Read Loma 2 TƐSƐLONAIKAITIƐ 1 Bible Online

2 TƐSƐLONAIKAITIƐ 1 - Loma bible

2 TƐSƐLONAIKAITIƐ 1

¹Nài gè ga Pɔɔ, Sevaanɔ ƃɔga Temete te vɛɛvɛ bà, gíɛ kɔlɔi nii wonɛ Tɛsɛlonaika Ɣala pɛlɛ wu nu ƃulugi wɔ, na ɣa ga niitiɛ ta Galani te su ɣilekpu é vɛɛ de maliɣii Ziizɛ Kolai va.

²Gaazu‐maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta de maliɣii Ziizɛ Kolai ta ɣɛ wo ʋaa ma fãa.

³Nà numaa, tɔ ga gé vaa ʋaa ga gíɛ Gala feli wo ʋaa ma wɔ. Solowogɛ ga gá kɛ, ƃɔvɛlaale wa yee‐la‐mai ɣa wɔɔlɔzu ga kɛlɛ‐ɣɛlɛ ma vele, wõilai é wo pɛ wo ya ɣiini faa ma nà zu yíɛ wɔɔlɔ ma.

⁴Na ma gá ɣagi wo mayoka tevezu Gala na pɛlɛitiɛ wu. Gá nii ɣɛɛzu wo lo fai ma kpãa ta wo lai bogɛi ga Gala kpɔɔlagi ɣaazɔ zu é wosu ga wiɛ ta faa ƃoeí é zeizu wo ma wiɛ yii lɔ te ɣa.

⁵Nii ɣa ga seele Gala na tele‐bo faa‐wo‐gaa‐leveai ʋaa ma, kɛɛ ʋaa ma é kɛ wo kulo bu Gala na masadai nii ʋaa ma wo malaa‐nɔwɔ‐wogi wosu.

⁶Su‐wulo‐zu ɣa ga Gala ka siɣizu ga fai é pele ma ga taitiɛ te faa ƃoei zeiya wo ma é poto kulo te ma ga faa ƃoei.

⁷Na ɣa ɣɛɛ na wai faa ƃoei zeiya wo ma towaa wo vɛɛ gé va é doowo fe a de ya. Towaa nii ɣɛ ga ʋoloi de maliɣii Ziizɛ ɣa wulo la gee‐zuvɛ maʋai wulo kɛnɛ ma ná kee‐ɣaa‐ƃaa ɣeelaitiɛ te wuloai Gala ta natiɛ te bá ŋabu‐zogi zu

⁸yíɛ sa poto‐kulo wo niitiɛ ma tɛ lɛ Gala kwɛ̃ni yíɛ kulo niitiɛ ma tɛ lɛ wui tosu de maliɣii Ziizɛ mawoo niinɛ vagɔi ma.

⁹Ta lɔ‐kpɛ‐mai ɣa ɣɛ ga su‐ŋala‐ŋalagi yá wo ga tiɛ maʋaa wɛ̃ɛ gɛ lɛ ɣɛɛ ba. Na ɣa ɣɛɛ na ta ziɣi de maliɣii ɣaazu te wulo ná ƃaa‐la‐ma ɣee ɣaa‐ƃai yee wu.

¹⁰Nii ɣa ɣɛ ga ʋoloi yá vaa la ga ná dɔ numaitiɛ te ƃaa la má, taitiɛ ɣaazɔ te maʋaa ziɣia ga gaama maʋaa vili te ma ga ki‐gaa‐ziɛ. Ƃɔvɛlaale seele woi gé boni wo ma wo siɣini ga gaama.

¹¹Nii mazaƃui ɣa gé Gala felizu la ga ɣee nɛpɛ wo ʋaa ma ga gá Ɣalagi é wo ɣɛ ga nui kuloai bu bɛ́ ná tiligi ʋaa ma. Na ɣa ɣɛɛ na faa vagɔi nɛpɛ wo deʋea ga wo kɛ é vɛɛ zee‐la‐ma lii va, é te leve ma ga ná gaa‐ƃai.

¹²Towaa nii ɣɛ kɛɛ ʋaa ma wo ƃaa la de maliɣii Ziizɛ na daa‐zeigi ma, ƃaa wɔ ge la wo ma sáala zu, è ɣɛ velei nɔ da Ɣalagi na maa‐wõi‐ɣaa ƃɔ‐bai la ta de maliɣii Ziizɛ Kolai.