Read Loma 1KƆLĨITIƐ 14 Bible Online

1KƆLĨITIƐ 14 - Loma bible

1KƆLĨITIƐ 14

¹A wõila ziɣi ga ŋɛnii wo maa vele ɣaa ziɛzu, faa‐nɛi nii kuloai Gala baa ŋinɛgi ya nà wõi wɔɔlɔ wo ma ga ƃɔɔƃɔɔ su, nii é ga Gala daa woo‐wogai nà ná dɔ vele ƃɔɔƃɔɔ ma.

²Ƃɔvɛlaale nui yá woo laali‐taaliga wo ɛ́ lɛ ɣɛɛ ƃɔɛzu nu ƃuse wɔ, kɛ̀ Gala ka yá ɣɛ ƃɔɛzu pɔ́. Toku ge zei ga nu ta nɛpɛ gɛ lɛ ɣɛɛ dáa woi ɣaa ɣaazu. Gala baa ŋinɛgi ɣa kɛ yíɛ fai nii wo nu ƃuse lɛ gaa ɣaa.

³Yá lii na ga pelei zɔi zu vele, nui nii yá ɣɛ Gala daa woo wosu towaa ɣɛ ƃɔɛzu numaa wɔ ta ŋeteai lii ʋaa ma ga na yee luo vele ta te yii‐lɔɔ ʋaa é vɛɛ te ɣaa‐nɛkpɛ faa va.

⁴Nui nii yá ɣɛ woo laali‐taali bosu, manui ɣa ɣɛ kɛɛzu kpɔɔ wulo‐nu‐ma ʋaa ma. Kɛ̀ nui nii yá ɣɛ Gala daa woo wosu manui ɣa ɣɛ kɛɛzu Gala pɛlɛi na kulo‐nu‐ma ʋaa ma.

⁵To mu gè wõini wo pɛ wo woo laali‐taaliga wo. Kɛ̀ nii ƃɔɔƃɔɔgi gè wõini wo kɛ tɔ ga wo Gala daa woo wo. Nui nii yá Gala daa woo wo manui maʋaa wɔɔlɔvɛ é leve nui nii va yá woo laali‐taaliga wo. Kɛni kilaa ani nu ta ɣa ɣɛ na na yíɛ woo laali‐taaligitiɛ zu‐wulo‐zuvɛ lɛ, kɛɛ ʋaa ma Gala pɛlɛi maʋaa li tuo ma.

⁶Nà numaa, ani gà vaa na wo wɔ gìɛ woo laali‐taali bo wiɛ, gà leve ɣɛ le wo wulo ná nu ma ani gɛ̀ lɛ ɣɛ vaani ga fai nii kuloai kɛnɛ ma ɔɔ gɛ̀ lɛ ɣɛ vaani ga kele‐ɣele wo wɔ ɔɔ Gala daa woo ɔɔ kala‐bo?

⁷Gãi ŋɛnii niitiɛ ƃalaa te maʋulu lɛ te zu — è ɣɛ velei koole la ɔɔ kwɛni — ani te woo lɛ ɣɛ ƃɔɔ wuloni su leelaa nu ɔ́ mɛni, nu ta nɛpɛ ka kwɛ̃ɛ ɣɛ le ga ŋɛnii nii te gãiga ɔɔ nii te fɛɛ?

⁸Na ɣa wulo na su ani kɔɔ wui woo‐wulo‐ba lɛ ɣɛni ma leelaa, ƃɛ ɣa a ɣavele ƃɛtɛ kɔɔ‐wɔɔ ʋaa ma?

⁹Vele nɔ na é la ga wiɛ. Ani wa faa ta wo na mawulo‐ba lɛ ba, nu ɣa leve ɣɛ le é kwɛ̃ɛ ga nii wo boga? Ƃɔvɛlaale wa ɣɛ nɔ ƃɔɛzu fãga vɛ.

¹⁰Zii woo laali‐taali tamavɛ ŋetea ga gaama. Kɛ̀ tɔwɔ te ta nɛpɛ gɛ lɛ na su‐wulo‐zu ɔ́ ƃe ɣɛɛzu ba.

¹¹Kɛ̀ ani gɛ̀ lɛ ŋɛni zii woo mɛnisu, nui yá ɣɛ mazii woi wosu gà ɣɛ ga koza nu máʋaa ma, tɔ wɔ é màʋaa ma ga koza nu.

¹²Vele nɔ na é la ga wiɛ. Tei wo ná maa‐wõi‐wõi kulozu ga Gala baa ŋinɛgi é zobo kɛ wo vɛ, zobogi nii yá ɣɛ wo vɛ ga wo Gala pɛlɛi maʋaa lɛ ga tuo vele a ɣaa ƃaa wo wɔɔlɔ na maʋaa zu.

