Read Loma KOLASAITIƐ 1 Bible Online

KOLASAITIƐ 1 - Loma bible

KOLASAITIƐ 1

¹Nài gè ga Pɔɔ, gè ga Ziizɛ Kolai na keelai ta Gala zii‐mai mavele ma, a de wɔi Temete vɛɛvɛ bà,

²gíɛ kɔlɔi nii wonɛ wo wɔ, wai wo Kolasai lai zu ga gé vaa de ɣɛɛ vele ma su ɣilekpu da Ziizɛ Kolaini. Wo wulovɛ su leelaa ga Gala na dɔa wo ga nui nu ɣa laa la. Gaazu‐maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta ɣɛ wo ʋaa ma fãa.

³Gá ɣɛ na Gala felizu wo ʋaa ma, gá Gala mama ga ɣee nɛpɛ nii é ga de maliɣii Ziizɛ Kolai keea.

⁴Ƃɔvɛlaale wo laa ʋai ga Ziizɛ Kolai ta ƃɔga wõilai é wo ya Gala na dɔ numaitiɛ ɣaazɔ ʋaa ma, gé mawoɔ mɛniga.

⁵Wa nii ɣɛɛzu wo ɣi‐to‐su ɣɛɛ ʋai ma ná Gala ta. Nii ɣa wo faa mɛniga é vile ba gaama woi zu, na ɣa ga woo niinɛ vagɔi

⁶nii é vaa wo wɔ. Ƃɔɔƃɔɔ su velei nɔ é ɣɛɛzu la ga zii pɛ, vele nɔ na tɔnɔ ɣɛɛzu la ba su yìɛ wɔɔlɔ ma wo ɣagi wo zaama, é ziɣi ƃɔɔ foloi na ma wo Gala na maa‐wõi‐ɣaa ƃɔ‐bai mawoi mɛnini da wo gaa ɣa ga ƃɔɔƃɔɔ su.

⁷Na ɣa ga velei nɔ wo maa wolini la gá wõila nui Ɛpafela nii ya é ga gé wɔɔ lii‐ɣɛɛ nu. Tɔ ga Kolai na tii‐ɣɛɛ nui nii nu ɣa laa la yíɛ kɛ de mazaƃu ma.

⁸Na ɣa ɣɛɛ na wõilai é wo ya Gala baa ŋinɛgi zaala zu, é dɛɛ ga gíɛ.

⁹Na ma é ziɣi foloi na ma gé wo maʋaa mɛnini da, gɛ́ lɛ dɛ ƃɔlɔni Gala‐felia va wo ʋaa ma. Gá Gala maa nɛɛnɛsu ga é kɛ wo yii laa ʋe ga kele‐ɣelegi nii pilegɛi zíi‐mai va yíɛ wo ɣele‐ɣele ná tuoi ɣaazɔ zu yíɛ kɛ wiɛ gaa ɣa,

¹⁰kɛɛ ʋaa ma wo tuoi nii wo yá zolowo de maliɣii ma wiɛ kɛ ga wo zíi la ga ƃɔɔƃɔɔ su. Na ɣa ɣɛɛ na tii vagɔi ɣaazɔ zu‐lɔnɔ yìɛ ɣɛ ba wo ya wiɛ wɔɔlɔ Gala fai maɣele‐ɣelegi zu.

¹¹Gala ka wo zu ƃaa fãa ga ná gaa‐ƃai ɣaazɔ. Wa zii‐lɔɔ wulo ná gaa‐ƃaa walai zaala zu wo ziɛ fai ɣaazɔ wu wiɛ te ɣɛ ga kuu‐zu‐nɛɛ.

¹²Wa ɣɛ de ɣeea Gala mamasu, na ɣa ga de ɣeeai nii é kɛɛ wo kulo bu ga ná numai niitiɛ te ŋada wodoai zu wo wɔɔ laa ɣɛ te weligi va.

¹³É de wuloa kpidi na gaa‐ƃai yee wu é de leve ná wõila lui na masadai zu.

¹⁴Na ɣa ga wõila lui nii de wũ maa wogɛi sáala zu, da ʋaa yowũitiɛ zu ʋaa yɛgɛi wɔnɔ sáala zu.

¹⁵Towa é ga po‐kɔ̃ɔgi Galagi nii ʋaa ma nu lɛ ɣaazu laa ma é ga Gala kpɛtɛ ŋɛniitiɛ pɛ te mamaa wũgi.

