Read Loma ƐFƐSƆITIƐ 6 Bible Online

ƐFƐSƆITIƐ 6 - Loma bible

ƐFƐSƆITIƐ 6

¹Lopaitiɛ, a wo ɣaa veaitiɛ woo mɛni de maliɣii mavele ma, ƃɔvɛlaale na ɣa pele ma.

²“Wũfe è ɣeea ma ta è lee.” Tɔgi nii ɣa é ga tɔ maa wũ Gala na tɔ puugɔitiɛ zaama ki‐to pɛi ba.

³Ki‐togi mawoi ɣa ga “Nii ɣɛ kɛɛ ʋaa ma ŋetea nɛɛ yìɛ è lebi zui ɣa.”

⁴Duu keeaitiɛ, a mɛ lɛ kɛ wo leaitiɛ yii ɣaa ɔ́ wãla. Kɛ̀ a te lo ga te ɣɛɛ‐zɔ‐kulo vele te yee ma wiɛ te ɣala bo. A wiɛ niitiɛ ɣɛ de maliɣii na tuoi zu.

⁵Duoitiɛ, a wiɛ goo‐mɛni kulo niitiɛ ya te ga wa nu kɛɛ veaitiɛ ŋeteai nii zu wiɛ kɛ ga duo‐ba wiɛ ƃeli. Na ɣa ɣɛɛ na wo ɣi‐to‐su ɣɛ nɔ ɣile è ɣɛ wa ɣɛ kɛɛzu Kolai vɛ.

⁶A mɛ lɛ kɛ ga nu ɣaazu‐ʋaa‐ɣɛɛ vele wɔ ɣɛ kɛɛzu nu ƃuse yii‐laa ʋaa ma, kɛ̀ wiɛ kɛ è ɣɛ Kolai na tii‐ɣɛɛ vea, wiɛ Gala zii‐mai ziɣi yii ma wiɛ kɛ.

⁷A wiɛ tii ɣɛ wa ɣi‐gaa‐ziɛi vagɛi è ɣɛ wa ɣɛ kɛɛzu de maliɣii vɛ, ɛ́ lɛ ga nu ƃuse.

⁸A kwɛ̃ɛ ga faa vagɔi nɛpɛ nu ɣa kɛ towaa daamɔdai zɔlɔ wo wɔnɔ de maliɣii ya, manui ɣɛɛvɛ ƃalaa ga duo ƃaa é ɣɛ ga wɔɔlɔ.

⁹Wai wo ga duoitiɛ ta nu kɛɛ vea, a wiɛ daamɔdai ɣɛ ga tiɛ wo ƃɔlɔ ƃaa‐zaɣaga va te ma. A kwɛ̃ɛ ga nui nii é ga ta nu keea nu é wɔnɔ ga wa nu keea nu tɔ Gala ta. Tɔwɔ nu zu‐yɛvɛ faa nɛpɛ gɛ lɛ ná fai va.

¹⁰Maɣaa‐ƃelagi ɣa ga wo zu ƃaa. Wa na ɣɛ wo ɣɛɛ vele ma su ɣilekpu wa de maliɣiini, wiɛ kɛ wɔnɔ ná gaa‐ƃaa ɣee ɣaa‐ƃaa‐ƃaagi yee wu.

¹¹A Gala na kɔɔ‐wɔɔ zɔɔlai ɣaazɔ lɛ ma, kɛɛ ʋaa ma dɛvele na gbana luoi mɛ lɛ zoo wo la.

¹²Ƃɔvɛlaale a dɛ lɛ wɔɔzu nu ƃuse wɔ, kɛ̀ a da wɔɔzu niitiɛ wɔ gaa‐ƃaa te ya numaa maazu diɛ wɔ gaa‐ƃaa vea wɔ diɛ wɔ wɔnɔ maazu‐ʋaa‐wo‐bo bea ƃaazagitiɛ wɔ te zaa ƃidii ʋaa ma. Natiɛ ta ga tuo‐vele‐yowũ‐wulo ɣaa‐ƃai niitiɛ te gee wɔlɔgi zu te levegɛi nu ƃuse na gaa‐ƃai va.

