Read Loma FELEPAITIƐ 4 Bible Online

FELEPAITIƐ 4 - Loma bible

FELEPAITIƐ 4

¹Na ma nà numaa, wai gè wo wõini gìɛ wo maa‐wõi‐wõi kulo, wai wo ga nà kuu‐zu‐nɛi ta nà ƃaa‐la‐mai, a lo kpãa nii mavele ma wo ɣɛɛ vele ma su ɣilekpu wa de maliɣiini, wai wo ga ẁõila veaitiɛ.

²Gà Yuwodia maa nɛɛnɛsu gìɛ Sẽteke maa nɛɛnɛ ga te woo la ma te ɣɛɛ vele ma su ɣilekpu ta de maliɣiini.

³Gà wɔnɔ bosu è ma ƃalaa pɛ, yài è ga bɔ̀ɔ lii‐ɣɛɛ nu ƃɔɔƃɔɔgi. Ƃɔ ŋazai niitiɛ va. Toku ge zei ga te vɛi ɣɛ bà gá tiɛni gíɛ tii ɣɛ woo niinɛ vagɔi zu, Kilɛmɛ vɛi sa te va ta bàa lii‐ɣɛɛ veai zɔitiɛ. Ta ga numaitiɛ ta laa‐zeigi wonɛi ʋululai mawɔlɔi zu.

⁴A wuu zu nɛɛ ga ɣɛɛ nɛpɛ wo ɣɛɛ vele ma su ɣilekpu wa de maliɣiini. Gè ɣɛ wɔnɔ wo ma, a wuu zu nɛɛ.

⁵Ƃe ba nu pɛ ge wa yii‐lɔɔ ʋai wɛ̃ɛ. De maliɣii maa ƃuovɛ sa.

⁶A mɛ lɛ yii zɛlɛ, kɛ̀ fai ɣaazɔ zu a kɛ Gala ge wo ƃala‐ma ʋaitiɛ wɛ̃ɛ Gala‐felia maazu ta maa‐nɛɛnɛ‐boga é vɛɛ mama‐feea va.

⁷Gala na zii‐lai nii nu ƃuse ta nɛpɛ gɛ lɛ gaa ɣaa ga ná kele‐ɣele towaa ƃaa wo yii maazu ta wa ɣi‐gaa‐ziɛi Ziizɛ Kolai zaala zu.

⁸Na pɛ ka ɣɛɛ na, nà numaa, nii nɛpɛ é ga gaama, nii nɛpɛ é ga ƃaa‐la‐ma ʋaa, nii nɛpɛ é ga tele‐bo faa, nii nɛpɛ maʋaa maa wuai, nii nɛpɛ é ga nu wõi‐ɣɛ‐ma ʋaa, nii nɛpɛ saala ma, ani wɔnɔ ŋɛni ta nɛpɛ ka na pagɛi baa pɛ ba, ani ŋɛni ta nɛpɛ ka na kuloai bu bɛ́ ga daa‐maa‐lɛɛ wo da, a ɣi gaa ziɛ é vile ŋɛnii niitiɛ va.

⁹Nii nɛpɛ wo maa wolia, nii kɔnɔ wo maa zɔlɔ woga ta nii wo mɛniga é vɛɛ fai nii va wo pɛtɛga nà ŋeteai zu, a te ɣɛ. Na ɣa ɣɛɛ na zii‐lai maƔalagi ɣa ɣɛ wo woba.

¹⁰Gà kuu‐zu‐nɛɛ wala wulozu gá de maliɣii gé ɣɛɛ vele ma su ɣilekpu. Na ɣa ga velei wo zɔƃɛlɛ yɛga la wɔlɔ màʋai zu tɔwɔ ná zu wooza sa, wo da ɣa lo wɔnɔ maʋai zu. Wo zɔƃɛlɛ ɣɛni màʋaa zu ga gaama, kɛ̀ wɛ lɛ ŋɛni pele zɔlɔ wosu.

