Read Loma KƆLĨITIƐ 7 Bible Online

KƆLĨITIƐ 7 - Loma bible

KƆLĨITIƐ 7

¹Wõìla veaitiɛ, tei tɔwɔ ki‐togi niitiɛ wogɛi ga diɛ, pagɛ nii nɛpɛ yá de lɔtɔi maa ƃoola ta da ɣi‐gaa‐ziɛi a de natiɛ wuo ƃɔɔ ma. A de maa wuo ƃɔɔ maa‐wulo‐zu nɛpɛ ge mɛ lɛ ɣɛ de ʋaa va diɛ kɛ Gala na duo‐bai mavele ma.

²A wuu zu ʋaitiɛ laa zei ƃɔɔ gé ma kpai. Gɛ́ lɛ dɛ faa ɣɛɛni ga nu ta. Gɛ́ lɛ dɛ nu ta ŋala‐ŋalani ga luo vele. Gɛ́ lɛ dɛ ƃɔɔ ʋize woni nu ta va.

³Gɛ̀ lɛ nii wosu ga gè faa yɛ wo ma ga woo. Toku ge zei ga gè ɣaʋua gè bo ga wo maʋai ɣa gé yii zu ga a da za ɣii ma de ŋetea ɣɛ ɣii ma.

⁴Gwàla laavɛ ga wo maʋai. Gwàla wɔɔlɔvɛ ƃɔɔ ɣaazu wo maʋai vɛ. Zìi laa ʋegɛ ga gaa nɛkpɛ. Velei ƃalaa faa ƃoei niitiɛ ɣaazɔ te zeizu la gé ma, kùu zu nɛɛvɛ é teve ŋɛɛ pulu.

⁵Tei ƃalaa gé vaani Masadoonia, gɛ́ lɛ loowoni. Vɛ vele nɛpɛ gɔ́ lite da faa ƃoei ɔ́ zei gé ma gíɛ wɔ podo ɣala‐kala ga gíɛ luo ga ɣi su vele.

⁶Kɛ̀ Galagi yá nui nii ɣaa nɛkpɛ maa‐wõi ɣa loo ma é gé ɣaa nɛkpɛni ga velei Taitɔ vaani la.

⁷Ɛ́ lɛ nɔ ga páa ʋai, kɛ̀ tɔ ƃalaa pɛ ga gaa‐nɛkpɛgi wo ɣɛni ga zaƃu é wo da, è ɣɛ velei é boni la gé ma é vile màa‐wõi‐wõi‐kulo ʋai va wo vɛ ta velei wo maa wõiyai ɣɛ la fàa ma wo wɔɔlɔi ɣɛɛ ʋaa zu ga pɔ̀ vele.

⁸Ƃɔvɛlaale ani ƃalaa gè kɛɛni wo maa wõi nà kɔlɔi zu woi ma, gɛ̀ lɛ zɛ‐pɛ liliga ―velei ƃalaa maa‐wõi looni la mà ―ƃɔvɛlaale gè wɛlɛni ná va ga kɔlɔi nii kɛɛni wo yii zuuli. To mu na ɣɛɛni nɔ ga wiɛ ga siɛ ta wolo.

⁹Gà sa kuu‐zu‐nɛɛ wulozu. Ɛ́ lɛ ga gà kɛɛzu wo yii‐zuuli ʋai mazaƃu ma. Kɛ̀ gà kɛɛzu, toku ge zei ga wo yii zuulini ga wo wulu ɣaa ʋe faa yowũ va. É ɣɛni ga Gala na pelei ga zii‐zuulii na wo ga wiɛ, kɛɛ ʋaa ma gé mɛ lɛ ɣɛ ga zaƃu a wɔ vala ŋɛni ta ma.

¹⁰Ƃɔvɛlaale zii‐zuulii nii é ga Gala faa‐bu ʋaa ga é wo ga nu towaa va ga nu wulu‐ɣaa‐ʋe faa faa yowũ va. Nà wɔ ka yá balolai maa vele wulo ga nu. Ɛ́ lɛ vaa ga zɛ‐pɛ lili faa ta nɛpɛ nu wɔ. Kɛ̀ nu ƃuse ŋeteai zu yii‐zuulii ɣa va ga saa nu wɔ.

¹¹A wɛlɛ na va ga velei Gala faa‐bu yii‐zuulii é wo ɣɛɛ la ga nui gaa‐wɔlɔ gɛ lɛ da wiɛ ná maa‐wõi‐wõi kulo ga wo woo zu wulo ga gaa wodoa, fai nii ɛ́ lɛ ga gaama nà ga wo yii‐ɣaa‐wãla ʋaa wiɛ luo faa yowũ va wiɛ ná maa‐wõi‐wõi kulo ga wo wɔɔlɔ gaamai‐ɣɛɛ ʋaa zu wo ɣavele ƃɛtɛi ga wo tɔ kpɛ numaa ma fai nii zu lɛ pele ma. Wo ƃɔɔ lɛɛ pelei ɣaazɔ zu ga wa ga numai niitiɛ faa lɛ yɛni te ma fai nii zu.

¹²Na ma velei ƃalaa gè kɔlɔi wonɛni la wo wɔ, gɛ̀ lɛ ponɛni wo wɔ nui nii ʋaa ma é faa yowũ ɣɛɛ ɔ́ nɔ ɣɛ ga gè ponɛ nui nii ʋaa ma faa yowũ ɣɛɛ la. Kɛ̀ gè nii ɣɛɛni kɛɛ ʋaa ma wo wɔɔlɔ ʋai gé maʋaa zu gé dɛ ga wiɛ Gala gaazu.

¹³Na ma gé yii ɣaa nɛkpɛgɛ. Gé ƃɔɔ yii ɣaa‐nɛkpɛ fai ɣa wulo na ba wɔnɔ, gé kuu‐zu‐nɛɛ wuloni é vɛɛ na va Taitɔ wuu‐zu‐nɛɛ ʋai ma. Ƃɔvɛlaale wo pɛ wo kɛɛ zíi la kúu zu ga daa vele.

¹⁴Gɔ̀ faa ta wo na ma é dɛ ga bɔ̀ɔlɔvɛ ƃɔɔ ɣaazu wo ʋaa ma, ɛ́ lɛ ƃega ɣɛ ga nà wũfe faa. Kɛ̀ fai nɛpɛ gé boni wo ma velei nɔ te ɣɛni la ga gaama, vele nɔ na dɛ́i la ga yokagi nɛpɛ gé tevea Taitɔ ɣaazu tɔ ga gaama.

¹⁵Kí ka loo na wo ɣaazɔ wa woo‐mɛni‐kuloai zu ta velei wo yee zeini la bú ga duo wiɛ ƃeli, ná maa ɣa wõi gáazu.

¹⁶Gà kuu‐zu‐nɛɛ wulozu, ƃɔvɛlaale dàavɛ ga wiɛ sakpe nɛpɛ gɛ lɛ maʋaa va.