Read Loma 1KƆLĨITIƐ 2 Bible Online

1KƆLĨITIƐ 2 - Loma bible

1KƆLĨITIƐ 2

¹Nà numaa, tei gè vaani wo wɔ vɛ, gɛ̀ lɛ vaani ga gè fai nii wo ná bidiai gala maʋaa va kɛɛ ʋaa ma woi na é dɛ̀ ga nui nii daa ɣa ʋa ɔɔ nii kele‐ɣelegɛi.

²Ƃɔvɛlaale gè deʋeni ga gè mɛ lɛ yee vili faa ta nɛpɛ kwɛ̃ɛ faa zu wo zaama é wulo Ziizɛ Kolai maʋai wulu, na ɣa ga gè kwɛ̃ɛ nɔ ga nui kpakogɛi.

³Tɔwɔ gè ɣɛni wo woba zobo balagɛi bɛ̀ gìɛ luo gìɛ ƃeli.

⁴Woitiɛ gè ɣɛni te wosu, na ɣa ga nà keela woitiɛ, tɛ lɛ ŋɛni ga kele‐ɣele goo gɔ̀ ɣɛ bosu ga gè kɛ numaa te yee zei bu ga kuu zu nɛɛ. Kɛ̀ gè ƃeni ba Gala baa ŋinɛgi ƃɔga ná gaa‐ƃai te dɛ ga tɔ ga gaama,

⁵kɛɛ ʋaa ma wo yee mɛ lɛ la nu ƃuse na kele‐ɣele ma, kɛ̀ to mu wo yee ɣɛ Gala na gaa‐ƃai ma.

⁶Na ƃalaa ɣɛɛvɛ niitiɛ sa te ziitiai na, a da kele‐ɣelegi ta lɛ ga natiɛ. To mu ɛ́ lɛ ga siɛgi nii zu ɣele‐ɣelegi ɔɔ nii zu maazu‐ʋaa‐wo‐bo beaitiɛ ta ɣele‐ɣele. Na ɣa ga niitiɛ te maʋaa vaazu ƃeazu gá.

⁷Kɛ̀ a da Gala na kele‐ɣelegi nii lɛ maa loowugɛi nu lɛ pɛtɛsu. Na ɣa ga nii Gala ge ná yɛga wɔlɔ ná luo é deʋe saala‐la ʋaa ma a de ma.

⁸Ŋeteai nii zu maazu‐ʋaa‐wo‐bo beaitiɛ te ta nɛpɛ gɛ lɛ nii ɣaa ɣaani. Toku ge zei ga è ɣɛ te gaa ɣaani, nui é ga saala‐malai maliɣi tɛ lɛ ƃega na ƃako gulu ma.

⁹Kɛ̀ è ɣɛ velei ponɛi la mawoi ga “Nii Gala ge maʋaa ɣavele ƃɛtɛɛ numai niitiɛ ʋaa ma te wõini, na ɣa ga nii nu ta nɛpɛ gɛ lɛ dɛ ɣaazu laani ma ɔɔ maʋaa loo nu ta nɛpɛ gui zu ɔ́ nɔ ɣɛ ga é loo nu ta nɛpɛ ki su,”

¹⁰towa Gala ge maʋaa wuloa kɛnɛ ma de ɣaazu baa ŋinɛgi zaala zu. Ƃɔvɛlaale Gala baa ŋinɛgi ɣa ŋɛni pɛ maʋaa wɔwɔ wo kulo su, niitiɛ ƃalaa te maʋaa zuwuai Gala maʋaa va.

¹¹Nu zɛƃɛ ɣa ɣá nu ɣigi zu ʋaa wɛ̃ɛ é wulo nu tɔ ƃɔɔ ná ki‐gaa‐ziɛi wulu yá ɣɛ kígi zu? Vele nɔ na é la ga Gala maʋai. Nu ta nɛpɛ gɛ lɛ Gala na ki‐gaa‐ziɛi ɣaa ɣaa é wulo Gala baa ŋinɛgi wulu.

¹²Tɔwɔ ŋeteai nii zu ɣi‐gaa‐ziɛ lei dɔ maa zɔlɔ wo. Kɛ̀ Gala baa ŋinɛgi kuloai Gala pɔ vɛ tɔ ɣa de maa zɔlɔ woga, kɛɛ ʋaa ma faa‐nɛitiɛ kɛ́i de vɛ Gala bɛ de te maʋaa ɣaa ɣa.

¹³A da fai nii wo laa woo zu. Kɛ̀ dɛ lɛ numaa ɣala bosu la ga nu ƃuse na kele‐ɣele goo. Da te ɣala bosu ga woi nii Gala baa ŋinɛgi dɛɛzu ga giɛ, diɛ gaama Ɣala fai ɣavele zu wulo numai niitiɛ ma Gala baa ŋinɛgi te yii zu.

¹⁴Nui Gala baa ŋinɛgi lɛ zii zu ɛ́ lɛ Gala baa ŋinɛgi na faa‐nɛitiɛ maa zɔlɔ woga, ƃɔvɛlaale ta ɣɛ gáazu ga titi faa. Na ɣa ɣɛɛ na ɛ́ lɛ zooga ɔ́ te ɣaa ɣa, ƃɔvɛlaale nui nii nɔ Gala baa ŋinɛgi zii zu tɔ ɣa kavele ƃɛtɛi ga é te maʋaa ɣaa ɣa.

¹⁵Nui Gala baa ŋinɛgi zíi zu towaa ŋɛni ɣaazɔ maa lɔ̃ya wo. Kɛ̀ nu nɛpɛ gɛ lɛ tɔ ƃɔwɔi maa lɔ̃ya woga.

¹⁶“Toku ge zei ga ƃɛ ɣa é de maliɣii wuu zu ʋaa wɛ̃ɛga ga é tɛnɛ?” Tɔwɔ fai nɔ é Kolai wuu zu towaa é de wuu zu.