¹³Na ma nui nii yá ɣɛ woo laali‐taaliga wosu, pagɛ manui Gala feli ga gaa‐ƃaa ɣɛ zéea yíɛ su‐wulo‐zu lɛ.

¹⁴Ƃɔvɛlaale ani gà Gala feli na woo laali‐taali su, gà ɣɛ Gala felizu ɣigi zu kɛ̀ nà kele‐ɣelegi malɔnɔ lɛ ɣɛɛ ba.

¹⁵Zɛƃɛi pagɛi gè kɛ? Gà Gala feli ɣigi zu gè Gala feli kɔnɔ ga nà kele‐ɣelegi. Gà Gala maa wui nà ki‐gaa‐ziɛi zu gè maa wui kɔnɔ ga nà kele‐ɣelegi.

¹⁶Su‐wulo‐zu ɣa ga ani yà ɣɛ na mama feezu Gala bɛ yà ɣi‐gaa‐ziɛi zu, nui nɛpɛ lɛ vɛɛni wo va, towaa leve ɣɛ le é ɣɛ tea, “É ɣɛ ŋɛ na” yà mama‐fee ʋai ma, tɔwɔ nii è bosu ɛ́ lɛ kwɛ̃ni?

¹⁷Ɣee ta yà ɣɛ mama feezu Gala bɛ ga pagɔ ƃɔɔ ga kulo‐ɣɛɛ‐woga, kɛ̀ nii yà ɣɛ bosu ɛ́ lɛ ɣɛɛ ga nui zɔi na kulo‐nu‐ma ʋaa.

¹⁸Gala mama ga tei gà woo laali‐taaliga wo é leve wo pɛ ba.

¹⁹Na pɛ ge ɣɛɛvɛ, gà woo looluo wo na Gala pɛlɛi wu ga nà kele‐ɣelegi kɛɛ ʋaa ma gè numai zɔitiɛ ɣala bo, nà ʋize wogɛ é leve woo wulu puugɔ va woo laali‐taaliga zu.

²⁰Nà numaa, a mɛ lɛ ɣɛ ga lopaa wa ʋaa‐ɣaa‐ɣai zu. A ɣɛ ga duuyɛ̃ga faa‐yowũ‐ɣɛɛ zu, kɛ̀ a ɣɛ ga nui pɔlɔi faa‐ɣaa‐ɣai zu.

²¹Ponɛvɛ tɔgi zu Gala kɔlɔi ʋaa va de maliɣii yìɛ ɣɛ tea, “Taitiɛ te laa zii woi numai niitiɛ ma ga wɛ̃ɛ te ga zii ƃalaaga ta ɣa gà woo wu te la te bo numai niitiɛ ma. Na ƃalaa ɣɛɛvɛ tɛ lɛ wui toga gòo ma.”

²²Nii mavele ma woo laali‐taali‐bogai ɣa ga fai yá ɣɛ ga seele niitiɛ ʋaa ma tɛ lɛ dɛ Kolai ʋaa ziɣini ga gaama. Kɛ̀ ɛ́ lɛ niitiɛ ʋaa ma te maʋaa ziɣia ga gaama. Tɔwɔ Gala daa woo‐wogai lɛ numai niitiɛ ʋaa ma tɛ lɛ Kolai ʋaa ziɣini ga gaama. Kɛ̀ tɔ niitiɛ ʋaa ma te siɣia ga gaama.

²³Na ma ani Gala pɛlɛ wu veaitiɛ ɣaazɔ ta ɣaa lɛɛ na ba tiɛ woo laali‐taaliga wo é yɛsu nui niitiɛ tɛ lɛ vɛɛni te va ɔɔ niitiɛ tɛ dɛ Kolai ʋaa ziɣini ga gaama te va na, kɛ̀bɛ ta bo ga numai niitiɛ te ɣigi lɛ te woba, kɛlɛɛ?

²⁴Kɛ̀ ani nu pɛ ka ɣɛ na Gala daa woo wosu é yɛsu nui nii lɛ dɛ Kolai ʋaa ziɣini ga gaama ɔɔ nui nii lɛ vɛɛni te va é va na, te pɛ ta ɣɛ ga zaƃu manui loo ga ná faa yowũi ɣalama laa. Te pɛ ta kɛ é ƃɔɔ ziɣi ga nui faa yɛgɛi ma.

