Read Loma 1 TƐSƐLONAIKAITIƐ 4 Bible Online

1 TƐSƐLONAIKAITIƐ 4 - Loma bible

1 TƐSƐLONAIKAITIƐ 4

¹Na pɛ ka ɣɛɛ na, nà numaa, gá wo maa nɛɛnɛsu gíɛ wo yii lɔ de maliɣii Ziizɛ na daa‐zeigi zu ga kɛni wo Gala zii‐laa luo wo è ɣɛ velei wo maa wolia la gé ya. È ɣɛ velei nɔ wo kɛɛzu la, a kɛ ƃɔɔ nɔ ŋɛ na wiɛ lii la ga zee luo vele.

²Ƃɔvɛlaale deʋei niitiɛ gé daa wo ya de maliɣii Ziizɛ zaala zu wo te wɛ̃ni.

³Nii ɣa é ga Gala zii‐mai. Tɔ ga wo wulo su ga tee máʋaa ma, wo ƃɔɔ ƃe teve wɛ̃ɛ‐ziɛ‐boga va.

⁴Tɔ ga wo ɣile‐giledai wo kwɛ̃ɛ ga velei wa ŋaza ɣaa ziɛ la ƃɔɔ ʋaa ma. Wo kɛ ga fai maa wuai wo kɛ ga ƃaa‐la‐ma ʋaa.

⁵Ɛ́ lɛ ga wo kɛ nɔ ŋaza‐wõi‐wulo‐ma ʋaa ma è ɣɛ velei zii ƃalaagitiɛ ta kɛɛ la niitiɛ tɛ lɛ Gala kwɛ̃ni.

⁶Gala zii‐mai ɣa ga nu mɛ lɛ ƃaa wo bɔɔ nu ma ɔ́ woia dɔ ma ŋázai ʋaa zu, ƃɔvɛlaale de maliɣii ɣa é ga poto‐kulo‐wo nui fai niitiɛ ɣaazɔ zu, è ɣɛ velei gé ná yɛni la ná luo gé wo lɛnɛ da.

⁷Su‐wulo‐zu ɣa ga Gala gɛ lɛ de lilini ga de ɣɛ ga nui maa lɛ ziɣini, kɛ̀ é de liliga ga de ɣɛ ga nui maa wuai.

⁸Na ma nui nɛpɛ nii maʋaa ɣa vala gáazu, nu ƃuse lɛ na maʋaa ɣa vala manui ɣaazu, kɛ̀ Galagi nii ve é baa ŋinɛgi levesu wo wɔ.

⁹Tɔwɔ a lii na ga de vaitiɛ wõi ʋai wɔɔ laa vele de vɛ, ɛ́ lɛ dɛ ga kɛni nu ta ɣa kɔlɔ wonɛ wo wɔ, ƃɔvɛlaale wa ɣagi Gala ge wo ɣala boga ga wo wõi ga ɣiini.

¹⁰Ƃɔɔƃɔɔ́ su wo wõivɛ ga de vaitiɛ Masadoonia yui wɔlɔ‐kɔlɔ ma ɣaali. Kɛ̀ nà numaa, gá wo lɛnɛsu ga wiɛ kɛ nɔ ŋɛ na kelẽi wiɛ lii la

¹¹wiɛ wõi ɣɛ ga wo ŋetea ɣɛ ga gaa‐lei vele wo ɣaazu ɣɛ nɔ luo. Na ɣa ɣɛɛ na a wiɛ tii ɣɛ ga yee è ɣɛ velei gé deʋeni la gé da wo ya,

¹²kɛɛ ʋaa ma niitiɛ tɛ lɛ ga wo ta wo kulo bu ga nui ta wũfe ma, wo mɛ lɛ zɛlɛ nu nɛpɛ ba.

¹³Nà numaa, gɛ́ lɛ wõini wɔ yɛ liti su é vile niitiɛ va te laa yee ma, maa‐wõi mɛ lɛ loo wo ma è ɣɛ velei yá ɣɛɛ la ga numai niitiɛ te ɣi‐to‐su lɛ ma.

¹⁴Su‐wulo‐zu ɣa ga tei tɔwɔ siɣiai diɛ ga gaama ga Ziizɛ zaani é wu ziɣi saa ya wɔnɔ, vele nɔ na niitiɛ te laa la yee ma Gala ka te wu ziɣi la é te vɛɛ Ziizɛ va. Towaa nii ɣɛ Ziizɛ zaala zu.

¹⁵Gá nii wosu wiɛ ga de maliɣii woo. Na ɣa ga daitiɛ da yɛ ŋetea é yɛsu de maliɣii va dɛ lɛ loga niitiɛ luo te laa yee ma.

¹⁶Ƃɔvɛlaale deʋe woi ɣa lɛɛ na, Gala ta ɣeela walai ƃɔɛ, na ɣa ɣɛɛ na Gala na pui woo lɛ, de maliɣii tɔ ɣagi towaa wulo gee‐zuvɛ é vile. Na ɣa ɣɛɛ na saa veai niitiɛ ta Kolaini te su ɣilekpu ta wu ziɣi ɣaʋu pa.

¹⁷Daitiɛ sa da ɣɛ dɛ ŋetea, dɛ lɛ zaa, da vɛɛ te va é lɛ ga diɛ tine ƃiligi zu, da de maliɣiini de wũi gee‐zuvɛ. Na ɣa ɣɛɛ na da sa da yɛ de maliɣii va wɔ.

¹⁸Na ma a ɣiini gaa nɛkpɛ ga woi niitiɛ.