Read Loma GALEESIAITIƐ 3 Bible Online

GALEESIAITIƐ 3 - Loma bible

GALEESIAITIƐ 3

¹Ee Galeesiaitiɛ, wo litigɛ. Ƃɛ ɣa é mata ɣɛɛ wo ma, wai te Ziizɛ Kolai maʋaa ɣavele zu wuloni ga woo maa zeezea wo ɣaazu ma ga tɔ ga nui te kpakoni gului ma?

²Ƃe ba nɔ gè wo ɣaa zaɣa kɛ nii ma.? Wo Gala baa ŋinɛgi yee maa zɔlɔ woni tɔgi zu lii‐ɣɛɛ vele ma wiɛ? ?Ƃaa wo maa zɔlɔ woni woo niinɛ vagɔi mɛni pele ma wiɛ wo siɣi ga gaama?

³?Wo liti pele ɣa ŋɛ ni? ?Tei tɔwɔ wo tɔɔ zeiya Gala baa ŋinɛgi na ŋeteai zu, wa sa gaa ƃelasu nu ƃuse ŋeteai zu ʋaa ve?

⁴?Wo levega faa lama‐lamagi niitiɛ zu ƃɔɔvɛ? ―Ani ʋɔlɔ ɣiti tɔ ga ƃɔɔvɛ ʋaa ga ƃɔɔƃɔɔ su.

⁵?Nui nii é baa ŋinɛgi levesu wo wɔ vɛ yíɛ faa maa‐wɔlɔ‐wɔlɔga ɣɛ wo zaama, tɔ kɛɛzu ʋaa ve ná tɔgi zu ʋaa ɣɛɛ vele ma wiɛ? ?Ƃaa tɔ kɛɛzu woo niinɛ vagɔi mɛni pele ma wo vɛ wo siɣi ga gaama?

⁶Vele nɔ na é la ga Eeƃɔlɔhɛ̃ɛ. “É laani ga Gala. Nà wɔ ge kɛ Gala ge siɣi ga tele‐bo tuo‐wo nu,” è ɣɛ velei ponɛi la Gala kɔlɔi zu.

⁷Na ma wa wɛlɛzu sa na va ga taitiɛ zee‐la‐ma te ya ta ɣa te ga Eeƃɔlɔhɛ̃ɛ nu zuwuitiɛ.

⁸Tɔwɔ maʋai yɛga wɔlɔ ná luo é wulo kɛnɛ ma Gala kɔlɔi zu ga Gala ka zii ƃalaagitiɛ ɣɛ ga numaitiɛ te ɣɛɛ‐zɔ yowũi lɛ ɣɛɛ te va ga faa zee‐la‐mai mavele ma. Nii mavele ma Gala ge woo niinɛ vagɔi woni Eeƃɔlɔhɛ̃ɛ ma yíɛ ɣɛ ma, “È zaala zu ɣa tuuyiɛ ɣa loo la zii ɣaazɔ ma.”

⁹Na ma taitiɛ zee‐la‐ma te ya ta vɛɛ Eeƃɔlɔhɛ̃ɛ nii va zee‐la‐mai ɣɛni zéea ta tiɛni tuuyiɛ loo te ma.

¹⁰Taitiɛ nɛpɛ te yee lai tɔgi zu lii‐ɣɛɛ ma, koto ɣa zɛlɛni te wũ maazu. Ƃɔvɛlaale ponɛvɛ Gala kɔlɔi zu mawoi ga “Koto ɣa nui nɛpɛ ba ɛ́ lɛ ɣataga zia va ga faitiɛ ɣaazɔ te wonɛi tɔ kɔlɔi zu.”

¹¹Tɔwɔ seele wulovɛ sa ma ga nu ta nɛpɛ kɛɛ‐zɔ yowũi lɛ ƃega vɛɛzu ba ga faa Gala gaazu ná tɔgi mavelei ma. Ƃɔvɛlaale Gala kɔlɔi ɣa bosu ga “Nui nɛpɛ é ga tele‐bo tuo‐wo nu zee‐la‐mai zaala zu manui yɛʋui ɣa yɛ zéea.”

¹²Kɛ̀ tɔgi maʋaa lɛ ziɣini zee‐la‐ma la, toku ge zei ga Gala kɔlɔi ɣa bosu ga “Nui yá ziɛ ga Gala na tɔgitiɛ manui ɣa zɛʋui zɔlɔ wo te mavele ma.”

¹³Kolai é de wũ maa woni é tɔgi mawotoi ziɣi de va ga velei koto vɛɛni la bá tɔ ɣagi de ʋaa ma. Ƃɔvɛlaale ponɛvɛ Gala kɔlɔi zu mawoi ga “Koto ɣa ɣɛ nui nɛpɛ ba ta sɛlɛ gulu ma.”

¹⁴Nii mazaƃui ɣɛni ga Eeƃɔlɔhɛ̃ɛ maluuyiɛi ziiti zii ƃalaagitiɛ ma Ziizɛ Kolai zaala zu, na ɣa ɣɛɛ na de Gala baa ŋinɛgi nii maa zɔlɔ wo de ɣi togɛi la zee‐la‐ma zaala zu.

