Read Loma ƐFƐSƆITIƐ 4 Bible Online

ƐFƐSƆITIƐ 4 - Loma bible

ƐFƐSƆITIƐ 4

¹Na ma nài gè ga pilisine de maliɣii ʋaa ma, gà bosu wiɛ ga pee vele ga wo tuoi nii wo solowogɛi tiligi ma bogɛi ga wiɛ.

²Wa kɛ ga kolo‐wuloa ta sɛ‐sɛ‐bo tuo‐woga. A kɛ ga zii‐lɔɔ wiɛ yii lɔ ɣiini kɛɛ‐zɔ ga wõilai zu.

³Wo ɣɛi Gala baa ŋinɛgi boga su ɣilekpu a wiɛ ɣaa ƃaa ga wo yee ɣata na va. Wa nii ɣɛ ga zii‐laa luo‐woga ga ɣiini.

⁴Wa nɔ ga dɔtɔ gila su vea, Gala baa ŋinɛgi wɔ ge nɔ ɣilekpu, è ɣɛ velei nɔ wo liligɛi la ki‐to gilagi nii ma é ga wa liligi zu ŋɛni.

⁵De maliɣii ɣa ɣilekpu, da yee‐la‐mai ɣile, bataizei nɔ su ɣile.

⁶Gala ka nɔ ɣile é ga de pɛ de ɣeeai, é ŋɛni pɛ maazu ŋɛni pɛ ge saala zu é ŋada ɣaazɔ.

⁷Kɛ̀ maa‐wõi‐ɣaa ƃɔ‐bai wogɛ ga de ɣile‐giledai. Kpɔ‐bai wɔ siɣivɛ nɔ faa‐nɛɛ liigoi la Kolai kɛɛ de ɣile‐giledai vɛ.

⁸Na ma ponɛvɛ Gala kɔlɔi zu mawoi ga “Tei é lɛɛni ƃɔɔ powũ gee‐zuvɛ, é pele wuloni ga pilisine lamaa é faa‐nɛɛ ɣɛ sa nu ƃusei vɛ.”

⁹Da bo na ga é lɛɛni gee‐zuvɛ, na zu‐wulo‐zu ɣa ga minɛ? Kɛ̀bɛ su‐wulo‐zu nɔ ga é yiini zui wu vele ƃalaa pɛ.

¹⁰Nui nii é yiini tɔ nɔ ɣa wɔnɔ é lɛɛni gee wɔlɔgi maazu vele powũ, kɛɛ ʋaa ma maʋai kulo‐ɣɛɛ wo ŋadɛi ɣaazɔ.

¹¹Tɔwɔ Kolai na faa‐nɛitiɛ zu‐wulo‐zu ɣa ga nui taniga te ɣɛ ga keela, taniga te ɣɛ ga daa woo‐wo bea, taniga te ɣɛ ga woo vagɔi‐wo bea, taniga te ɣɛ wɔnɔ ga pasitaa ta kala‐mɔa.

¹²Niitiɛ ɣɛɛvɛ kɛɛ ʋaa ma taitiɛ te wuloai su ga tee ga Gala na dɔa é te ɣavele ƃɛtɛ tii ʋaa ma ta ɣɛ kɛɛzu bɛ́, dai de ga Kolai lɔtɔi de maʋai lii ʋaa ma ga zee luo vele

¹³é yɛsu é zolowo su de ya ga a de ɣɛ su ɣilekpu zee‐la‐mai zu a de ɣi daa wodo Gala dui maʋai zu. Na ɣa ɣɛɛ na a de ɣɛ ga numaitiɛ te wɔɔlɔɔ ga daa ʋega ta ŋeteai zu ga te ɣɛ ga Kolai ɣavele.

¹⁴De mɛ lɛ wɔlɔ‐wɔlɔ ɣɛ sa ga lopaa ɣavele, kala‐bo fai mazii ɣaazɔ ɔ́ ɣɛ de laa‐zu lamasu nu ƃuse na gbana luoi zaala zu tɔ ɣɛ kɛɛzu ga de ɣaa‐wɔlɔ pele.

¹⁵Kɛ̀ to mu a diɛ gaamai wo wõilai zu. Kɛni a da ɣɛ liizu ga yee luo vele pelei ɣaazɔ zu yá de ɣɛ su ɣilekpu a da de mawũgi, na ɣa ga Kolai.