¹⁶Ƃɔvɛlaale sáala zu ɣa ŋɛni pɛ kpɛtɛi la, niitiɛ pɛ te gee‐zuvɛ ta zui, niitiɛ wɔnɔ nu ɣaazu ɣa la te ma ta niitiɛ nu ɣaazu lɛ laa te ma, é ɣɛni ga ɣalasoda ɔɔ maazu‐ʋaa‐wo‐bo bea, é ɣɛni kɔnɔ ga masada ɔɔ gaa‐ƃaa, ―te pɛ te ƃɛtɛni sáala zu te ƃɛtɛ maʋaa ma.

¹⁷Kɛ́ɛvɛ ŋetea ŋɛni pɛ tuo. Na ɣa ɣɛɛ na ŋɛni pɛ kpɔgɛi su ŋada ɣila sáala zu.

¹⁸Towa é ga kpɔɔ lɔtɔi mawũgi, na ɣa ga Gala pɛlɛi. Towa é ga faa lɔɔ‐zei‐zuvɛ é ga nu maa wũgi é wu ziɣini saa ya, kɛɛ ʋaa ma é ɣɛ ga fai pɛ maazu vele.

¹⁹Ƃɔvɛlaale é Gala zii laani ga velei é la Kolai ɣɛ ŋɛ na ga daa ʋega.

²⁰Na ɣa ɣɛɛ na te yɔɔzu ƃɛtɛ ta ŋɛni pɛ sáala zu, é ɣɛɛvɛ ƃalaa ga zui zu ɔɔ gee‐zuvɛ, yíɛ va ga zii‐laa máŋamai zaala zu é wuuni kpako gului ma.

²¹Na ɣa ɣɛɛ na waitiɛ wo wuloai wɔlɔ ɣɛ Gala ba, kpɔɛ é wo ɣigi zu, wiɛ tuƃo vele yowũ wulo,

²²é wo yɔɔzu ƃɛtɛɛ ná nu ƃuse lɔtɔi zu sai é boni mávele ma, kɛɛ ʋaa ma é wo ɣɛ ga nui maa ɣa wuo gáazu é ga nui faa lɛ ba, faa lɛ wɔnɔ yɛga ma.

²³Na ɣa ga ani wa ɣili na zee‐la‐mai maʋaa va wo logɛi kpãa wɛ lɛ ziɣizu wó ma, woo niinɛ vagɔi wo mɛniga wa ɣi‐gaa‐ziɛi lɛ ziɣizu maɣi‐togi wulu. Na ɣa ga woo niinɛ vagɔi nii bogɛi ʋulu ŋɛni ɣaazɔ ma gee wɔlɔgi wu é ga woo vagɔi nii nài gè ga Pɔɔ gè ɣɛɛ ga malii‐ɣɛɛ nu.

²⁴Tɔwɔ gà kuu‐zu‐nɛɛ wulozu nà daa‐nɔwɔ‐wogitiɛ zu wo mazaƃu ma. Na ɣa ɣɛɛ na nii mavala toai Kolai na faa ƃoei zu pagɛi é zei de ma, gà maʋaa laa wulo nà nu ƃuse ŋeteai zu Kolai ƃɔɔ lɔtɔi mazaƃu ma. Na ɣa ga Gala pɛlɛi

²⁵nii gè ɣɛɛ ga malii‐ɣɛɛ nu, è ɣɛ velei nɔ Gala ge tii nii ʋeea la zèea wo ʋaa ma, kɛɛ ʋaa ma gè kɛ numaa te Gala daa woi wɛ̃ɛ ƃɔɔ ga daa ʋega.

²⁶Na ɣa ga fai nii doowugɛi yɛga ga su woozaa, nà numaa ta wulo su na wulu vea ta dɔ lɛ gá te wulo su, kɛ̀ tɔwɔ maʋaa wuloa kɛnɛ ma sa Gala na dɔ numaitiɛ ɣaazu.

²⁷Fai nii doowugɛi yɛga ta ɣa Gala ge ʋaa bu ga é dɛ ga tiɛ ga velei maƃaa‐la‐mai wala wɔɔlɔi la zii ƃalaagitiɛ zaama. Maʋai ɣa ga Kolai ɣɛɛ ʋai wo yii zu. Towa é ga ƃaa‐la‐mai maɣi‐togi.

²⁸Towa gé maʋaa wosu ga woo maa zeezea gíɛ nu pɛ tɛnɛ gíɛ te ɣala bo kele‐ɣele faa ɣaazɔ zu, kɛɛ ʋaa ma gé kɛ nu pɛ gé ɣɛ ga nui kulo‐ɣɛɛ wogɛi bɛ́ bu ta Kolai te ɣɛɛ vele ma su ɣilekpu.

²⁹Nii mazaƃui ɣa gè mɔɔlɛzu la gìɛ wɔ ga gaa‐ƃai ɣaazɔ é pilisu kìgi zu ga kee ɣaa‐ƃaa.