Read Loma 1 TEMETE 3 Bible Online

1 TEMETE 3 - Loma bible

1 TEMETE 3

¹Woi nii ta bo tɔ ga gaama. Na ɣa ga ani nu ɣɛɛ ʋai Gala pɛlɛi maazu maʋai ɣa manui wiɛ siɣi na, nu ɣaa wua lii ɣa na yá ɣɛ gwala wõi ɣɛɛzu.

²Tɔwɔ nui é ga Gala pɛlɛ maazu nu kɛni yá ɣɛ ga nui kɛɛ‐zɔ gɛ lɛ ɣɛɛ nu wuu zu, é ga nui yá ŋaza wulola ɣɛ nɔ ɣile, yíɛ ɓɔɔ zu zo faa ma, kele‐ɣelegɛi é ga nui yá wũfe ƃɔɔ ma, é ga nu ƃɔɔ nu, kala‐bo‐bo zobo ge bɛ́.

³Na ɣa ɣɛɛ na é mɛ lɛ ɣɛ ga dɔɔ‐ƃakpa‐ƃoale nu, é mɛ lɛ ɣɛ ga ƃuulu‐ƃaala faa‐ɣɛɛ nu. Kɛ̀ é ɣɛ ga nu‐zɛ‐sɛ‐bo nu é mɛ lɛ ɣɛ ga kpɔɛi‐wõi nu é mɛ lɛ ɣɛ ga naʋolo‐wõi nu.

⁴Kɛni manui ɣa ɣɛ ga nui nii yá ƃɔɔ wɔ pɛlɛ wu ʋaitiɛ ɣɛ ga pagɔ yíɛ deaitiɛ lo ga te wolo vele yíɛ te lo wɔnɔ ga te ɣɛ ga numaitiɛ wũfe‐ma ɣa ɣɛ te ya pelei ɣaazɔ zu.

⁵Toku ge zei ga ani nui lɛ kpɔɔ wɔ pɛlɛ wu ʋai ɣɛɛzu, towaa leve ɣɛ le é ƃala Gala na pɛlɛi ma?

⁶Kɛni manui ɣa ɣɛ ga nui ɛ́ lɛ looni nɔ Kolai maa nulai zu ga niinɛ. Na laale ɣee ta maʋai ɣa wɔɔlɔ kpɔɔ ɣaazu ná ki‐gaa‐ziɛi nɔ ƃɔɔ va. Na wɔ ka ɣɛɛ na towaa loo sa dɛvele na faa‐yɛ‐ma ʋai zu.

⁷Na wulu kɔnɔ kɛni manui ɣa ɣɛ ga nui tɔwɔ vagɔi numai niitiɛ la tɛ lɛ ga Kolai maa vea, na laale ɣee ta towaa vili ƃaa‐wulo‐ma ʋaa zu, na ɣa ɣɛɛ na é vili dɛvele na sɛlɛgi zu.

⁸Vele nɔ na é la ga Gala pɛlɛi vaa yeke‐kɛɛ veaitiɛ. Kɛni máʋai ɣa ɣɛ te ɣaazu ga faa te mɛ lɛ ɣɛ ga nɛ fele keea vea. Te mɛ lɛ ƃɔɔ ɣɛ ga dɔɔ na dua te mɛ lɛ kɔnɔ ɣɛ ŋɛni‐wõi kulozu.

⁹Zee‐la‐mai zu ʋai nii doowugɛi yɛga, maa nɛɛvɛ te yee ɣata ba ga yii zu wodoa.

¹⁰Na ɣa ɣɛɛ na maa nɛɛvɛ te te wɔ̃ɔ‐kɔ̃ɔ dɛ ɣaʋu ƃalaa pɛ. Ani faa lɛ te va, ta sa ta yɛ ga Gala pɛlɛi vaa yeke‐kɛɛ vea.

¹¹Vele nɔ na kɔnɔ é la ga ŋazaitiɛ. Kɛni ta ɣɛ ga numaitiɛ faa te ɣaazu ga faa, te mɛ lɛ ɣɛ daa‐wo bosu, te maʋaa zolowogɛi su te ga nui nu ɣa laa la fai ɣaazɔ zu.

¹²Maa nɛɛvɛ Gala pɛlɛi vaa yeke‐kɛɛ veaitiɛ te ŋaza wulola ɣɛ nɔ ɣilekpu. Na ɣa ɣɛɛ na maa nɛɛvɛ tiɛ te leaitiɛ maʋaa ɣɛ ga pagɔ ta te wɔ pɛlɛ wu veaitiɛ.

¹³Ƃɔvɛlaale taitiɛ ta tii ɣɛ ga pagɔ Gala pɛlɛi vaa yeke‐kɛɛ ʋai zu mavea ta lo‐su vagɔ zɔlɔ wo, te ɣɛ kɔnɔ ga duo lala vea zee‐la‐mai nii zu yá ɣɛ nu ya te ɣɛɛ vele ma su ɣilekpu ta Ziizɛ Kolai.

¹⁴Ki ka na ga su mɛ lɛ wooza gè va na. Kɛ̀ gà kala‐bo goi niitiɛ wonɛzu è wɔ kɛɛ ʋaa ma

¹⁵ani gà ɣɛ na na wulu è kwɛ̃ ga velei maa nɛɛ nu luo la Gala na pɛlɛi wu, na ɣa ga ʋululai maƔalagi na pɛlɛi. Towa é ga sei‐bui gaamai ʋaa ma é ga ná kpaa‐maazui.

¹⁶A da laa wu ziɣizu ma. Ƃɔɔƃɔɔ su nii de lai la da Ɣala tuoi zu gwala loowugɛi yɛga. Maʋaa wuloni kɛnɛ ma nu ƃuse ŋeteai zu. Gala baa ŋinɛgi máʋaa ɣaa wuloni ba ga faa nɛpɛ gɛ lɛ ba. Gala ta ɣeelaa te pɛtɛni: Mawoi woni ziitiɛ zaama. Te máʋaa ziɣini ga gaama zui wɔlɔ‐kɔlɔ ma ɣaali. Gala ge lɛɛni la saala‐malai zu.