui ɣa ɣɛ faa yɛsu ƃɔɔ ma.

³⁰Na ɣa é kɛɛ wo bɔɔlɔ‐zu zobo balagɛi wiɛ wiɛ zeeƃɛ, na ɣa ɣɛɛ na wo taniga te zaa.

³¹Kɛ̀ ani da wɛlɛ na ƃɔɔ ɣavele va ƃɔɔ sɛ‐sɛ, faa lɛ yɛga de ma.

³²Kɛ̀ de maliɣii ɣa faa vɛɛ na de va towaa ɣɛ de ɣɛɛ‐zɔ kulozu de yee ma kɛɛ ʋaa ma de mɛ lɛ vɛɛ zui va faa ɔ́ yɛ de ma gáazu.

³³Na ma, nà numaa, wa ɣaa kpɔ na ŋada ɣila ga wo laa mi, a wiɛ ɣiini maa kpowũ.

³⁴Ani pulu ɣa ɣɛ na wo ta nɛpɛ ma, pagɛ é laa mi wɔ pɛlɛ wu, wo mɛ lɛ yɛ su wɔ ɣɛ ɣaa lɛɛzu ba ŋada ɣila ga faa yɛ wo ma. Gà vaa na, gà deʋe lɛ ga wiɛ é vile fai zɔitiɛ va.