Read Loma KƆLĨITIƐ 3 Bible Online

KƆLĨITIƐ 3 - Loma bible

KƆLĨITIƐ 3

¹?Gá wɔnɔ ƃɔɔ‐lɛɛ lɔɔ zeizu ʋaa ve? ?Ƃaa kɔlɔ maƃɛdɛ ɣa gé ma ga é wulo nu ya é gé lɛ ga wiɛ. Ƃaa é wulo wo ya é gé lɛ, è ɣɛ velei nui taniga te kɛɛzu la?

²Wa ɣagi wa ɣa wo ga kɔlɔi yá gé lɛ. Ponɛvɛ gé yii zu ga nu pɛ ge kwɛ̃ é dodo.

³Na ɣa ɣɛɛ na wa dɛɛzu ga wa ga kɔlɔi kuloai Kolai ya gé teve. Ɛ́ lɛ woneni ga poda yiɛ, kɛ̀ ponɛvɛ ga ʋululai maƔalagi vaa ŋinɛgi. Ɛ́ lɛ wonɛni kwɔti lɛʋɛ ma, kɛ̀ ponɛvɛ nu ƃuse yii zu.

⁴Nii ɣavele lai ɣa bogɛi gé vɛ ga Gala Kolai zaala zu.

⁵Na ɣa ga gɛ́ lɛ kuloni bu ga gé bo ga gá ga nui nii tɔ ƃɔɔ é faa ta nɛpɛ kɛɛ. Nii é kɛɛ gé ɣɛ ga nui kuloai bu bɛ́, maʋai wulovɛ Gala zeea.

⁶Tɔ ɣa é kɛɛ gé kulo bu ga deʋe niinɛi zu lii‐ɣɛɛ vea. Ɛ́ lɛ ga tɔgi ponɛi, kɛ̀ Gala baa ŋinɛgi ɣa é feezu. Ƃɔvɛlaale tɔgi nii ponɛi dáa woi ɣa faa vɛɛ nu va ga te paa. Kɛ̀ Gala baa ŋinɛgi ɣa zɛʋu ʋeezu.

⁷Tɔwɔ tɔgi te tɛɛni te ponɛ kwɔti ma mawulo‐su‐nu‐ma ɣɛni ga saa. Na ƃalaa ɣɛɛvɛ Gala ta zaala wala laani maʋai ma. Velei ƃalaa su lɛ ŋɛni woozasu la ga saala‐malai nii maʋaa ƃea gá, é kɛɛni Mooze ɣaazuvɛ wala ʋolo ga Yezɔitiɛ tɛ lɛ ƃega zoo tɔ ɣaazu ƃako na va.

⁸?Tɔgi‐lɛɛ ʋai mugi maʋaa ƃeazu gá nà ɣa saala wala laani maʋaa ma, kaalima teɣa Gala baa ŋinɛgi vaa ʋai de wɔ?

⁹Tei tɔwɔ deʋei nii mugi yá kɛ faa yɛ nu ma saala ƃakpa laani maʋai ma, kɛni deʋei nii yá nu ɣɛɛ‐zɔ siɣi ba ná dɔ zaala‐malai wudɛ na maazu ƃɔɔ powũ‐powũ.

¹⁰Ƃɔɔƃɔɔ su nii mavelei ma nii wɔlɔ saala lai yɛga ma é ɣɛɛ ga ŋɛnii saala nɛpɛ gɛ lɛ ma. Toku ge zei saala‐malai nii va pudɛgɛi ná dɔ zaala‐malai maazu.

¹¹Ƃɔvɛlaale nii máʋaa ɣa ƃea gá saala ɣa la na nà ma, nii wɔgi sa maʋaa lɛ ƃea gá kɛni nà ná zaala‐malai wala ɣa ƃakpa.

¹²Tei tɔwɔ na ɣavele ɣi‐togi wogɛi ga diɛ, da ƃɔɛ ga duo lala ga kpakpaa.

¹³Dɛ lɛ kɛɛ ga velei Mooze kɛɛni la. Ná dɛi é ƃele zeɣe vɛɛni ɣaazu, kɛɛ ʋaa ma ŋɛni ʋolo‐ʋologi nii maʋai ɣa ƃea gá Yezɔitiɛ te mɛ lɛ wɛlɛ maʋaa ɣaa‐ƃela‐su va.

¹⁴Kɛ̀ ta ʋaa ɣaa‐ɣaazu ƃai ɣɛ. Toku ge zei ga zai ŋɛ ni ƃalaa ta ɣɛ na deʋe wɔlɔ‐zaɣagi mawɔlɔi lodosu, ƃele zeɣei ɣa ɣɛ dɛ nɔ vɛɛni te ɣaazu luo. Ƃɔvɛlaale Kolai zaala zu nɔ ɣa ƃele zeɣei ɣa ziɣi la nu ɣaazu luo.

¹⁵Ƃɔɔƃɔɔ su zai ŋɛ ni ƃalaa ta Mooze na kɔlɔi‐lodo goo mɛni na, yà ka ga ƃele zeɣe ɣa ƃesa ta ɣi‐gaa‐ziɛ luo tɛ lɛ gaa ɣaa.

¹⁶Kɛ̀ nu ɣa wote na ga de maliɣii wɔ vele, ƃele zeɣei ɣa ziɣi gáazu luo.

¹⁷Tɔwɔ de maliɣii ɣa ga Gala baa ŋinɛgi. Vɛi nɛpɛgi de maliɣii vaa ŋinɛgi ɣa ɣɛ na nu yee laa ɣa ʋũi na.

¹⁸De pɛ ƃele zeɣe lɛ ɣɛɛ sa de ɣaazu diɛ wɛlɛ de maliɣii na saala‐malai va de maa yiɛ ʋeli ga de ɣɛ ga kavele. De maʋaa wulovɛ è ɣɛ da ɣɛ wulozu saala‐malai ta zu diɛ vili ta wala zu. Toku ge zei ga maa‐ʋeli fai ɣa wulozu de maliɣii ya é ga Gala baa ŋinɛgi.