Read Loma KƆLĨITIƐ 4 Bible Online

KƆLĨITIƐ 4 - Loma bible

KƆLĨITIƐ 4

¹Na ma tei tɔwɔ gé tii nii maa zɔlɔ woga gé ɣaazu‐maa‐wõi‐ɣaa vele ma Gala bɛ, fii‐ƃɛɛ lɛ viliga gé ɣigi zu kɛ́ɛ ʋai ma.

²Gé kuloa la gé bo ga gé yee wuloa ƃaa‐wulo‐ma loowu zekegitiɛ zu. Gɛ́ lɛ ʋaani bu ga gé gaa‐wɔlɔ tuo wo ga gbana ɔ́ nɔ ɣɛ ga gé faa yãka vɛɛ Gala goi va. Kɛ̀ gé laa wu ziɣi vele ma gaamai ma gíɛ bo, gá ƃɔɔ lɛ ga nu pɛ Gala gaazu ta ɣi‐gaa‐ziɛi zu vele.

³Tɔwɔ ani ƃalaa woo niinɛ vagɔi gé bosu seɣe vɛɛvɛ gaazu luo, pɛɛvɛ nɔ gaazu luo niitiɛ ʋaa ma te zu vaazu ƃɔnɔ wosu.

⁴Ta dɛi, na ɣa ga taitiɛ tɛ lɛ Kolai ʋaa ziɣini ga gaama, ŋeteai‐nii‐zu ɣalagi te yii zu ƃidia te ɣaazu wu kɛɛ ʋaa ma te mɛ lɛ wɛlɛ woo niinɛ vagɔi maʋoloi va, woo vagɔi nii pilegɛi Kolai na saala‐malai va. Na ɣa ga Kolai nii kpɛtɛi ga Gala kavele.

⁵Ƃɔvɛlaale Gala goi gé bosu gɛ́ lɛ bosu ɔ́ vile ƃɔɔ va, kɛ̀ gá bosu ga Ziizɛ Kolai ɣa é ga de maliɣii gíɛ bo ga gá ɣagi gá ga wa lii‐ɣɛɛ vea Ziizɛ mazaƃu ma.

⁶Toku ge zei ga Gala ka é boni é ɣɛ tea, “Ƃe ba ŋada wodoai ʋolo kpidii zu.” Galagi nii wɔ ka é ʋoloa gé yii zu ga gé ŋada wodoai nii ʋe yá Gala na saala‐malai maɣele‐ɣelegi lɛ, na ɣa ga saala‐malai nii nu ɣa pɛtɛ Kolai ɣaazu.

⁷Kɛ̀ tɔnɔ‐ba ŋɛnii nii ɣa gé ya pɔlɔ woko zu kɛɛ ʋaa ma nii dɛ́ ga gaa‐ƃaa walai nii pulu lɛ ba Gala ka é zéea, gá laale.

⁸Faa ƃoei ɣa zeizu gé ma pele zii ɣaazɔ zu, kɛ̀ zee lɛ zoosu gé la. Gé ɣɛɛvɛ pɔ̃ɔ, kɛ̀ gɛ́ lɛ ziɣizu gá ɣi‐gaa‐ziɛi wulu.

⁹Gé ƃɔɔlagɛ, kɛ̀ Gala gɛ lɛ yee wuloni gé maʋaa wu. Ta gé ʋalasu kpaba‐kpaba, kɛ̀ tɛ lɛ gé zu ŋala‐ŋalaga.

¹⁰Ziizɛ na sai ɣa gé lɔtɔi zu ga ɣee nɛpɛ gíɛ lii la, kɛɛ ʋaa ma gé Ziizɛ na ŋeteai lɛ ƃalaa pɛ gé lɔtɔi zu.

¹¹Ani nɔ gé yɛʋui ɣa gé ya gé wulovɛ ga gé za ga siɛ ta nɛpɛ Ziizɛ mazaƃu ma, kɛɛ ʋaa ma gé Ziizɛ na ŋeteai lɛ gá zaa lɔtɔi zu.

¹²Na ma saa ɣa tii ɣɛɛzu gé lɔtɔi zu, zɛʋu wɔ gíɛ tii ɣɛ wo lɔtɔi zu.

¹³Ponɛvɛ Gala kɔlɔi zu mawoi ga “Gè siɣia ga gaama, na ma gè kuloa la gè bo.” Tei tɔwɔ nui é ponɛɛ gá tiɛni zee‐la‐mai é gé ya maɣi‐gaa‐ziɛi nɔ ga faa ɣilekpu, gá ƃalaa gé siɣia ga gaama, na ma gá kulozu la gé bo

¹⁴kwɛ̃ɛgɛi gé vɛ ga nui é de maliɣii Ziizɛ wu ziɣini saa ya towaa gé vɛɛ ƃalaa pɛ Ziizɛ va é gé wu ziɣi saa ya. Na ɣa ɣɛɛ na towaa wo vɛɛ gé va é va ga diɛ kpɔɔ ɣaazu.

¹⁵Nii ɣa nɔ wa wulo‐nu‐ma ʋaa ma, kɛɛ ʋaa ma Gala na maa‐wõi‐ɣaa ƃɔ‐ba laa ɣa na ziitizu nu lamaa ma, nà kɛ mama‐feeai zu wɔɔlɔ ma ƃalaa pɛ ƃaa‐laa ʋaa zu Gala ma.

¹⁶Na ma fii‐ƃɛɛ lɛ vilisu gé yii zu. Velei ƃalaa nu ƃuse ŋeteai nii é podo ɣala‐kala ga de ya é ŋala‐ŋalasu la, ŋeteai nii lɛ wuloni podo ɣala‐kala ga de ya nà ɣa ɣɛɛzu ga maniinɛ ga gela‐bo pele ɣile‐gile.

¹⁷Faa ƃoei woloi nii é zeizu de ma maʋaa zu lɛ woozani tɔ ƃaa‐la‐ma ta ɣavele ƃɛtɛzu de ʋaa ma nii maʋaa wɛ̃ɛ gɛ lɛ ba é ga ƃaa‐la‐mai nii po‐kɔ̃ɔ‐ma ŋɛni lɛ zɔlɔ woga.

¹⁸Ƃɔvɛlaale de ɣaazu lɛ ŋɛnii niitiɛ luo nu ɣa ɣaazu la te ma. Kɛ̀ de ɣaazu ɣa niitiɛ luo nu lɛ ɣaazu laa te ma. Toku ge zei ga ŋɛniitiɛ nu ɣaazu ɣa la te ma tɛ lɛ lebiga. Kɛ̀ niitiɛ nu ɣaazu lɛ laa te ma ta yɛ na wɔlɔ‐wɔlɔ ta wɔlɔ‐wɔlɔ.