Read Loma KƆLĨITIƐ 13 Bible Online

KƆLĨITIƐ 13 - Loma bible

KƆLĨITIƐ 13

¹Nà paalai sava kelei ɣa gè kɛɛzu wo wɔ vɛ. Fai nɛpɛ wa vaa la gáa ɣa leve seele felegɔ ɔɔ saagɔ woo ma, è ɣɛ velei ponɛi la Gala kɔlɔi zu.

²Numai niitiɛ te faa yowũ ɣɛɛ wɔlɔ, gè te lɛnɛni é vɛɛ zɔitiɛ ɣaazɔ va. Tɔwɔ gà wɔnɔ te lɛnɛsu tei gɛ̀ lɛ na, è ɣɛ velei gè kɛɛni la kɛ̀i ma na nà daali‐mai fele kelei ma. Tɛnɛgi na ɣa ga ani gà vaa na wɔnɔ, gɛ̀ lɛ sa laa wuloa faa zu te ya.

³Toku ge zei ga wa wõi ɣɛɛzu ga gwala ga wo seele wulo ma ga ani Kolai ɣa é ɣɛɛzu ga zaƃu gìɛ ƃɔɛ wo wɔ. Gaa‐ƃaa lɛ valani zéea wo zo pelei ʋaa ma bɛ́. Kɛ̀ to mu gwala ɣee ɣaa ƃaavɛ wo yii zu.

⁴Te kpakoni gului ma zobo‐bala‐bɛ ŋeteai zu, kɛ̀ tɔ ŋeteai ɣɛɛzu ga Gala na gaa‐ƃai. Zobo balagɛ gé vɛ gé ɣɛɛ vele ma su ɣilekpu gá tiɛni, kɛ̀ wo zo pelei ma gé vɛ gá vɛɛ bá gá tiɛni gé ŋeteai ɣɛ ga Gala na gaa‐ƃai.

⁵A ƃɔɔ maa ƃɛɛ ƃɔɔ sɛ‐sɛ wo wɛlɛ na va ga ani wo yee ɣa wa yee‐la‐mai va. A ƃɔɔ maa ƃɛɛ lɛɛ.? Wɛ lɛ looni ga ná laa ga Ziizɛ Kolai ɣa wo yii zu? Ƃɔɔƃɔɔ su kɛni kilaa ani wo ɣalevɛ su‐wɔ̃ɔgi wu.

⁶Kì ka na ga wa ná maa ƃɛɛ na, wa wɛlɛ na va ga gɛ́ lɛ ɣaleni bu.

⁷Kɛ̀ gá Gala felizu ga wo mɛ lɛ nii ɣɛ lɛ pele ma. Ɛ́ lɛ ga gé ƃɔɔ wulo ga gé levega su‐wɔ̃ɔgi zu, kɛ̀ to mu gé kɛ wo nii ɣɛ é pele ma, velei ƃalaa ɣee ta gé maʋaa ɣa wulo la è ɣɛ gá ɣale su‐wɔ̃ɔgi wu.

⁸Gɛ́ lɛ zooga gɔ́ faa ta nɛpɛ kɛ ga gaamai, kɛni nɔ gé faa ta ɣɛ máʋaa ma.

⁹Ƃɔvɛlaale ani zobo ka ɣɛ na wo vɛ zobo balagɛi gé vɛ, gé wuu zu ɣa nɛɛ. Nii gé maƔala felizu tɔ ga wo maʋai ɣavele ƃɛtɛ é leve velei va é la.

¹⁰Gɛ̀ lɛ wo woba gɔ̀ ɣɛ kɔlɔi nii wonɛzu, kɛɛ ʋaa ma gà vaa na, gaa‐ƃai de maliɣii feea zèea gè mɛ lɛ malii ƃaa ga wiɛ. Na ɣa ga gaa‐ƃai é feea zèea wo maʋai lii ʋaa ma ga ná yee luo vele. Ɛ́ lɛ ga gè wo maʋaa loo ga ná wulu vele.

¹¹Na pɛ ka ɣɛɛ na, nà numaa, a de ɣaazu ɣii ma. A ziɛ vele ƃɛtɛ wo wui to nii ma gè daa wo vɛ wiɛ laa zei ɣiini daa ƃɔɛ wu wiɛ ŋeteai ɣɛ zii‐laa zu. Na ɣa ɣɛɛ na wõila ƃɔga zii‐lai te maƔalagi ɣa ɣɛ wo woba.

¹²A wiɛ ɣiini tuo ga ná maa wua. Gala na dɔ numaitiɛ ɣaazɔ te wo luoni.

¹³De maliɣii Ziizɛ Kolai na kpɔ‐bai ta Gala na wõilai é vɛɛ Gala baa ŋinɛgi na siɛ‐pululai va ta ɣɛ wo pɛ wo ʋaa ma fãa!