Read Loma 2 TEMETE 2 Bible Online

2 TEMETE 2 - Loma bible

2 TEMETE 2

¹Na ma dùu, ɣɛ ga su‐ƃaa nu kpɔ‐bai nii zu yá wo ga nu te ɣɛɛ vele ma su ɣilekpu ta Ziizɛ Kolai.

²Na ɣa ɣɛɛ na nii è mɛniga dà seele lamaa ɣaazu, numai niitiɛ nu ɣa la ga tiɛ te kɔnɔ ga numaitiɛ ta zoo te te vai zɔitiɛ ɣala bo, natiɛ lo fai nii ƃawola.

³Yà dɔ laa loo daa‐nɔwɔ‐wogi va, è ɣɛ velei Ziizɛ Kolai maa zɔdasi vagɔ ɣa kɛɛ la.

⁴Sɔdasi nɛpɛ gɛ lɛ ɣɛɛ sɔdasi lii ma ɔ́ vili fai nii zu ɛ́ lɛ ga sɔdasi ʋaa. Toku ge zei ga nii yá ɣɛ pulu tɔ ga é nui nii yii la é siɣia ga sɔdasii.

⁵Nui é ga ŋɛni‐maa‐wɔkɔ ɣaa‐wo‐bo nu ɛ́ lɛ maa‐wuu zɔlɔ woga ƃaa‐la‐ma ʋaa ma gaa‐wogi ʋaa ma ani manui lɛ ziɛni ga gaa‐wogi‐wo tɔgitiɛ.

⁶Kpalaga lii‐ɣɛɛ nui nii yá tii ƃaa ɣɛ towa maa nɛɛ é ɣɛ ga nu maa wũ sii‐zii ŋɛni ɣaa vai li pɔ́.

⁷Ɣi gaa ziɛ fai nii ma gè bosu yìɛ. Toku ge zei ga de maliɣii ɣa ʋa bu è ya ga vìɛ faa ɣaa ɣa faa mazii ɣaazɔ zu.

⁸Ɣi zɛ Ziizɛ Kolai nii zu bu ziɣiai saa ya é ga Deeve manu zuwui ta, è ɣɛ velei maƔala goi wogɛi la woo niinɛ vagɔi zu gè bosu.

⁹Na ɣa ga woo vagɔi nii gè malaa‐nɔwɔ‐wo bosu tòai ƃalaa kpeewɔ ɣa è ɣɛ tɔ‐kãla‐ŋala nu. Kɛ̀ Gala daa woi wɔ maʋaa lɛ looni kpeewɔ ɣa.

¹⁰Na ma gà yii lɔ faa pɛ gá niitiɛ Gala ge yee ƃakoga te va te mazaƃu ma, kɛɛ ʋaa ma ta ƃalaa te balolai maa zɔlɔ wo yá ɣɛ nu ya ta Ziizɛ Kolai te ɣɛɛ vele ma su ɣilekpu. Na ɣa ga balolai saala‐malai kwɛ̃ɛ gɛ lɛ ba pɛ́i ba ƃalaa pɛ.

¹¹Fai nii ta bo tɔ ga gaama: Na ɣa ga ani de vɛɛvɛ bá da tiɛni de za, da tiɛni da ŋeteai ɣɛ ƃalaa pɛ.

¹²Ani da yii lɔ na, a da vɛɛ bá da tiɛni de masadai ɣɛ ƃalaa pɛ. Ani a da máʋaa zakpe na, tɔ ƃalaa towaa de maʋaa zakpe.

¹³Ani da ga nui nu lɛ laa la, ná dɛi towaa yɛ nɔ ga nui nu ɣa laa la,— toku ge zei ga ɛ́ lɛ zooga ɔ́ ƃɔɔ maʋaa zakpe.

