Read Loma 1 TƐSƐLONAIKAITIƐ 1 Bible Online

1 TƐSƐLONAIKAITIƐ 1 - Loma bible

1 TƐSƐLONAIKAITIƐ 1

¹Nài gè ga Pɔɔ, Sevaanɔ ƃɔga Temete te vɛɛvɛ bà, gíɛ kɔlɔi nii wonɛ Tɛsɛlonaika Ɣala pɛlɛ wu nu ƃulugi wɔ, na ɣa ga niitiɛ ta Galani te su ɣilekpu é vɛɛ de maliɣii Ziizɛ Kolai va. Maa‐wõi‐ɣaa ƃɔ‐bai ƃɔga zii‐laa ta ɣɛ wo ʋaa ma fãa.

²Gá Gala mama ga ɣee nɛpɛ wo pɛ wo ʋaa ma. Wo laa ɣa gé la wɔ gá Ɣala‐feli woi zu.

³Wa yee‐la‐ma lii ƃɔga wa wõila mɔɔlɛi wo bosu é vɛɛ wo ɣi‐kata fai va de maliɣii Ziizɛ Kolai va, gɛ́ lɛ yeemazu te maʋai ma da Ɣalagi ɣaazu nii é ga de ɣeeai.

⁴Ƃɔvɛlaale gé kwɛ̃ni, nà numaa, ga wai wo wõiyai Gala bɛ é yee ƃadoga wo va.

⁵Toku ge zei ga woo niinɛ vagɔi gé vaani la ɛ́ lɛ nɔ ziitini wiɛ laa woo zu ɔ́ wɛ̃ɛ minɛ va. Kɛ̀ gé boni wiɛ gaa‐ƃaa zu ƃalaa pɛ, Gala baa ŋinɛgi yɛ wɔnɔ ba é va, gíɛ bo wiɛ ga gé laa vele la gé wolo wulu ma. Nui nii mazii gé ƃɔɔ lɛɛni ga gá le wo zaama wo mazaƃui ma, wo kwɛ̃ni.

⁶Tɔwɔ wo ɣɛɛni ga gé laa‐wo‐kɔ̃ɔ bea wo ɣɛ ga de maliɣii laa‐wo‐kɔ̃ɔ bea, ƃɔvɛlaale woi ziitini wo ma faa ƃoei ƃakpa maazu wo yee zei bu ga kuu‐zu‐nɛi nii Gala baa ŋinɛgi pilini wo yii zu.

⁷Nii mavelei ma taitiɛ ɣaazɔ te Kolai ʋaa ziɣia ga gaama Masadoonia ta Akeea wo ɣɛɛni ga po‐kɔ̃ɔ te ʋaa ma.

⁸De maliɣii woi lɛ nɔ wuloni wo la ɔ́ ziiti Masadoonia ta Akeea ɔ́ wɛ̃ɛ na va. Kɛ̀ wo laa ʋai ga Gala maʋai é zia ŋada ɣaazɔ ʋɔlɔ sa ga faa ta nɛpɛ gɛ lɛ gé la ga gé bɔ.

⁹Ƃɔvɛlaale numaitiɛ ta ɣagi ta bosu é vile gé va ga velei wo yee zeini la gé wu ta velei wo wulu ɣaa ʋega la maa‐niini galaga va wo va Gala pɔ, kɛɛ ʋaa ma wo tii ɣɛ ʋululai maƔalagi nii vɛ é ga gaama Ɣalagi.

¹⁰Na ɣa ɣɛɛ na wiɛ dúi Ziizɛ maa kpowũ é wulozu gee‐zuvɛ, nii é bu ziɣini saa ya. Na ɣa ga Ziizɛi nii é de wulozu Gala na zii‐ɣaa‐wãlai zu é vaazu vaazu.