¹⁵A ƃe ba gè po‐kɔ̃ɔ fe nu ƃuse ŋeteai mavelei ma. Nii ƃalaa nu ta nɛpɛ ka deʋe é vile kweligitiɛ ʋaa va nu ta nɛpɛ gɛ lɛ maʋaa ɣɛɛ ga faa ʋoole ɔ́ nɔ ɣɛ ga é vɛɛ ba, ani nɔ dɛɛvɛ ga maʋai ɣa pele ma.

¹⁶Tɔwɔ ki‐togi woni ga Eeƃɔlɔhɛ̃ɛ ta mawulo‐bai. Ki‐togi zu woi lɛ woni Eeƃɔlɔhɛ̃ɛ ma tɔ ɣɛ ma, “Tɔ è mawulo‐baitiɛ ʋaa ma” tɔ ɣɛ ʋaazu nu lamaa ma. Kè te ɣɛni ʋaazu nu gila ma. Te ɣɛni ma, “Tɔ è mawulo‐bai ʋaa ma.” Mawulo‐bai na ɣa ga Kolai.

¹⁷Nii gè bosu su‐wulo‐zu ɣa. Tɔgi nii ki‐togi woga kwena wũ naagɔ zee saagɔ leve tɔ teɣa ɣɛ tɛɛzu ɛ́ lɛ deʋei nii ziɣia ma Gala ge maʋaa wu viiya ɣaʋu pa ga é ki‐togi maʋaa ɣɛ ga faa ʋoole.

¹⁸Ƃɔvɛlaale ani Gala kweligi da sɔlɔ wo maʋaa ziɣivɛ tɔgi la, a kɛ tii maʋaa lɛ sa ziɣini ki‐togi la. Kɛ̀ Gala pɔ ge feeni Eeƃɔlɔhɛ̃ɛ ya kí‐to sù.

¹⁹Tɔgi wɔɔ laa mu ka sa ga minɛ? Te tɔgi lɛɛni tɔ ƃalaa ga é tuo‐vele‐yowũ‐wuloa ɣɛ ga fai yá vɛɛ nu va ga faa ga é yɛ na ɣɛɛzu é yɛsu Eeƃɔlɔhɛ̃ɛ mawulo‐bai va. Na ɣa ga mawulo‐bai nii ki‐togi woni la. Gala ta ɣeelaitiɛ ɣa te tɔgi laani. Nu ɣɛni te yɔɔzu ta numaitiɛ.

²⁰Te yɔɔzu nui wɔ ka dɛ ga te levegɛi ɣɛ nu zei‐zu ɣila ba. Kɛ̀ Gala pɔ ka nɔ ɣilekpu.

²¹?Tɔgi ƃɔga Gala na ki‐togi te woi ɣaa ɣɛzɛgɛ? Ƃɔɔƃɔɔ su ɛ́ lɛ ŋɛ na. Ƃɔvɛlaale è ɣɛ te tɔ ta lɛɛni nii ɔ́ zoo é zɛʋu ʋe, tele‐bo tuo ɔ́ wo ga ƃɔɔƃɔɔ su tɔgi mavele ma.

²²Kɛ̀ Gala kɔlɔi boga ga ŋɛni pɛ ka faa yowũ yee wu, é bo ga nii é ga ki‐togi zu ŋɛnii towaa ʋe nu laa vele ma ga Ziizɛ Kolai é ʋe niitiɛ ya ta maʋaa ziɣi ga gaama.

²³Tɔwɔ zee‐la‐mai nii ɔ́ vɛɛ vaazu, de ɣiliai ɣɛ tɔgi vɛ de zogɛi kpe ga de yɛ su siɛgi ziili ga zee‐la‐mai wulo kɛnɛ ma.

²⁴Nii mavele ma tɔgi ɣɛni ga de maazu‐vɛtɛ ŋɛni é yɛsu Kolai va, kɛɛ ʋaa ma de ɣɛɛ‐zɔgi mɛ lɛ vɛɛ de va ga faa zee‐la‐mai zaala zu.

²⁵Kɛ̀ tei tɔwɔ zee‐la‐mai vaa sa, dɛ lɛ sa wɔlɔ‐wɔlɔ maazu‐vɛtɛ ŋɛnii nii wu.

²⁶Wo ɣɛɛ vele ma su ɣilekpu wa Ziizɛ Kolaini wo ɣaazɔ wa ga Gala dea zee‐la‐mai zaala zu.

²⁷Ƃɔvɛlaale wai nɛpɛgi bataizei ɣɛɛ ga wiɛ ga wa Kolaini wo ɣɛ su ɣilekpu, wo Kolai lɛɛ ƃɔɔ ma è ɣɛ seɣe.

²⁸Dusi nu laa lɛ wuloni su ɔ́ nɔ ɣɛ ga Geliiki nu, duo laa lɛ wuloni su ɔ́ nɔ ɣɛ ga wɔɔlɔ, zunu laa lɛ wuloni su ɔ́ nɔ ɣɛ ga ŋaza nu, ƃɔvɛlaale wo pɛ wa nɔ ga ŋɛni gila wo ɣɛɛ vele ma su ɣilekpu wa Kolaini.

²⁹Ani wa ga Kolai na dɔ, a kɛ tii wa ga Eeƃɔlɔhɛ̃ɛ mawulo‐ba wo ga po ŋɛnii kɛɛ vea ki‐togi mavele ma.