Read Loma KOLASAITIƐ 4 Bible Online

KOLASAITIƐ 4 - Loma bible

KOLASAITIƐ 4

¹Wai wo ga duoitiɛ ta nu kɛɛ vea, a gaama luo wo ga tiɛ wo mɛ lɛ te ʋuulu, kwɛ̃ɛgɛi wo vɛ ga wa ƃalaa wa nu keea nu ɣa gee‐zuvɛ.

²A wũ gili Gala‐felia va wo lo su kpãa. A wɛlɛ na va ga wa kɛɛzu wiɛ kɛ ga mama‐feea Gala bɛ.

³A wiɛ Gala feli gé ʋaa ma ƃalaa pɛ, kɛɛ ʋaa ma Gala ge pele laa lao gé luo gói‐wo faa ma. Na ɣa ɣɛɛ na Kolai maʋai nii doowugɛi yɛga gé bo. Nà ɣa gè mavilisinelaa zu.

⁴Wo feli kɛɛ ʋaa ma gè maʋaa ɣaa wodo ga numaa è ɣɛ velei maa nɛɛ gè bo da.

⁵A wiɛ luo ga kele‐ɣele pele numai niitiɛ ya tɛ lɛ ga wo ta wo ɣaa ƃaa ga pelei ɣaazɔ zɔi wa zoo da wo kɛ siɛgi nii ʋaa ma.

⁶Pagɛ wo yɛpɛ woi ɣɛ ga woi a nɛɛ nu vɛ é ga woi nii kpolo ba, kɛɛ ʋaa ma wo kwɛ̃ɛ ga velei wa nu pɛ goo ɣaa wote da.

⁷Tekekɔ ɣa màʋai ɣaazɔ zu wulo wo ma. Tɔ ga de wɔi ta nii de wõiyai la é ga tii‐ɣɛɛ nui nii nu ɣa laa la. Tɔ ga gé wɔɔ lii‐ɣɛɛ nu gé ɣɛɛ vele ma su ɣilekpu gá de maliɣiini.

⁸Zaƃui ƃɔɔƃɔɔ gè tevesu ma tɔ ga wo kwɛ̃ɛ ga velei gé la. Na ɣa ɣɛɛ na é wo yii lɔ.

⁹Oonɛsima vɛɛvɛ bá. Oonɛsima ɣa ga nui nu ɣa laa la. Tɔ ga de wõila nui é ga de wɔi ta. Tɔ ga wa ɣagi wo ta. Fai nɛpɛgi é ɣɛɛ vɛ ta su wulo wo ma.

¹⁰Aluisitakɔ nii é ga bɔ̀ɔ vilisinei é wo luoni. Maki nii é ga Banaba deɣei é wo luoni. (Towa wo faa wɛ̃ɛga é vile maʋaa ɣavelei va. A vaa na wo wɔ vɛ, a yee zei bu.)

¹¹Ziizɛi nii dáa ga Jɔsita é vɛɛ bá te wo luoni. Gáitiɛ gé tii ɣɛɛzu Gala na masadai ʋaa ma, numai niitiɛ nɔ ɣa te sei‐kpoto‐ma wuuwui zu ga bàa lii‐ɣɛɛ vea. Ta ɣa te ga nà gaa‐nɛkpɛgi.

¹²Ɛpafela nii é ga wa ɣagi wo ta é ga Ziizɛ Kolai na tii‐ɣɛɛ nu é wo luoni. Gaamai zu tɔ Gala felizu wɔ wo ʋaa ma ga kpaanaga ga wo ɣɛ ga nui kuloai bu bɛ́ wo lai ga Gala zii‐ma ʋai ɣaazɔ ga daa ʋega.

¹³Ƃɔvɛlaale gà seele woo ʋeezu máʋaa ma ga é tii ɣɛɛ ga kpaanaga wo ʋaa ma é vɛɛ numai niitiɛ va te Laodisia ta Hayɛla‐poli.

¹⁴Luki nii é ga de wõila wui zowoi ta ƃɔga Dima te wo luoni.

¹⁵A bo de vaitiɛ ma te Laodisia ga gè te luoni, wo bo Nẽfa ma é vɛɛ Gala pɛlɛ wu nu ƃulugi va yá wũi ná pɛlɛi wu ga gè te luoni.

¹⁶Kɔlɔi nii ɣa lodo na wo ma, a kɛ ƃalaa pɛ é lodo Laodisiaitiɛ ta Ɣala pɛlɛi wu veaitiɛ ma. Wo wɛlɛ na va ga wo kɔlɔi na lodo ƃalaa pɛ kuloai Laodisia.

¹⁷A bo Akipɔ ma wo ɣɛ ma, “Wɛlɛ na va ga tii è maa zɔlɔ woga wo ɣɛɛ vele ma su ɣilekpu wa de maliɣii, è malii ɣɛ.”

¹⁸Nài gè ga Pɔɔ nà ƃɔɔ ɣa gè daali‐ma woi niitiɛ wonɛzu ƃɔɔ yee ma. A ɣi zɛ nà kpeewɔi ʋaa zu. Maa‐wõi‐ɣaa ƃɔ‐bai ɣa ɣɛ wo ʋaa ma fãa.