Read Loma 1KƆLĨITIƐ 7 Bible Online

1KƆLĨITIƐ 7 - Loma bible

1KƆLĨITIƐ 7

¹Nii gè vaazu ponɛzu pilegɛ kɔlɔi va wo ponɛni pɔ̀. Na ɣa ga tɔ ga faa vagɔ ga zunu mɛ lɛ yee vili ŋaza nu ʋaa zu.

²Kɛ̀ tɛ‐gai yá wo ga nu ga é wɛ̃ɛ‐ziɛ bo mazaƃui ma, pagɛ zunu ɣile‐giledai ƃɔɔ ŋaza ɣɛ zéea, ŋaza nu ɣile‐giledai ƃɔɔ zini ge ɣɛ ma.

³Nii é ga zunui vaa ʋaa ga yíɛ kɛ ŋazai vɛ, pagɛ yíɛ na ɣɛ. Pagɛ ŋaza nui ƃalaa yìɛ daamɔdai ɣɛ sinigi ʋaa ma.

⁴Ŋaza nui lɔtɔi ʋaa lɛ kpɔɔ la, kɛ̀ sinigi ɣa maʋaa dá. Vele nɔ na é la ga zunui. Dɔtɔi ʋaa lɛ kpɔɔ la, ŋazai ɣa maʋai dá.

⁵Yài è ga ŋaza keea nui wa è ŋazai, a mɛ lɛ yee wulo ɣiini bu ŋii‐pɛlɛ‐wu ʋaa ma, kɛni kilaa ani wa zei ma siɛ ta ʋaa ma ga wo ƃe teve na ɣɛɛ va kɛɛ ʋaa ma wo wũ kpado Gala‐felia va. Kɛ̀ na wɔ ka ɣɛɛ na, a ɣɛ wɔnɔ ma, kɛɛ ʋaa ma Seeta mɛ lɛ va wo lɛɛzu ga, tei tɔwɔ wɛ lɛ zooga wɔ ƃɔɔ zu zo ma fai nii zu.

⁶Gà nii wosu nɔ ga velei gè wo maʋai wɛ̃ni la ŋaza nu ʋai zu. Kɛ̀ gɛ̀ lɛ daazu wo ya ga tɔ ga kɛni wa ŋaza nu yeke kɛ.

⁷È ɣɛ kpa nu pɛ ge ɣɛni ga kàvele. Kɛ̀ nu ɣile‐giledai zooda ʋaa wulovɛ Gala zeea é ɣɛ bɛ́ ga faa‐nɛɛ, nui zɔi ná dɔ zoodai ɣa ɣɛ ga mazii ta ƃɔnɔ, zɔi wɔ ge ɣɛ wɔnɔ ga ta ƃɔnɔ.

⁸Gà bosu kaƃawɔitiɛ ma ta tabologitiɛ é vɛɛ po ŋazai niitiɛ va zini gɛ lɛ te vɛ ga towaa ɣɛ ga faa vagɔ te yɛ kaƃawɔlai zu ta tabolodai è ɣɛ velei gè la ga kaƃawɔi.

⁹Kɛ̀ ani tɛ lɛ zooga tɔ ƃɔɔ zu zo ŋaza nu ʋai ma, pagɛ te ŋaza zei, ŋazaitiɛ wɔ te zini sei. Toku ge zei ga ŋaza‐wuloa ƃɔga zini‐seiya te ʋizɛ wogɛ nu yii ɣɛɛ va ŋabu ɣa ŋaza‐wõi‐leve‐ma vɛ ta zunu‐wõi‐leve‐ma.

¹⁰Gà deʋei nii laazu ŋaza kɛɛ vea vɛ ta zini‐bɛ vea. Nà lei gɔ̀ ɣɛ daazu te ya ga tɔ, kɛ̀ de maliɣii ve. Na ɣa ga maa lɛ nɛɛni ŋaza nu ɔ́ wulo sinigi ya.

