Read Loma ƐFƐSƆITIƐ 5 Bible Online

ƐFƐSƆITIƐ 5 - Loma bible

ƐFƐSƆITIƐ 5

¹Tei tɔwɔ wo ga Gala wõila lea, a ɣɛ ga Gala po‐kɔ̃ɔ bea.

²A wiɛ ziɛ ga wõila mavele è ɣɛ velei Kolai wõini la ga diɛ é ɣi kulo ƃɔɔ zu de ʋaa ma é ƃɔɔ wulo ga zalaɣa wũ‐nɛɛ‐nɛɛ é ƃɔɔ ʋe Gala bɛ.

³Kɛ̀ wɛ̃ɛ‐ziɛ‐boga vɛɛ maa‐yɛ̃ɛlɛ tuo ɣaazɔ va ɔɔ kuu‐zu‐yii‐wuloa, maa lɛ nɛɛni fai niitiɛ tɔ ʋɔlɔ ƃalaa ɣɛ ga wo yɛpɛ woo. Tɛ lɛ zolowoni nui niitiɛ zaama te ga Gala na dɔ numaa.

⁴A mɛ lɛ ƃɔɔ wɔtɔ ɔ́ nɔ ɣɛ ga wo titi zɛpɛ wu ɔɔ wo numaa wãla‐ma ʋaa ɣɛ ga soloya‐wulo yɛpɛ. Natiɛ tɛ lɛ zolo‐woni. Kɛ̀ nii mugi wa kɛ tɔ ga wiɛ mama fe Gala bɛ.

⁵A la ga nii. Nui nɛpɛ é ga wɛ̃ɛ‐ziɛ‐bo nu ɔɔ maa‐yɛ̃ɛlɛ tuo‐wo nu pɔɔ laa lɛ ɣɛɛ Kolai ƃɔga Gala ta masadai va. Nui wɔnɔ é ga kuu‐zu‐yii nu pɔɔ laa lɛ ba, ƃɔvɛlaale kuu‐zu‐yii nu ɣa ga maa‐niini gala‐feli nu.

⁶Tuoi niitiɛ mazaƃu ɣa Gala na zii‐ɣaa‐wãlai ɣa ziiti la goo‐mɛni tala veaitiɛ ma. Na ma a mɛ lɛ laa zei wo ɣaa‐wɔlɔ goo wu nu ta nɛpɛ zeea.

⁷A mɛ lɛ vile wulu wa tiɛni.

⁸Ƃɔvɛlaale wo ɣɛni wɔlɔ ga ŋada ƃidia, kɛ̀ wa sa ga ŋada wodoa de maliɣii zaala zu. A ziɛ è ɣɛ ŋada wodoai zu vea.

⁹Toku seivɛ ga ŋada wodoai malɔnɔi ɣa vɛtɛ fai ɣaazɔ zu pagɛi é pele ma é ga gaama.

¹⁰A ɣaa ƃaa wiɛ fai nii ɣɛ yá ɣɛ ga de mailiɣii nɛɛ‐bɛ ʋaa.

¹¹A mɛ lɛ wɔɔ laa nɛpɛ too kpidi liitiɛ va. Te zu‐lɔnɔ lɛ ba. Kɛ̀ to mu a wiɛ te maʋaa wulo podo ɣala‐kala ga.

¹²Ƃɔvɛlaale tɔ ʋɔlɔ ƃalaa ga wũfe faa ga nu yɛpɛ é vile fai nii va ta kɛ doowu zu.

¹³Kɛ̀ ŋada wodoai ɣa ŋɛni ta nɛpɛ kulo na kala‐kala ga, maŋɛnii ɣa ɣɛ sa ga ŋɛnii nii nu ɣa ɣaazu la ma, ƃɔvɛ‐laale ŋɛni nɛpɛ nu ɣa ɣaazu la ma gaa ɣa wodo è ɣɛ ŋada wodoa.

¹⁴Na ma bogɛ mawoi ga “Yai è ŋiizu, ɣaazu lao è wu ziɣi saa ya, Kolai ɣa ʋolo è ma.”

¹⁵A wɛlɛ na va ga pagɔ ga velei wa ziɛ la, wo mɛ lɛ kɛ ga velei titi beaitiɛ ta kɛɛ la, kɛ̀ wo kɛ ga kele‐ɣele beaitiɛ ta dɛi ɣavele.

¹⁶A ɣaa ƃaa ga pelei ɣaazɔ zɔi wa zoo da wo kɛ siɛgi nii ʋaa ma, ƃɔvɛlaale siɛgi nii zu yowũvɛ.

