Read Loma 1 TEMETE 2 Bible Online

1 TEMETE 2 - Loma bible

1 TEMETE 2

¹Mamaa wũgi pa gà tɛnɛ bosu ga Gala‐maa‐nɛɛnɛga, Gala‐felia, nu vaa‐vee‐ʋee ʋai Gala bɛ é vɛɛ mama‐feea va te ɣɛ nu pɛ faa ma.

²Towaa ɣɛ ɣalasoga ʋaa ma é vɛɛ niitiɛ ɣaazɔ va te lo‐su wɔɔlɔi, kɛɛ ʋaa ma de tuo ɣaa‐leiya wo ta zii‐laa luo, a de Gala tuo wo kɔnɔ ta wũfe‐ma luo pelei ɣaazɔ zu.

³Na ɣa pagɛi. Towa maʋaa zolowogɛi de valo nui Gala gaazu,

⁴nii é wõi ɣɛɛzu ga nu pɛ ge valo, na ɣa ɣɛɛ na te ɣele‐ɣele gaamai maʋaa zu.

⁵Ƃɔvɛlaale Gala ka nɔ ɣilekpu, de yɔɔzu‐ƃɛtɛ nui nɔ ɣilekpu nii é Gala kpɔga nu ƃusea te yɔɔzu, na ɣa ga zunui Ziizɛ Kolai.

⁶Towa é ƃɔɔ ʋeeni ga nu pɛ wũ‐maa‐wo ŋɛnii. Seele woi nii ʋeeni mawuu ƃɔɔƃɔɔgi nɔ ma.

⁷Gaamaí ɣa gè bosu, gɛ̀ lɛ zɛɛ ʋaa wosu. Nii ɣa kùloai ma ga gè ɣɛ ga maƔala goo‐wo nu gè ga Kolai na keelai ta. Gà ga kala‐mɔɔ zii ƃalaa‐gitiɛ ʋaa ma zee‐la‐mai zu ta gaamai.

⁸Na ma gà wõi ɣɛɛzu ga zinaitiɛ ta ɣɛ na yee lɛɛzu gee zu ŋadɛi ɣaazɔ Gala‐feli ʋaa ma, te wɛlɛ na va ga te yee lɛ faa yowũ zu, zii‐ɣaa‐wãla ʋaa lɛ te va ɔ́ nɔ ɣɛ ga kpɔɛ ʋaa.

⁹Maa nɛɛvɛ ƃalaa pɛ ŋazaitiɛ te maa ɣili nɔ é wooli su tiɛ kɛ ga kele‐ɣele pele tiɛ maa ɣili ga seɣei niitiɛ ta zolowo su. Ɛ́ lɛ ga te kɛ ga wũ‐taali‐taali‐fɛlɛɛ nɔ ga te ƃɔɔ lɛ ɔɔ te kɛ ga zɛni ɔɔ tɔnɔ‐ba wɔti ɔ́ nɔ ɣɛ ga te kɛ ga maa‐ɣili sɔɔlai nii sɔ̃wɔ ƃai.

¹⁰Kɛ̀ pagɛ te kɛ ga tuo vele vagɔ è ɣɛ velei solowogɛi la ŋazai niitiɛ ma ta kulo la te bo ga te Gala faa ziɣia ga gaama.

¹¹Pagɛ ŋaza nu ná ɣɛ ƃu yíɛ faa maa woli kóloai ƃɔɔ é wolo wulu ma.

¹²Gɛ̀ lɛ ʋaani bu ŋaza nu nɛpɛ zeea ga é faa lɛ ɔɔ gaa‐ƃaa ɣɛ zéea zunu maazu. Pagɛ ŋaza nu ná ɣɛ ƃu.

¹³Ƃɔvɛlaale Adã ɣa dɛ Gala ge kpɛtɛni ɣaʋu pa. Na wulu sa é Iivi ƃɛtɛ.

¹⁴Na wuloa su Adã lei gaa‐wɔlɔgi ɔ́ wo da. Kɛ̀ ŋaza nui ɣa gaa‐wɔlɔgi woni da, tɔwɔ é ɣɛ sa ga tɔ‐kãla‐ŋala nu.

¹⁵Na pɛ ge ɣɛɛvɛ ŋaza nu ɣa valo duu‐ɣaa zaala zu, ani nɔ yá ɣata na zee‐la‐mai va ta wõila, máa wuai. Na ɣa ɣɛɛ na kɛ́ɛ ʋai wooligɛi su.