¹¹Kɛ̀ ani ŋaza nu ta ɣa kɛɛ na, maa nɛɛvɛ é yɛ tabolodai zu, na laale ta sinigi te yɔɔzu ƃɛtɛ. Na ɣa ɣɛɛ na nui é ga ŋaza keea nui é mɛ lɛ ɣɛlɛ ŋazai va.

¹²De maliɣii laale. Nà ɣa gè nii wosu nui matai zɔitiɛ ma. Na ɣa ga ani de wɔi ta nɛpɛ ŋaza ɣa zéea maŋaza nui wɔ gɛ lɛ Kolai ʋaa ziɣini ga gaama, tɔwɔ é ʋa bu ga é ɣɛ de wɔi ya, maa lɛ nɛɛni de wɔi na ɔ́ ɣɛlɛ ba.

¹³Ani zini ka ŋaza nu ta nɛpɛ bɛ, mazinigi wɔ gɛ lɛ Kolai ʋaa ziɣini ga gaama, tɔwɔ fái bu ga é sei ga ŋaza, maa lɛ nɛɛni ŋaza nui é wulo zéea.

¹⁴Ƃɔvɛlaale ŋaza keea nui nii ɛ́ lɛ Kolai ʋaa ziɣini ga gaama, towaa wulo su ga tee ga Gala na dɔ ŋazai zaala zu. Na ɣa ɣɛɛ na zini‐bɛ ŋaza nui nii ɛ́ lɛ Kolai ʋaa ziɣini ga gaama, towaa wulo su ga tee ga Gala na dɔ Kolai maa nui nii zaala zu é ga sinigi. Ɔ́ ƃe na ɣɛɛzu ga na, wo leaitiɛ maa lɛ ƃega wuo. Kɛ̀ te maa wuovɛ nii mavelei ma.

¹⁵Kɛ̀ ani nui nii ɛ́ lɛ Kolai ʋaa ziɣini ga gaama towaa ɣɛ na wõi ɣɛɛzu ga te ɣaa wɛɛ, ƃe ba é ɣɛ ŋɛ na. A ɣɛ na ga na mazii ɣavele, de wɔi ɔɔ de maŋaza nui na yee laa ɣa ʋũi. Ƃɔvɛlaale Gala ge wo liliga ga zii‐laa ɣɛ wo ya.

¹⁶Yài è ga zini‐bɛ nui, yà kwɛ̃ ɣɛ le ga ani yà è zinigi valo ƃaa ɛ̀ lɛ baloa? Yài wɔnɔ è ga ŋaza keea nui, yà kwɛ̃ ɣɛ le ga ani yà è ŋazai valo ƃaa ɛ̀ lɛ baloa?

¹⁷Nii nɔ é su tɔ ga nu ɣile‐giledai ŋeteai ɣɛ è ɣɛ velei nɔ de maliɣii deʋea la é da manui ya, é wɔnɔ ga ŋeteai nii é yɛga kɛɛzu Gala gɔ vɛɛ tilisu. Nii ɣa gè deʋea gè da Gala pɛlɛitiɛ ɣaazɔ wu.

¹⁸?Wo ta nɛpɛ ka na seiyai ɣɛ kpoto ma tiligi ɔ́ vɛɛ wosu ga manui? Ani na ɣɛɛvɛ, manui mɛ lɛ mu pele ɣaa ziɛ ga é ƃɔɔ wulo sei‐kpoto‐malai zu. ?Wo ta nɛpɛ ka na ɛ́ lɛ ŋɛni zeini kpoto ma tiligi yìɛ wo da? Ani na ɣɛɛvɛ, manui mɛ lɛ mu ɣaa ƃaa ga é sei‐kpoto‐malai maa vele ɣaa ziɛ.

¹⁹Ƃɔvɛlaale sei‐kpoto‐ma ʋaa pɛ‐oo, sei‐kpoto‐ma lala ʋaa pɛ‐oo, te ta lɛ ga faa maa nɛɛ ta nɛpɛ, kɛni nɔ nu ziɛ ʋai ga Gala na tɔgitiɛ.

