Read Loma 1KƆLĨITIƐ 16 Bible Online

1KƆLĨITIƐ 16 - Loma bible

1KƆLĨITIƐ 16

¹Tɔwɔ a lii na ga ŋɛni‐ɣaa‐lɛ‐ba ʋai wɔɔ laa vele Gala na dɔ numaitiɛ ʋaa ma, velei gè Galeesia yui zu Ɣala pɛlɛitiɛ leʋea la ga te kɛ, a kɛ ŋɛ ni wa ƃalaa.

²Folo maa wũgi dɔwɔ nɛpɛ su pagɛ wo ɣile‐giledai wiɛ ŋɛni ta wulo su ga tee wiɛ daa‐zu ɣɛ, è ɣɛ velei nɔ ŋetea ɣa nɛɛ la manui ma, kɛɛ ʋaa ma gà vaa na ŋɛni‐ɣaa‐kpɔ faa mɛ lɛ ɣɛ wo va ga niinɛ.

³Gà vaa na, numaitiɛ wa te wulo gà kɔlɔ ʋe te ya gè te leve ga te li ga wa zaba ŋɛniitiɛ Yɛlusulɛɛ.

⁴Ani towaa wulo na ga solowo faa ga maa nɛɛvɛ gè li, ta vɛɛ bà gá tiɛni gé li.

⁵Gà leve na Masadoonia yui zu, gà va gè laali wo ma, ƃɔvɛ‐laale gè kpɛtɛɛ ga gè leve Masadoonia yui zu.

⁶Ɣee ta a da wani da yɛ wo wɔ vɛ ɔɔ ɣee ta gà yɛ ƃalaa wo wɔ vɛ é yɛsu kɔɔlɛ ziɛgi leve, kɛɛ ʋaa ma wo tève vɛ vele nɛpɛ sa gà ɣɛ liizu la nà siɛi ma.

⁷Toku ge zei ga gɛ̀ lɛ nɔ wõini gɔ̀ ɣɛ levesu wɔwɔ zu gɔ̀ wo vɛtɛ. Kì ka ba ga gè kuu fele kulo wo wɔwɔ ma, ani de maliɣii ɣa ʋaa na bu.

⁸Kɛ̀ gà yɛ Ɛfɛsɔ lai zu é yɛsu Pɛ̃tɛkɔ wuu‐ɣaa ʋoloi ziiti.

⁹Ƃɔvɛlaale pele laa laoga tùo ƃɔɔ gbalão ga gè tɔnɔ‐ba lii ɣɛ. Tɔwɔ taitiɛ te losu dà te lamagɛ.

¹⁰Temete ɣa vaa na, a wɛlɛ na va ga duo‐luo ge mɛ lɛ ɣɛ kɔlɔ ga wo zaama. Ƃɔvɛlaale tɔ de maliɣii na tii ɣɛɛzu è ɣɛ velei nɔ gè kɛɛzu la.

¹¹Na ma nu ta ɣaazu mɛ lɛ wudɛ máazu. Wa teve zii‐laa zu kɛɛ ʋaa ma é va wulu pɔ̀ vɛ. Toku ge zei ga gàazu ɣa túo é vɛɛ de vaitiɛ va.

¹²A de wɔi Apɔɔla na dɛi, gè tɛnɛni ga kpaanaga ga é va é laali wo ma é vɛɛ de vai zɔitiɛ va. Kɛ̀ ɛ́ lɛ ga zíi‐ma ga é va nɔ ŋɛ ni. A kavele ɣaa na towaa va.

¹³A ɣɛ ɣi su. A lo kpãa wa yee‐la‐mai zu, wo ɣɛ ga zii‐lɔɔ vea wo zu ƃaa.

¹⁴Niitiɛ ɣaazɔ wa ɣɛ te ɣɛɛzu a ƃe ba te ɣɛ wõilai zu.

¹⁵Nà numaa, wo kwɛ̃ni ga Setiifana wɔ pɛlɛ wu veaitiɛ ɣa te ɣɛ ga nu maa wũ te Kolai ʋaa ziɣi ga gaama Akeea yui zu. Tɔwɔ te wũ kpadogɛ tii‐ɣɛɛ va Gala na dɔ numaitiɛ vɛ.

¹⁶Gà wo lɛnɛsu ga wo ɣɛ na ɣavele veaitiɛ yee wu ta de vaa lii‐ɣɛɛ veaitiɛ ta nɛpɛ é vɛɛ malii ƃaa‐ƃaa‐kɛɛ vea va.

¹⁷Gà kuu‐zu‐nɛɛ wulozu Setiifana vaa ʋai ma ta Fɔtunatɔ é vɛɛ Akeeyikɔ va. Ƃɔvɛlaale nii wɔ ɣɛ na wo kɛ ta ɣɛ te na ɣɛɛ.

¹⁸Te kɛɛ gè ʋi daa wulo nà ki‐gaa‐ziɛi zu. Vele nɔ na ƃalaa te kɛɛ la ga wiɛ. A de yee zei na ɣavele veaitiɛ wu.

¹⁹Gala pɛlɛitiɛ te Eezia yui zu te wo luoni. Akuila ƃɔga Peleseka é vɛɛ sa nu ƃulugi nii va a li Gala pɛlɛ wu ta vɛlɛi wu te wo luoni ƃɔɔ kɛlɛ‐kɛlɛ wo ɣɛɛ vele ma su ɣilekpu wa de maliɣiini.

²⁰De vaitiɛ ɣaazɔ te wo luoni. A wiɛ ɣiini tuo ga ná maa wua.

²¹Nài gè ga Pɔɔ, nà ɣa gè tuo woi nii wonɛzu ga ƃɔɔ yee.

²²Nui nɛpɛ wõila lɛ zéea de maliɣii ʋaa ma, maa nɛɛvɛ koto loo manui vɛ. Yài è ga gé maliɣii, va!

²³De maliɣii Ziizɛ na maa‐wõi‐ɣaa ƃɔ‐bai ɣa wo ga wiɛ fãa.

²⁴De ɣɛɛ vele ma su ɣilekpu da Ziizɛ Kolaini, nà wõilai ɣa ɣɛ wo ya fãa.