¹¹Ɛ́ lɛ ga zili ɣa gè saɣazu é vile kpàla‐ma ʋaa va, ƃɔvɛlaale gè faa maa wolia ga togi nɛpɛ gè ɣɛ su ná zìi la.

¹²Gè kwɛ̃ni ga velei gà ziɛ la ná wu ani gà ɣɛ na ga mɔɔlɛ nu, kwɛ̃ɛgɛi wɔnɔ bɛ̀ ga velei gà ziɛ la ná wu ani gà ɣɛ na ga ŋɛni keea nu. Gè faa maa wolia pele mazii ta nɛpɛ su. Gè maa wolia pele mazii ɣaazɔ zu ga ani ŋɛni laa ɣa loo na, velei gà maziɛ wo da. Ani wɔnɔ ŋɛni mawulu ɣa loo na, velei gà maziɛ wo da. Ŋɛni ɣa lama na, ŋɛni mavala ka loo na wɔnɔ, gè kwɛ̃ni ga velei gà maziɛ wo da.

¹³Gà zoo gè faa pɛ kɛ nui nii zaala zu é sù ƃaazu.

¹⁴Na pɛ ge ɣɛɛvɛ, wo nu ƃɔɔ ʋaa ɣɛɛni ga velei wo wɔɔ laa ɣɛɛni la nà faa ƃaagi zu.

¹⁵Na ɣa ɣɛɛ na wai wo ga Felepaitiɛ, wa ƃɔɔ wo kwɛ̃ni ga woo niinɛ vagɔi maʋaa lɔɔ‐zei‐zuvɛ, tei gè ziɣini Masadoonia, Gala pɛlɛ ta ƃɔnɔ bu vea tɛ lɛ zeini ma tɔ vɛɛ bà ŋɛni‐ʋee ʋaa ma ta ŋɛni‐maa‐zɔlɔ‐wo faa é wulo wo wulu.

¹⁶Toku ge zei ga tei ƃalaa gè ɣɛni Tɛsɛlonaika, wo ŋɛni leveni bɛ̀ ga kpɔ‐ba, siɛ ta zu wo wote wɔnɔ wo ta ɣɛ.

¹⁷Ɛ́ lɛ ga gà saba ŋɛni maa vele ɣaa ziɛzu. Kɛ̀ gà pulu ga wo ŋɛnii nii zɔlɔ wo yá ɣɛ wa wulo‐nu‐ma ʋaa ma.

¹⁸Gè ʋɔɔnɛ maa zɔlɔ woga ga daa ʋega ta vɛi ba. Zèe laa ʋegɛ sa, tei tɔwɔ saba ŋɛnii niitiɛ wo te levega gè te maa zɔlɔ woga Ɛpafɔlɔdaitɔ ya. Tɔ ga faa‐nɛi wũ‐nɛɛ‐nɛɛ é ga zalaɣai Gala ka yee zei bu zíi lai maʋaa zu.

¹⁹Na ɣa ɣɛɛ na nà Galagi ɣa wo ƃala‐ma ʋai ɣaazɔ laa‐zɔ bo wiɛ è ɣɛ velei nɔ ná kpɛtɛi la saala‐malai zu wo ɣɛɛ vele ma su ɣilekpu wa Ziizɛ Kolaini.

²⁰Da Ɣalagi nii é ga de ɣeeai towa daa‐maa‐lɛɛ ɣa wo da wɔlɔ‐wɔlɔ ta wɔlɔ‐wɔlɔ. Nà nɔ yá ɣɛ.

²¹Waitiɛ nɛpɛ wo ga Gala na dɔ numaa, gè wo luoni a de ɣɛɛ vele ma su ɣilekpu da Ziizɛ Kolaini. Bàitiɛ gá tiɛni gé vɛ te wo luoni.

²²Gala na dɔ numaitiɛ ɣaazɔ te wo luoni, Siiza wɔ pɛlɛ wu veaitiɛ ta dɔ vele ƃɔɔƃɔɔ ma.

²³De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo yii zu fãa.