²⁰Pagɛ nui pɛ ge yɛ togi nii zu te ɣɛni su Gala giɛ tiligi wo ga tiɛ.

²¹?È ɣɛni ga duo tiligi yìɛ wo ga yìɛ? Ani kavele ɣa na, mɛ lɛ ɣi gaa ziɛ na ma. Kɛ̀ ani yà ya wɔɔlɔlai maa zɔlɔ wo na, yee zei nɔ na wu.

²²Ƃɔvɛlaale nui nii é yɛni duolai zu tiligi wo da te ɣɛɛ vele ma su ɣilekpu ta de maliɣii, manui ɣa ga de maliɣii na wɔɔlɔ. Pele zii ɣilagi nɔ zu, nui nii é yɛni wɔɔlɔlai zu tiligi wo da, manui ɣa ga Kolai na duo.

²³Wo ɣeeavɛ ga tɔnɔ‐ba ŋɛni. A mɛ lɛ ɣɛ ga nu ƃusea ta luo.

²⁴Nii mavelei ma, nà numaa, togi nɛpɛ nu ɣile‐giledai yɛga su tiligi yìɛ wo ga tiɛ maa nɛɛvɛ te yɛ ŋɛ na Gala zeea.

²⁵A lii na ga tabolodai wɔɔ laa vele, de maliɣii lɛ na maleʋe laani zèea. Kɛ̀ gà nii wosu ga nà dɔ ɣi‐gaa‐ziɛi tei tɔwɔ kulo‐ɣɛɛ wogɛi bɛ̀ ga nui nu ɣa laa la de maliɣii na maa‐wõi‐ɣai zaala zu.

²⁶Kìgi zu faa ƃoei é zɛlɛni de wũ maazu mazaƃui ma, pagɛ nu maʋaa ma ga é yɛ nɔ ga velei é la.

²⁷?Ŋaza ɣa è yee ma? Ani na ɣɛɛvɛ mɛ lɛ mu pele ɣaa ziɛ ga è kulo yee ma.? Ŋaza lɛ è yee ma? Ani na ɣɛɛvɛ mɛ lɛ mu pele ɣaa ziɛ ga è ŋaza wulo.

²⁸Kɛ̀ ani nu ɣa ŋaza wulo na, ɛ́ lɛ ga faa yowũ‐ɣɛɛ. Ani wɔnɔ ŋaza nu ɣa zini sei na, ɛ́ lɛ faa yowũ ɣɛɛni. Na ƃalaa ɣɛɛvɛ taitiɛ ta ŋaza wulo ta niitiɛ ta zini sei, ŋeteai nii zu ʋaa ƃoei ɣa ziiti te ma. Tɔwɔ ɔ́ ɣɛ ga zìi‐ma ʋai ga nà wudɛ wo wũ maazu.

²⁹Nà numaa, nii gè bosu tɔ ga kui é nu ƃuse ya ŋeteai nii ʋaa ma su ƃua. É ziɣi sa zaa ma é li ga tuo, maa nɛɛvɛ taitiɛ ŋaza te ya tiɛ luo è ɣɛ ta lɛ ɣɛ te ya.

³⁰Niitiɛ ta ɣɛ wɔlɔzu tiɛ luo è ɣɛ tɛ lɛ ɣɛ wɔlɔzu. Niitiɛ ta ɣɛ kuu‐zu‐nɛɛ wulozu tiɛ luo è ɣɛ tɛ lɛ ɣɛ wuu zu nɛɛzu. Niitiɛ ta ɣɛ sɔɔlaa ɣeeazu tiɛ luo è ɣɛ sɔɔlaa lɛ ɣɛ te ya.

³¹Niitiɛ wɔnɔ ta ɣɛ ŋeteai nii zu ʋai ma tiɛ luo è ɣɛ ta ʋaa nɛpɛ gɛ lɛ ɣɛ ŋeteai nii maʋaa zu. Ŋeteai nii ƃɛtɛ velei maʋaa ɣa vaazu ƃeazu ga.

