Read Loma 2 TƐSƐLONAIKAITIƐ 3 Bible Online

2 TƐSƐLONAIKAITIƐ 3 - Loma bible

2 TƐSƐLONAIKAITIƐ 3

¹Na pɛ ka wulo na ba, nà numaa, a wiɛ Gala feli gé ʋaa ma, kɛɛ ʋaa ma de maliɣii woi ziɛ ga maa ʋilea, ƃaa ƃakpa la ma è ɣɛ velei é ɣɛɛni la wo zaama.

²A feli wɔnɔ ga é gé wulo wãla‐lɔɔ veaitiɛ yee ma niitiɛ te luƃo vele yowũai, toku ge zei ga nui pɛ ge lei zee‐la‐ma ɔ́ ɣɛ zéea.

³Kɛ̀ de maliɣii ɣa ga nui nu ɣa laa la. Towaa wo zu ƃaa é ƃaa wo maazu ga tuƃo‐vele‐yowũ nui mɛ lɛ faa ɣɛ ga wiɛ.

⁴Na ɣa ɣɛɛ na gé laavɛ la de maliɣii zaala zu ga fai niitiɛ gé deʋezu gíɛ da wo ya wa te ɣɛɛzu. Tɔwɔ wa vaazu ɣɛɛzu nɔ te ɣɛɛzu.

⁵De maliɣii ɣa nii ɣɛ wo vɛ fãa. Na ɣa ga towaa wo ɣigi wote Gala na wõila ʋaa ma é pote wɔnɔ Kolai na gili‐faa‐vai ʋaa ma.

⁶Tɔwɔ nà numaa, a ziɛ ga’ deʋei nii gé daazu wo ya de maliɣii Ziizɛ Kolai na daa‐zeigi zu. Na ɣa ga wo ƃe teve wo wɔi nii va yá ɣɛ fii‐ƃɛɛ luo wosu, to mu ɛ́ lɛ ɣɛɛ luozu ɔ́ zolowo de yaa ʋai nii ma é wuloa gé ya é ziiti te ma.

⁷Wa ƃɔɔ wo kwɛ̃ni ga maa nɛɛvɛ wiɛ gé laa wo‐kɔ̃ɔ. Gɛ́ lɛ ŋɛni fii‐ƃɛɛ wulozu gé ɣɛi ma wo wɔ vɛ.

⁸Gɛ́ lɛ ŋɛni nu ta nɛpɛ na daa‐mii ŋɛni miini gɔ́ ƃe maʋɔɔnɛ‐ʋee ɣɛɛzu. Kɛ̀ to mu gé tii ɣɛɛni kpidi vɛɛ folo va gíɛ ɣɛ talakpa‐talakpa ga mɔɔlɛ, kɛɛ ʋaa ma gé mɛ lɛ ɣɛ ga wo ta nɛpɛ wũmɔ ɣasɔ.

⁹Su‐wulo‐zu lɛ ga ɛ́ lɛ ŋɛni ga gá woo gaama ʋaa ga gé na ɣɛ. Kɛ̀ gé kɛɛni ga gé po‐kɔ̃ɔ dɛ ga wiɛ gé luo velei zu ga wo ziɛ la.

¹⁰Tei ƃalaa gé ɣɛni wo wɔ vɛ, gé deʋe laani wo ya. Na ɣa ga nui nɛpɛ lɛ tii ɣɛɛ manui mɛ lɛ laa mi.

¹¹Ƃɔvɛlaale gá mɛnisu ga nui taniga ta wo zaama te ʋii ƃɛi te nɔ ga nui niitiɛ te laa lɛ ziɣia te vaa ʋaa zu, tɔwɔ tɛ lɛ tii nɛpɛ kɛɛzu.

¹²Gá daazu na ɣavele veaitiɛ ya ga tɔ gíɛ te lɛnɛ ga kpaanaga de maliɣii Ziizɛ Kolai na daa‐zeigi zu ga te ɣaa yii tuoi na va te ta lii ɣɛ ga te ƃɔɔ vaa ʋaa‐ɣɛɛ ŋɛni zɔlɔ wo.

¹³Nà numaa, a mɛ lɛ ƃɔlɔ faa vagɔ‐ɣɛɛ va.

¹⁴Ani nu ta nɛpɛ gɛ lɛ ŋɛni kɛɛni ɔ́ goo‐mɛni kulo faitiɛ zu gé ponɛɛ kɔlɔi nii zu, a ɣi zɛ manui zu, wa ʋaa nɛpɛ ge mɛ lɛ ɣɛ manui na faa zu, kɛɛ ʋaa ma wũfe ge vili má.

¹⁵A mɛ lɛ siɣi ga wo zili yɔ̃wɔ, kɛ̀ wa tɛnɛ, tei tɔwɔ a ɣɛ ga wo wɔi ta.

¹⁶Nii é ga zii‐lai maliɣii tɔ ɣagi towaa zii‐laa ʋe wo ya ga ɣee nɛpɛ fãa yiɛ fe pelei ɣaazɔ zu. De maliɣii ɣa ɣɛ wo woba fãa.

¹⁷Nài gè ga Pɔɔ nà ƃɔɔ ɣa gè daali‐ma woi niitiɛ wonɛzu ƃɔɔ yee ma. Nii ɣa é ga zèe‐wogi kɔlɔi nɛpɛ su gà ponɛ. Vele ɣa na gà kɔlɔ wonɛ la.

¹⁸De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo pɛ wo ʋaa ma fãa.