²⁵Manui ɣigi zu loowu ʋaitiɛ te maazu ɣa sa a ziɣi. Tɔwɔ tɔ sa a vile ŋibia é Gala feli yíɛ bo ga Gala ka wo zaama ga ƃɔɔƃɔɔ su.

²⁶Nà numaa, zɛƃɛ mu ka sa wa kɛ? Wa ƃɔ na ŋada ɣila, Gala daa‐maa‐lɛɛ wui ɣa ɣɛ wo ɣile‐giledai ya ta faa ta ga é numaa ɣala bo da é vɛɛ faa‐wulo ʋaa va kɛnɛ ma ta woo laali‐taali‐boga ɔɔ woo laali‐taali su‐wulo‐zu‐lɛɛ ʋaa. Pagɛ fai pɛ ge ɣɛ nɔ wo maʋaa lii ʋaa ma ga yee luo vele.

²⁷Ani nu ta nɛpɛ ka ɣɛ na é woo laali‐taali bo, ƃe ba te ɣɛ nɔ ga nu felegɔ ɔɔ mawɛ̃ɛ pele ma ɣɛ ga saagɔ. Na ɣa ɣɛɛ na tiɛ kulo gá ga gile‐gile. Pagɛ wɔnɔ nu ta ɣɛ na yíɛ malaa‐woo‐leve bo.

²⁸Kɛ̀ ani nu lɛ na ɔ́ daa‐woo‐levegi wo, maa nɛɛvɛ te ɣile‐giledai te na ɣɛ ƃu Gala pɛlɛi wu tiɛ bo nɔ Gala ma ga wuu zu vele.

²⁹Maa nɛɛvɛ Gala daa woo‐wo bea felegɔ ɔɔ saagɔ ƃɔɛ nɔ, na ɣa ɣɛɛ na mataitiɛ te wɛlɛ te woi zu va ƃɔɔ sɛ‐sɛ.

³⁰Ani faa ta ɣa wulo na kɛnɛ ma zɔitiɛ te zeini na woba te ta ɣaazu, pagɛ nu maa wũgi é ƃɔɛzu é na ɣɛ ƃu.

³¹Ƃɔvɛlaale wo pɛ wa Gala daa woo‐wogai wulo gá ga gile‐gile, kɛɛ ʋaa ma nu pɛ ge faa maa woli, na ɣa ɣɛɛ na nu pɛ zii lɔ.

³²Nui Gala daa woo‐wo fai mazooda bɛ́, pagɛ é ɣɛ ga nui yá zu zo Gala daa woi‐woga ma.

³³Gala gɛ lɛ ga Galagi nii yá va ga zaa‐zaa faa ŋada, kɛ̀ tɔ ga goo‐la‐ma Ɣala. È ɣɛ velei é la Gala na dɔ numaitiɛ ta dɔ Ɣala pɛlɛitiɛ ɣaazɔ wu,

³⁴pagɛ ŋazaitiɛ te na ɣɛ ƃu Gala pɛlɛitiɛ wu. Ƃɔvɛlaale gaa‐ƃaa lɛ ʋeeni te ya ga te ƃɔɛ, kɛ̀ pagɛ te loo zinaitiɛ wu è ɣɛ velei ʋɔlɔ ƃalaa tɔgi bosu la.

³⁵Ani faa ta nɛpɛ ka ɣɛ na na kwɛ̃ɛ wõi wɔɔlɔi te ɣigi zu, pagɛ te te zinigitiɛ ɣaa‐zaɣa kɛ wɔ pɛlɛ wu. Toku ge zei ga tɔ ga wũfe faa ga ŋaza nu ƃɔɛ Gala pɛlɛ wu.

³⁶?Wa ɣa faa ve Gala goi maʋaa lɔɔ zeiya wo va? ?Ƃaa wa ɣilekpu nɔ ɣa é ziitia wo ma?

³⁷Ani nu ta nɛpɛ ka ɣi gaa ziɛ na ga tɔ ga Gala daa woo‐wo nu ɔɔ tɔ ga nui Gala baa ŋinɛgi zii zu, pagɛ é ʋa bu ga fai nii gè ponɛzu wo wɔ tɔ ga fai de maliɣii deʋea é da zèea.

³⁸Ani nu ta nɛpɛ gɛ lɛ ɣɛni yee zeini nii wu, Gala gɛ lɛ yee zeiya bu.

³⁹Na ma, nà numaa, a Gala daa woo‐wogai mawõi leve ƃɔɔ ma ga gaama. Na ɣa ɣɛɛ na a mɛ lɛ nu ta ƃe teve woo laali‐taali‐boga va.

⁴⁰Kɛ̀ pagɛ fai pɛ ge ɣɛ ga ná maa ziɣia te la pele ma.