¹³Na ma a Gala na kɔɔ‐wɔɔ zɔɔlai ɣaazɔ lɛ ma, kɛɛ ʋaa ma wo zoo wo lo kpãa faa yowũ‐ɣɛɛ ziɛgi zu. Wa na pɛ kulo na ba, wo yɛ loni ga lo pele.

¹⁴A lo kpãa. Wa nii ɣɛ ga wo wulu‐ɣili vele ga gaamai. Kɔɔ‐wɔɔ zɔɔlai nii é ga tele‐bo tuoi, a na ɣili wɔnɔ ɣeke su

¹⁵wo zii‐laa woo vagɔi ɣɛ ga wa wɔwaa wɔlɔ é kɛ wo lo kpãa.

¹⁶Nii pɛ ka wulo na ba, a zee‐la‐ma ziɣi ga kɔɔ‐wɔɔ zɔɔlai nii yá ƃaa nu maazu ga kolu ŋɛni mɛ lɛ lɔ ba wo kɛ ga ŋɛnii nii wa zoo wo tuo‐vele‐yowũ nui na mẽa ƃoei ɣaazɔ ɣaa yii la.

¹⁷Na ɣa ɣɛɛ na wo balolai mawɔɔlɔgi ziɣi wo Gala baa ŋinɛgi na boa zɔkpɔi ziɣi, na ɣa ga Gala goi.

¹⁸A wiɛ Gala feli ga siɛ nɛpɛ baa ŋinɛgi zaala zu wiɛ feli ga Gala‐feli vele mazii ɣaazɔ wiɛ wɔnɔ kɛ ga pee‐ʋee vele. A ɣɛ ɣi su wo ɣata maʋaa va wiɛ feli ná dɔ numaitiɛ ɣaazɔ ʋaa ma.

¹⁹A wiɛ wɔnɔ kɛ nài gè ga Pɔɔ màʋaa ma, kɛɛ ʋaa ma gè ɣɛ ga nui daa ɣa ʋa gìɛ fai nii wo é woo niinɛ vagɔi zu maʋaa loowugɛi yɛga gìɛ bo ga duo lala vele gìɛ bo ga woo maa zeezea.

²⁰Woo vagɔi nii ɣa tèvegɛi maʋaa ma yɔ̃wɔ é bà. A wiɛ Gala feli màʋaa ma kɛɛ ʋaa ma gìɛ bo ga duo lala vele è ɣɛ velei maa nɛɛ gìɛ bo da.

²¹Nii sa yá kɛ wo kwɛ̃ɛ ga velei gè la ta nii gè kɛɛzu, de wɔɔ nui nii é ga Tekekɔ é ga de wõila nu é wɔnɔ ga nui nu ɣa laa la de maliɣii na tii ʋaa ma, tɔ ɣa a fai nii ɣaazɔ ɣavele zu wulo wo ma.

²²Nii mazaƃui ƃɔɔƃɔɔ ka gè tevega la wo wɔ vɛ, kɛɛ ʋaa ma wo kwɛ̃ɛ ga velei gé la, na ɣa ɣɛɛ na é wo yii lɔ.

²³Zii‐lai ƃɔga wõilai nii zee‐la‐ma su nii yá wulo de ɣeea Gala zeea ta de maliɣii Ziizɛ Kolai towaa ɣɛ wo ya fãa, wai wo ga gé vaitiɛ.

²⁴Nui niitiɛ ɣaazɔ te wõiɣai ga de maliɣii Ziizɛ Kolai, ta wõilai wɛ̃ɛ gɛ lɛ ba máʋaa ma, maa‐wõi‐ɣaa ƃɔ‐ba ɣa wo ga tiɛ fãa.