Read Loma 1 TEMETE 4 Bible Online

1 TEMETE 4 - Loma bible

1 TEMETE 4

¹Gala baa ŋinɛgi ɣa bosu ga gaa wodoa ga gaa‐ƃela‐suvɛ nui taniga ta ziɣi ta yee‐la‐mai wulu te wui‐to pele ma gaa‐wɔlɔ‐bo gaa‐ƃaa ŋɛniitiɛ woo ma ta gɔʋɛ yowũitiɛ ta ɣala‐bogi.

²Ta nii ɣɛ zɛɛ ʋaa veaitiɛ ta laa‐nɛɛ‐wũ‐bai zaala zu, niitiɛ ƃadi zeiyai te yii ma ga dɛvɛle yee‐wo.

³Ta ɣa te kpa tɛɛzu ŋaza‐zei ʋaa ma tiɛ́ deʋe tiɛ da numaa ya ga te ƃe teve daa‐mii ŋɛni taniga‐mii ʋaa va. Na ɣa ga niitiɛ Gala ge te ƃɛtɛɛ ga numaitiɛ te te maa zɔlɔ wo te mamama fe bɛ́. Na ɣa ga numai niitiɛ te lai ga gaamai kwɛ̃ɛgɛi te vɛ.

⁴Ƃɔvɛlaale ŋɛnii nɛpɛ kpɛtɛi Gala bɛ pagɛ. Na ɣa ɣɛɛ na maa lɛ nɛɛni nu ɔ́ ɣɛlɛ ŋɛni ta nɛpɛ ba, ani manui yee zeiya bu ga mama‐feea Gala bɛ.

⁵Toku ge zei ga yá ɣɛ na ŋɛ na, a kɛ tii maŋɛnii wulovɛ su leelaa Gala daa woi vɛ ta Gala‐feliai.

⁶Ani yà kala‐bogi niitiɛ laa na de vaitiɛ laa wu, yà ɣɛ ga Ziizɛ Kolai na tii‐ɣɛɛ nu vagɔ è yii laa ʋegɛi ga zee‐la‐mai mawoitiɛ ta kala‐bo pagɔi è vilega pulu.

⁷Mɛ lɛ yee vili titi kwele‐toai niitiɛ zu te ga Gala tuo‐wo tala. Ƃɔɔ maa wolo Gala tuo‐wogai zu.

⁸Nu ƃɔɔ maa‐wolo ʋai nu ƃuse ŋeteai zu su‐lɔnɔ ta ɣa ba. Kɛ̀ nu ƃɔɔ maa‐wolo ʋai Gala tuo‐wogai zu su‐lɔnɔ ɣa ba pele zii nɛpɛ su. Toku ge zei ga nu ɣi‐to‐su ɣa maʋai zu ŋeteai nii zu ʋaa ma, nu ɣi‐to‐su wɔnɔ su ŋeteai zɔi zu é vaazu vaazu.

⁹Woi nii ɣa ga gaama é ga woi kuloai bu bɛ ga nu yee zei bu é wolo wulu ma.

¹⁰Nii mazaƃui ɣa dé wɔɔzu la diɛ mɔɔlɛ, ƃɔvɛlaale de ɣigi ɣa ʋululai maƔalagi va nii é ga nu pɛ balo nui, niitiɛ ta maʋaa ziɣi ga gaama natiɛ ta dɔ vele ƃɔɔƃɔɔ ma.

¹¹Fai niitiɛ leʋe è da te ya è te ɣala bo ga tiɛ.

¹²Mɛ lɛ ƃe ba nu ta nɛpɛ gaazu ɔ́ wudɛ è maazu yà lopo wolo ʋaa ma. Kɛ̀ taitiɛ te Kolai ʋaa ziɣia ga gaama, ɣɛ ga po‐kɔ̃ɔ te ʋaa ma è laa woo zu, è luo vele zu, yìɛ kɛ wõilai zu ta zee‐la‐mai é vɛɛ maa‐wuolai va.

¹³Pàala yɔɔzu mɔlɔ‐tɔ‐tɔ, yíɛ Gala kɔlɔi lodo zɛ‐sɛ pɛ ma yìɛ Gala goi wo yìɛ kala‐bogi wo.

¹⁴Mɛ lɛ laa wulo è zoodai zu é è ya. Na ɣa ga nii é ʋeeni è ya Gala daa woo‐wogai zu, tei Gala pɛlɛ wu lo‐tuoitiɛ te yee vɛɛni è wũmɔ.

¹⁵Yíɛ è wutii niitiɛ ɣɛ. Ɣata te ɣɛɛ va, kɛɛ ʋaa ma è lɛɛ è bosu ga yee luo vele nu pɛ gɛ wɛlɛ su va.

¹⁶Yà ɣagi yíɛ ƃɔɔ maazu vɛtɛ yìɛ yà ɣala‐bogi maazu vɛtɛ. Yee ɣata na va, toku ge zei ga nii ɣɛɛ vele ma yìɛ, yà ɣɛ ƃɔɔ valozu yìɛ wɔnɔ è woi‐mɛni beaitiɛ valo.