¹⁷Na ma a mɛ lɛ titi kulo. Kɛ̀ nii é ga de maliɣii yii‐mai a gaa ɣa.

¹⁸A mɛ lɛ ƃe ba dɔɔ ɔ́ wo zo, ƃɔvɛlaale na ɣa ga bɛlɛ lala luo‐woga. Kɛ̀ a ƃe ba Gala baa ŋinɛgi é wo yii laa ʋe.

¹⁹A wiɛ ƃɔɛ ɣiini pɔ ga Gala daa‐maa‐lɛɛ wui‐loa wiɛ gui nɛɛ‐nɛɛ too de maliɣii ma ga yii ɣaazɔ.

²⁰A wiɛ mama fe de ɣeea Gala bɛ ga ɣee nɛpɛ ŋɛnii ɣaazɔ ʋaa ma de maliɣii Ziizɛ Kolai na daa‐zeigi zu.

²¹A wolo ɣiini bɛ wiɛ kɛ Kolai na wũfe‐mai zu.

²²Zini‐bɛ veaitiɛ, a wolo wo wɔɔ veaitiɛ vɛ è ɣɛ wa ɣɛ kɛɛzu de maliɣii vɛ.

²³Ƃɔvɛlaale nui é ga zunui tɔ ɣa é ga ŋázai mawũgi è ɣɛ velei Kolai la ga Gala pɛlɛi mawũgi. Gala pɛlɛi ɣa ga malɔtɔi. Tɔ ɣagi ɣa é ga Gala pɛlɛi valo nui.

²⁴Velei nɔ Gala pɛlɛi woloai la Kolai vɛ, vele nɔ na pagɛi zini‐bɛ vea te wolo la te wɔɔ veaitiɛ vɛ faa ɣaazɔ zu.

²⁵Wai wo ga ŋaza kɛɛ vea, a wõi ga wo ŋazaitiɛ è ɣɛ velei Kolai wõiya la ga Gala pɛlɛi é ɣi kulo ƃɔɔ zu maʋaa ma,

²⁶kɛɛ ʋaa ma é kulo su ga tee Gala faa ma. É Gala pɛlɛi maa ziɣia guo vele ma bɛ́ ga ziɛ ta Gala goi,

²⁷kɛɛ ʋaa ma é kɛ saala la Gala pɛlɛi ma gaazu, ŋada wo kolo ƃalaa mɛ lɛ ɣɛ ba ɔ́ nɔ ɣɛ ga su‐zei‐zu ɔɔ na mazii ɣavele ta nɛpɛ. Na ɣa ɣɛɛ na é ɣɛ ga ŋɛnii maa ɣa wuo kawɔ‐zu lɛ ɣɛɛ ba.

²⁸Vele nɔ na ƃalaa é la ga ŋaza kɛɛ veaitiɛ. Pagɛ te wõi ga te ŋazaitiɛ è ɣɛ velei te ƃɔɔ lɔtɔi wõini la. Nui é wõini ga ŋázai, manui ƃɔɔ ɣagi wõini.

²⁹Ƃɔvɛlaale nu ta lɛ wɔlɔ‐wɔlɔ zilia ga ƃɔɔ lɔtɔi. Kɛ̀ to mu towaa ɣɛ gaa wɔsu yíɛ sɛ‐sɛ bo è ɣɛ velei Kolai kɛɛzu la ga Gala pɛlɛi,

³⁰ƃɔvɛlaale dai de ga Gala pɛlɛ wu veaitiɛ da ga dɔtɔi ta.

³¹Ponɛvɛ Gala kɔlɔi zu mawoi ga “Nii mazaƃui ma zunu ɣa ƃe keea va ta dee é ɣata ŋazai va. Na ɣa ɣɛɛ na te felegɔ te ɣɛ ga ŋɛni ɣila.”

³²Nii ɣa ga faa ƃakpai doowugɛi yɛga. Nài gè ga Pɔɔ fai nii zu‐wulo‐zuvɛ ɣa gàazu ga Kolai ƃɔga Gala pɛlɛi.

³³Nii pɛ ge ɣɛɛvɛ, wo ɣile‐giledai a wõi ga wo ŋazaitiɛ è ɣɛ velei wo ƃɔɔ wõini la. Wai wɔnɔ wo ga ŋazaitiɛ, a wɛlɛ na va ga wa wũfesu wo wɔɔ veaitiɛ ma.