Read Loma 1 TƐSƐLONAIKAITIƐ 3 Bible Online

1 TƐSƐLONAIKAITIƐ 3 - Loma bible

1 TƐSƐLONAIKAITIƐ 3

¹Na ma tei sa gɛ́ lɛ ŋɛni zoosu gɔ́ ziɛ ná wu, gé yii lai ɣɛ ga gá letele gé yɛ na wulu Aatɛ̃ lai zu.

²Gé zɛba do sa gé gé wɔi Temete leve nii é ga nui ta Gala te tii ɣɛɛzu ma Kolai mawoo niinɛ vagɔi‐wo fai zu. Gé teveni ga é wo lo kpãa wa yee‐la‐mai zu é wo lɛnɛ ga kpaanaga,

³kɛɛ ʋaa ma faa ƃoei niitiɛ te mɛ lɛ nu ta yii wu ziɣi. Wa ƃɔɔ wo kwɛ̃ni ga nii ɣa é de luo ga é ɣɛ ga diɛ.

⁴Ƃɔvɛlaale tei gé ɣɛni wo wɔ vɛ, gé ná yɛni ná luo gé bo wo ma ga faa ƃoei ɣa vaazu zeizu de ma. Tɔwɔ wa ƃɔɔ wo kwɛ̃ni ga é leveni sa ma.

⁵Nii mazaƃui ma, tei sa nà ƃɔɔ gɛ̀ lɛ ŋɛni zoosu gɔ̀ ziɛ de ɣaa‐wɛɛ ʋai wu, gè nu leveni kɛɛ ʋaa ma gè faa wɛ̃ɛ é vile wa yee‐la‐mai va gìɛ luo ga ɣee ta tɛ‐ga‐wo nui é wo lɛɛ sa gá gá mɔɔlɛi maʋaa wɔ gé ɣɛ sa ga ƃɔɔvɛ ʋaa.

⁶Kɛ̀ tɔwɔ Temete wuloa sa wo wɔ vɛ é va gé wɔ. É vaa gé wɔ ga woo vagɔ é vile wa yee‐la‐mai va ta wa wõilai. Na ɣa ɣɛɛ na é boga gé ma ga gé laa ɣi pagɔ ɣa wo ɣa ga ɣee nɛpɛ wiɛ ná maa‐wõi‐wõi kulo ga wo wɛlɛ gé va, è ɣɛ velei nɔ gé ná maa‐wõi‐wõi kulozu la ga gé wɛlɛ wo va.

⁷Nii mazaƃui ma, nà numaa, gé ɣaa nɛkpɛgɛ gá ʋaa ƃoei ɣaazɔ zu ta gá ʋaa ƃaagi ɣaazɔ wa yee‐la‐mai zaala zu.

⁸Ani wa lo na kpãa wo ɣɛɛ velei ma su ɣilekpu wa de maliɣiini, gá sa gá debigi wo.

⁹Mama tiigo zɛƃɛ ɣa gá zoo gé fe gá Ɣalagi vɛ kuu‐zu‐nɛi ɣaazɔ ʋaa ma é woga ga gíɛ gáazu wo mazaƃu ma?

¹⁰Gá felizu ga kpaanaga kpidi vɛɛ folo va kɛɛ ʋaa ma a da wani de ɣaazu too kii zu. Na ɣa ɣɛɛ na nii balagɛi wa yee‐la‐mai zu gé na maʋaa laa‐zɔ bo wiɛ.

¹¹Tɔwɔ da ɣalagi nii é ga de ɣeeai tɔ ɣagi vɛɛ de maliɣii Ziizɛ va ta pele wulo ga gíɛ ga gé va wo wɔ vɛ fãa.

¹²Na ɣa ɣɛɛ na de maliɣii ɣa wo wɔɔlɔ wõila zu é wõila zu wɔɔlɔ ma wo ya ɣiini faa má é vɛɛ nu pɛ ba fãa. Wa kɛ è ɣɛ velei nɔ gé kɛɛzu la ga wiɛ.

¹³Towaa nii ɣɛ kɛɛ ʋaa ma wo yii ƃaa faa nɛpɛ ge mɛ lɛ ɣɛ ba maa wuai da Ɣalagi nii ɣaazu é ga de ɣeeai. Nii ɣa ɣɛ ga ʋoloi de maliɣii Ziizɛ ɣa ɣɛ vaazu la ná dɔ numaitiɛ ɣaazɔ vɛi ba.