³²Gè wõini zii‐zɛlɛ faa ƃea wo va. De maliɣii mayii‐zɛlɛ ka ɣɛ nui nii ma é ga kaƃawɔ. Zii‐zɛlɛ ka ɣɛ ma ga velei yá leve da é de maliɣii yii‐laa ʋaa ɣɛ.

³³Kɛ̀ ŋeteai nii zu ʋaitiɛ ɣa te mayii‐zɛlɛ ka ɣɛ nui nii ma ŋaza zéea. Zii‐zɛlɛ ka ɣɛ ma ga velei yá leve da é ŋazai yii‐laa ʋaa ɣɛ.

³⁴Na wɔ ka ɣɛɛ na sɔƃɛlɛ ɣaa ɣa wɛɛ. Tɔwɔ ŋaza nui nii ɔɔ ŋaza nu lomai nii é ga tabolo, de maliɣii mayii‐zɛlɛ ka ɣɛ ma. Zii‐zɛlɛ ka ɣɛ ma ga velei yá leve da dɔtɔi maa wuo ná ki‐gaa‐ziɛi maa wuo. Kɛ̀ nii é ga zini‐bɛ ŋaza nui, ŋeteai nii zu ʋai ɣa mayii‐zɛlɛ ka ɣɛ ma. Zii‐zɛlɛ ka ɣɛ ma ga velei yá leve da é sinigi yii la.

³⁵Gà nii wosu wa ƃɔɔ wa wulo‐nu‐ma ʋaa ma, ɛ́ lɛ ga gè wo vili kpaɣi su. Kɛ̀ gà bosu kɛɛ ʋaa ma gè gaa‐laa luo vagɔ maʋaa lɔɔ zei wo ya. Na ɣa ɣɛɛ na wa ɣi‐gaa‐ziɛi nii gaa lɛ wɛɛni wo wũ‐kpado faa ma de maliɣii maʋaa va gè na yɛ laani daa‐zu.

³⁶Ani tɔ nu ta nɛpɛ ki su ga manui lɛ pele‐ma luo wosu ta ná tabolo wɛ̃ɛ te yɔɔ‐zuvɛ ʋaa ma, na ɣa ga ani ŋaza nui ƃɔɔ mawõi wala levegɛ ma ga kɛni nɔ é ɣɛ ŋɛ na, nii yá manui yii la ƃe ba é na ɣɛ. Tɔwɔ maa nɛɛvɛ te ɣii wulo. Ɛ́ lɛ ga faa yowũ.

³⁷Kɛ̀ zunui nii yá faa la na ɣigi zu ga é kɛ, faa ta nɛpɛ gɛ lɛ kigi maa ʋeliga, é ga nui yá zu zo yii‐ma ʋaa ma, tɔwɔ deʋeai bɛ́ ɣigi zu ga ta ná tabolo wɛ̃ɛ te yɛ nɔ wɛ̃ɛ ʋaa yãkai zu faa mɛ lɛ wulo te yɔɔzu, manui ɣa ɣɛ kɛɛzu ga pagɔ.

³⁸Nui ta ná tabolo wɛ̃ɛ ta ɣii wulo, manui ɣa kɛ ga pagɔ. Nui nii wɔnɔ yá ƃe ná tabolo wɛ̃ɛ‐wulo ʋaa va, ná dɛi ɣa va ga tamaa.

³⁹Tɔ ga zini‐bɛ nui vaa ʋaa ga é yɛ sinigi ya ani nɔ na ɣa ŋetea. Ani sinigi ɣa zaa na, zée laa ɣa ʋũi ga é zei zunui nii vɛ yá wõi, kɛ̀ pagɛ nɔ é kɛ ga Kolai maa nui ta.

⁴⁰Kɛ̀ nà dɔ ɣigi zu, kuu‐zu‐nɛɛ ɣa ɣɛ manui ya ani yá yɛ na nɔ ŋɛ na ƃɔɔ yee ma. Kigi zu Gala baa ŋinɛgi ɣa zìi zu.