Read Loma 1KƆLĨITIƐ 9 Bible Online

1KƆLĨITIƐ 9 - Loma bible

1KƆLĨITIƐ 9

¹?Zèe laa lɛ ʋũini? ?Gɛ̀ lɛ ga Ziizɛ na keelai ta? ?Gɛ̀ lɛ wɛlɛni de maliɣii Ziizɛ va? ?Tii gè kɛɛ gé ɣɛɛ vele ma su ɣilekpu gá de maliɣii, wa lei wɔ ɣɛ ga su‐lɔnɔi?

²Ani gɛ̀ lɛ zɔitiɛ ɣaazu ga Ziizɛ na keelai ta, wa dɛi gà wo ɣaazu ga ta. Ƃɔvɛlaale wa ɣa wo vɛɛni bà ga po‐kɔ̃ɔgi nii yá dɛ ga velei gè la ga Ziizɛ na keelai ta wo ɣɛɛ vele ma su ɣilekpu wa de maliɣiini.

³Nii ɣa é ga nà goo‐zu‐wulo‐kɛi numaitiɛ ya te wõini te wɛlɛ màʋai zu va ƃɔɔ sɛ‐sɛ.

⁴?Ɛ́ lɛ ga gá woo gaama ʋaa ga daa‐mii ŋɛni ɣɛ gé ʋaa ma ta kpoale ŋɛni?

⁵?Ɛ́ lɛ ga gá woo gaama ʋaa ga gé ŋaza zei é gé wulu, è ɣɛ velei Ziizɛ na keelai zɔitiɛ ta kɛɛ la é vɛɛ de maliɣii deɣeitiɛ va ta Siifɛni?

⁶?Ɔɔ gá Banaba nɔ ɣa ɛ́ lɛ ga gá woo gaama ʋaa ga gé ƃe teve tii‐ɣɛɛ ʋaa va ŋetea‐ɣɛɛ ʋaa ma gé vɛ?

⁷Ƃɛ ɣa a ɣɛ sɔdasi lii ɣɛɛzu tɔ ɣagi maŋɛni ɣaazɔ‐wɛɛ ʋai ba? Ƃɛ ɣa a ŋasa zei gaa‐vaa ta mii ʋaa lɛ ɣɛɛ ba? Ƃɛ ɣa a ɣɛ baala maazu vɛtɛsu maŋini yiɛ ta zɔlɔ‐wo faa lɛ ɣɛɛ ba?

⁸?Gà nii wosu ʋaa ve ga nu ƃuse na gaa‐ƃaa? ?Tɔgi lɛ daamɔdai wosu?

⁹Ƃɔvɛlaale ponɛvɛ Mooze na tɔgi zu Gala giɛ ɣɛ tea, “Mɛ lɛ nikɛ zine yɛ mɔlɔ ɣaa liɛsu ɔ̀ daa ɣili.” ?Nikɛ zineitiɛ ɣa Gala kpalai te ʋaa ma ʋaa ve?

¹⁰?Ɛ́ lɛ fai nii ɣaazɔ wosu de mazaƃu ma? É wonɛni de ʋaa ma. Ƃɔvɛlaale woza‐vili nui ɣa ɣɛ bilizu ki‐to‐su ma. Mɔlɔ‐ɣaa‐liɛ nui wɔ giɛ gaa liɛ kígi bá ga towaa ná dɔ zɔlɔ wo mɔlɔ ɣai zu.

¹¹?Ani gé Gala tuo vagɔ zeiya wo zaama ga sii‐zii ŋɛni, tɔ ga fai tevegɛi ŋɛɛ pulu ga ŋeteai‐zu zɔɔlaitiɛ te wo ya gé ta zɔlɔ wo ga su‐lɔnɔ?

¹²?Ani tɔ ga numai zɔitiɛ ta woo gaama ʋaa ga te wɔɔ laa ɣɛ nii mawulo‐su‐nu‐mai va wo ya, gá dɔ laa mu gɛ lɛ levega? Na pɛ ge ɣɛɛvɛ, gɛ́ lɛ dɛ gá woo gaama ʋai nii mawulo‐nu‐ma woni. Kɛ̀ to mu gá yii lɔ faa nɛpɛ gá, kɛɛ ʋaa ma gé mɛ lɛ ŋɛni ta ƃesa Kolai na woo niinɛ vagɔi‐wo faa luo.

¹³?Wɛ lɛ kwɛ̃ni ga taitiɛ te tii ɣɛɛzu Gala‐feli wɔta walai wu ta wɔ̃nɔ sɔlɔ wosu nɔ Gala‐feli wɔta walai wu? ?Na ɣa ɣɛɛ na niitiɛ ta Gala zeke‐kɛɛ vanagi mayeke kɛ tiɛ ta dɔ zɔlɔ wo zalaɣa ŋɛniitiɛ zu?

¹⁴Pele zii ɣilagi nɔ zu, de maliɣii deʋea ga taitiɛ te woo niinɛ vagɔi wosu ta ŋetea‐ɣɛɛ ŋɛnii zɔlɔ wo woo niinɛ vagɔi zaala zu.

