Read Loma 1 TƐSƐLONAIKAITIƐ 5 Bible Online

1 TƐSƐLONAIKAITIƐ 5 - Loma bible

1 TƐSƐLONAIKAITIƐ 5

¹Nà numaa, ani a lii na ga kuu ʋai wɔ vele ta siɛgi, ɛ́ lɛ dɛ ga kɛni mawɔlɔ ɣa wonɛ wo wɔ.

²Ƃɔvɛlaale wa ƃɔɔ wo kwɛ̃ni kalãi ga de maliɣii na kui ɣa ziiti nɔ è ɣɛ wũmɔ nu ɣa yɛ kpidi zu é va.

³Numaa ta ɣɛ na ɣɛɛzu tea, “Zii‐laa ɣa gé ya gé wuloai faa zu,” te zu‐ŋala‐ŋala faa ɣa wulo nɔ te wũ maazu kpɛsɛ, è ɣɛ velei kuu‐zu‐wãla ɣa vɛɛ la ko ŋaza va. Tɔwɔ pele nɛpɛ gɛ lɛ ɣɛɛ na tɔ wulo la su.

⁴Nà numaa, de maliɣii na kui ʋaa ɣaa lɛ ƃidini ga wiɛ, kɛɛ ʋaa ma yá ziiti na maʋai ɔ́ wulo ga wiɛ è ɣɛ wũmɔ nu ɣa va.

⁵Ƃɔvɛlaale wa ga ŋada wodoai zu vea wo ga gela‐bogai zu vea. Dɛ lɛ ga kpidi zu vea.

⁶Na ma a de mɛ lɛ ŋii è ɣɛ velei zɔitiɛ ta kɛɛ la, kɛ̀ a de yɛ ɣaazu ma de ɣaazu lai ga daa vele.

⁷Ƃɔvɛlaale taitiɛ ta ŋii ta ŋii ga kpidi. Niitiɛ wɔnɔ te ga dɔɔ‐ƃoale vea dɔɔ ɣa te zo ga kpidi.

⁸Kɛ̀ tei a de ga gela‐bogai zu vea, ƃe ba a de yɛ ga ɣaazu levea. Na ɣa ɣɛɛ na zee‐la‐mai ƃɔga wõila, a de natiɛ lɛ ɣekegi ma ga da wɔɔ‐wɔɔ maa‐ɣili sɔɔla. A de mawɔɔlɔgi ɣɛ ga balolai maɣi‐togi.

⁹Ƃɔvɛlaale Gala gɛ lɛ yee ƃadoni de va ga de ná zii‐ɣaa‐wãlai maa zɔlɔ wo. Kɛ̀ é yee ƃadoni de va ga de balolai maa zɔlɔ wo de maliɣii Ziizɛ Kolai zaala zu.

¹⁰Na ɣa ga Ziizɛi nii é zaani de ʋaa ma, kɛɛ ʋaa ma a de yɛni ŋetea ƃaa de zaani a de vɛɛ bá da tiɛni diɛ ŋetea ɣɛ.

¹¹Na ma a wiɛ ɣiini zii lɔ wiɛ ɣiini maʋaa li ga zee luo vele ŋeteai zu, è ɣɛ velei wo kɛɛzu la.

¹²Kɛ̀ nà numaa, gá kɛɛzu ga pee‐ʋee vele wo vɛ ga wo wũfe numai niitiɛ ma te wo zaama tiɛ mɔɔlɛ te wo maazu wa tiɛni wo ɣɛɛ vele ma su ɣilekpu wa de maliɣiini tiɛ wo lɛnɛ.

¹³Na ɣa ɣɛɛ na a wiɛ te maʋai wala ziɣi ƃɔɔ ga gaa wua wõila zu ta lii mazaƃu ma. A ŋeteai ɣɛ ga ɣiini ga zii‐laa.

¹⁴Gá bosu wiɛ ga tɛnɛ goo, nà numaa, ga wo fii‐ƃɛɛ vea lɛnɛ, niitiɛ te yii lɛ lɔɔni wo te yii lɔ, wo ƃɔ niitiɛ va zobo gɛ lɛ te vɛ, wo yii lɔ te pɛ te ya.

¹⁵A wɛlɛ na va ga wo ta nɛpɛ ge mɛ lɛ faa yowũ woto kulo ga faa yowũ. Kɛ̀ to mu wiɛ pele ɣaa ziɛ ga siɛ nɛpɛ ga wo faa vagɔ ɣɛ ga ɣiini wiɛ kɛ ga nu pɛ.

¹⁶A wiɛ kuu‐zu‐nɛɛ wulo ga ɣee nɛpɛ.

¹⁷A wiɛ Gala feli ti‐ti

¹⁸wiɛ mama fe bɛ́ faa zii ɣaazɔ zu. Ƃɔvɛlaale na ɣa é ga Gala zii‐mai wo ʋaa ma Ziizɛ Kolai zaala zu.

¹⁹A mɛ lɛ ƃesa Gala baa ŋinɛgi na tii luo,

²⁰wo ɣaazu mɛ lɛ wudɛ Gala daa woo‐wogai maazu.

²¹Kɛ̀ a fai pɛ kɔ̃ɔ‐kɔ̃ɔ, nii pagɛi wo ɣata na maʋaa va

²²wo ƃe teve faa yowũ mazii ɣaazɔ va.

²³Zii‐laa Ɣalagi tɔ ɣagi towaa wo wulo su leelaa fãa é wolo wulu ma ga wo ɣɛ ga ná dɔa. Na ɣa ɣɛɛ na wa ɣi‐gaa‐ziɛi pɛ, wo yɛʋui pɛ, é vɛɛ wo malɔtɔi va, towaa te za‐su wuo fãa faa lɛ vɛɛ te va ga de maliɣii Ziizɛ Kolai vaa ʋoloi.

²⁴Nui nii é wo lilisu tɔ ga nui nu ɣa laa la. Towaa kɛ.

²⁵Nà numaa, a Gala feli gé ʋaa ma.

²⁶A de vaitiɛ ɣaazɔ luo ga ná maa wua.

²⁷Gè deʋea gè da wo ya de maliɣii mavele ma ga wo kɛ kɔlɔi nii lodo wo vaitiɛ ɣaazɔ ma.

²⁸De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo ʋaa ma fãa.