¹⁶Tɔ ɣa é maa vea ƃulugi ɣaazɔ vilega kii va ŋada ɣila é te zolowo su. É te ɣɛɛ su ɣilekpu pelei ɣaazɔ zu ga velei é te vile‐pilega la kii la. Tii‐ɣɛɛ vele ma te ɣile‐giledai vɛ ta wɔɔlɔzu wõilai zu te maʋai yìɛ li tuo ma.

¹⁷Woi nii ɣa gè wo lɛnɛsu la de maliɣii na daa‐zeigi zu. Na ɣa ga wo mɛ lɛ sa wɔlɔ‐wɔlɔ luo ga zii ƃalaagitiɛ luo vele faa yãka ɣi‐gaa‐ziɛi nii zu é te ma.

¹⁸Ta ɣele‐ɣelegi ɣaa ƃidivɛ te ga wɛ̃ɛ Gala tuoi ʋaa ma toku ge zei faa ɣaa‐ɣaa lalai va ta wui‐zu‐ƃɔlɔ fai mavele ma.

¹⁹Te ɣɛɛ sa tikili. Na ɣa ɣɛɛ na te ƃɔɔ ɣɛɛ ga ƃaa‐wulo‐ma vea. Maa‐yɛ̃ɛlɛ tuo mazii ɣaazɔ mayii viligɛ te wuu zu.

²⁰Wɛ lɛ na ɣavele luoi vɛtɛni Kolai ya!—

²¹Kɛ̀bɛ te faa woni wiɛ é vile ba? ?Tei tɔwɔ wo ga maa vea, tɛ lɛ wo ɣala boni ga gaamai nii é ná ŋeteai zu?

²²A wo luo vele wɔlɔ‐zaɣagi loo ya. Na ɣa wa ŋetea wɔlɔ‐zaɣagi ʋaa ma. Tɔ ga nu zu‐ƃɔnɔ‐wo faa kuu‐zu‐yii yá nu ɣaa wɔlɔ mavele ma.

²³A ɣɛ wɔnɔ ga nu niinɛa ki‐gaa‐ziɛi nii mavele ma é wo ɣigi zu,

²⁴wo tuo niinɛi nii ziɣi kpɛtɛi Gala tuoi ʋaa ma ga é ɣɛ ga tele‐bo tuo ƃɔɔƃɔɔ ta tuoi maa wuai.

²⁵Na ma a zɛɛ ʋaa luoi loo ya. Na ɣa ɣɛɛ na nui ɣaazɔ yìɛ gaama wo bɔɔ nu ma, ƃɔvɛlaale a de vile‐pilegɛ ɣiini ba.

²⁶A zii‐ɣaa‐wãla wo, kɛ̀ a mɛ lɛ faa yowũ ɣɛ. A mɛ lɛ ƃe ba zii‐ɣaa‐wãla ɔ́ yɛ wo wɔlɔ ga ɔ́ yɛ su folo ɣai ɔ́ too.

²⁷A mɛ lɛ pele ta nɛpɛ fe dɛvele ya.

²⁸Nui é ga wũmɔ nu, é mɛ lɛ sa wɔlɔ‐wɔlɔ wũmɔ wo. Kɛ̀ to mu é tii ɣɛ ga yee ga gaama vele, kɛɛ ʋaa ma é zoo é faa‐nɛɛ ɣɛ niitiɛ vɛ te ƃalai.

²⁹A mɛ lɛ ƃe ba faa yowũ ta nɛpɛ gɔ wulo wo la wɔ bo. Kɛ̀ nii yá nu yii la solowogɛi fai nii zu wa ɣɛ ma, a wiɛ na wo nɔ, kɛɛ ʋaa ma é ɣɛ ga kpɔ‐ba numai niitiɛ ʋaa ma ta mɛni.

³⁰Na ɣa ɣɛɛ na a mɛ lɛ Gala baa ŋinɛgi yii zuuli. Towaa Gala ge pɛɛ wo va ga yee‐wo wo wũ‐maa‐wo foloi ʋaa ma.

³¹Faa‐wãla‐ma ʋaa, zii‐ɣaa‐wãla wala, mawolo, doba‐yãka‐woga é vɛɛ daa‐woo‐yowũ‐woga va, a na ɣaazɔ loo ya é vɛɛ kuu‐zu‐ƃɔlɔ ʋaa ɣaazɔ va.

³²A ɣɛ ga tuola‐nɛɛ vea ɣiini faa ma wiɛ ɣiini sɛ‐sɛ bo wiɛ ɣiini su ʋaa yɛ è ɣɛ velei Gala ge wo zu ʋaa yɛni la Kolai zaala zu.