¹⁵Kɛ̀ gɛ̀ lɛ dɛ nà goo gaama ʋai nii ta nɛpɛ mawulo‐nu‐ma woni. Gɛ̀ lɛ wɔnɔ ƃalaa kɔlɔi nii wonɛzu ga gè na ɣavele ŋɛnii ta maa zɔlɔ wo. Pagɛ to mu gè za, kɛ̀ nu ta nɛpɛ ge mɛ lɛ bàla nii ma gà yee la ma gìɛ nà yoka teve.

¹⁶Gè woo niinɛ vagɔi wo pɛ ƃalaa, nà lɛ kɔ̀wɔ lo‐su ɣɛɛ ma ga gè yoka teve. Tɔ ga fai é ga bàa ʋaa ga gè kɛ. Ani gɛ̀ lɛ ɣɛni woo niinɛ vagɔi woni, kpalo ɣa vea mà!

¹⁷Ani nà ƃɔɔ gà siɣi na yii ma gè kɛ, gà wulo ná zu nu ma. Kɛ̀ gè ƃe pɛ ƃalaa siɣizu yii ma ga gè kɛ, tɔ nɔ ga fai deʋeai é la zèea te tève ga gè kɛ ƃɔɔ ti.

¹⁸Zɛƃɛ mu ka sa é ga nà kulo‐nu‐mai? Tɔ ga nii. Na ɣa ga gè woo niinɛ vagɔi‐wo fai ɣɛ ga fai nii gà kɛ ƃɔɔvɛ. Na ɣa ɣɛɛ na nii é ga nà goo gaamai su ga é ɣɛ bɛ̀, nà mɛ lɛ ɣɛ bɛ̀ ga daa ʋega.

¹⁹Velei ƃalaa gè la ƃɔɔ yee ma gɛ̀ lɛ nu ta nɛpɛ bu, gè ƃɔɔ ɣɛɛ ga duo nu pɛ bɛ, kɛɛ ʋaa ma dàa lɔ nu lamaa va.

²⁰A lii na ga Dusiitiɛ wɔɔ laa vele, gè ɣɛɛni ga te ɣavele, kɛɛ ʋaa ma dàa lɔ Dusia va. Niitiɛ te Mooze na tɔgi yee wu, a lii na ga natiɛ wɔɔ laa vele, gè ƃɔɔ ɣɛɛni ga nui é tɔgi na yee wu, velei ƃalaa nà kagi gɛ̀ lɛ la bu. Gè na ɣɛɛni ga dàa lɔ niitiɛ va te tɔgi na yee wu.

²¹Niitiɛ te wɔɔ laa lɛ tɔgi na ʋaa va, a lii na ga natiɛ wɔɔ laa vele, gè ƃɔɔ wuloni ga nui pɔɔ laa lɛ tɔ ba. Tɔwɔ gɛ̀ lɛ ga nui nii tɔ faa lɛ ba ga Gala pɔ vele. Gà Kolai na tɔgi yee wu. Gè na ɣɛɛni ga dàa lɔ numai niitiɛ va te wɔɔ laa lɛ tɔgi va.

²²Niitiɛ te ʋii ƃɛi zee‐la‐mai zu, a lii na ga natiɛ wɔɔ laa vele, gè ƃɔɔ wuloni ga te ta, kɛɛ ʋaa ma dàa lɔ te va. Gè ƃɔɔ ɣɛɛ ga ŋɛni mazii ɣaazɔ nu mazii ɣaazɔ ʋaa ma gè leve ga pele mazii ɣaazɔ, kɛɛ ʋaa ma gè te taniga valo.

²³Gà nii ɣaazɔ ɣɛɛzu woo niinɛ vagɔi zaƃu ma, kɛɛ ʋaa ma gè nà dɔ zɔlɔ wo woo niinɛ vagɔi maluuyiɛi zu.

²⁴?Wɛ lɛ kwɛ̃ni ga ŋɛni‐maa‐ƃize‐yɛvɛ bea te pɛ ta ɣɛ ná maa wɔkɔzu ga te maŋɛnii zɔlɔ wo, tɔwɔ nu ɣila nɔ ɣa yá sɔlɔ wo ga maa‐wuu? A ƃize ŋɛ na kɛɛ ʋaa ma wo maa‐wui zɔlɔ wo.

²⁵Nui nɛpɛ yá ɣɛ ƃɔɔ ɣavele ƃɛtɛzu ga é kpize yɛvɛ maa‐wuu ʋaa ma, kɛni yá zu zo ma fai ɣaazɔ zu. Ta nii ɣɛ ga te gulu laa ʋũi sɔlɔ wo nii é ga kãla‐ŋala ŋɛni. Kɛ̀ da dɛi nii de maa ƃize yɛvɛsu ɛ́ lɛ ga kãla‐ŋala ŋɛni.

²⁶Nà dɛi gɛ̀ lɛ ƃizezu ga wũ‐tala‐ma vele. Vele ɣa na gà wɔɔ la. Gɛ̀ lɛ wɔɔ è ɣɛ nu ɣa ɣɛ ŋada yãka zu lowazu.

²⁷Kɛ̀ gà dɔ̀tɔi lowa‐lowa gè maa wolo kɛɛ ʋaa ma gè mɛ lɛ Gala goi wo zɔitiɛ ma nà kagi gɔ̀ ƃe kulo‐ɣɛɛ wosu bu Gala gaazu.