¹⁴Numaitiɛ ɣi too fai nii zu è deʋe è da te ya Gala gaazu ga te ƃe teve daa‐za‐wuloa va é vile wooniga va. Na lɛ faa ta nɛpɛ siɣia nu ma. Kɛ̀ towaa mɛni beaitiɛ ŋala‐ŋala nɔ.

¹⁵Kɛ́ ga yà ɣaa‐ƃai ɣaazɔ è ƃɔɔ lɛ ga Gala ga yà ga nui yá yee zei maʋaa wu, è ɣɛ ga tii‐ɣɛɛ nui nii ɛ́ lɛ dɛ ga kɛni wũfe ka ɣɛ gáazu, yìɛ gaamai mawoi zo ga gaama vele.

¹⁶Ƃɔɔ ƃe teve zɛpɛi nii mazii va é ga Gala tuo‐wo tala ƃɔɛ‐wote‐wote. Ƃɔvɛlaale towaa pele wulo ga numaa tiɛ li nɔ wũ ma Gala tuo‐wo talai zu kelẽi.

¹⁷Na wɔ ka ɣɛɛ na, ta yɛpɛ woi maa ɣa ɣɛ wɔɔlɔzu nɔ è ɣɛ pala zu ɣa ɣɛ wɔɔlɔzu ma. Hamɛneea ƃɔga Failitɔ te vɛɛvɛ na ɣavele veaitiɛ va.

¹⁸Ta ɣa te ʋoolaa gaamai va bo pele ma te vɛ ga saa vea wu‐ziɣi ʋai saa ya maʋai ɣɛɛ sa é wulo gá. Ta nui taniga ta yee‐la‐mai wotesu ƃɔɔ fele.

¹⁹Tɔwɔ Gala na pɛlɛi lɔɔ vile‐suvɛ ɣa vɛɛni kpãa woi niitiɛ te ma ga zee‐wo. Natiɛ ta ga “De maliɣii ná dɛitiɛ wɛ̃ni.” É wɔnɔ ma ga “Maa nɛɛvɛ nui nɛpɛ é de maliɣii laa lilisu manui ziɣi tele‐bo tala luo wulu.”

²⁰Pɛlɛi gwala ƃakpai, zɛni ŋɛni yãka ƃɔga kani ŋɛni yãka nɔ lei ta ɣɛ bu. Kɛ̀ gulu ŋɛni yãka vɛɛ pɔlɔ ŋɛni yãka va ta ɣɛ bu ƃalaa pɛ. Taniga ta ɣɛ na ƃaa‐la‐ma lii‐ɣɛɛ ʋaa ma, taniga te na nu laa lɛ ɣɛɛ te maʋaa zu.

²¹Ani nu nɛpɛ ka ƃɔɔ maa ziɣi na fai niitiɛ zu ta kɛ nu laa wulo te maʋaa zu, a kɛ tii manui maʋaa ɣa sa yá wulo ga ŋɛni yãkai nii ƃaa‐la‐ma lii ɣa ɣɛ su, kuloai su ga tee pɛlɛ keea nui ʋaa ma kɛɛ wutii zéea, kavele ƃɛtɛi tii vagɔ nɛpɛ faa ma.

²²Na ma ƃe teve yà nu niinɛ ŋɛni‐wõi‐leve‐mai va è ɣɛ nɔ tele‐bo tuoi maʋaa wulu ta zee‐la‐mai é vɛɛ wõilai va ta zii‐lai, è vɛi niitiɛ va te de maliɣii laa lilisu ga yii zu wua.

²³Yà ʋaa nɛpɛ ge mɛ lɛ ɣɛ titi daa‐zai niitiɛ‐wulo ʋaa zu te mawũ gɛ lɛ ba. È kwɛ̃ni ga natiɛ ta kpɔɛi laa‐zu vɛɛ.

²⁴Tɔwɔ nui é ga de maliɣii na tii‐ɣɛɛ nui kɛni yá ɣɛ ga nui nii ɛ́ lɛ ɣɛɛ ga kpɔɛi‐wõi nu. Kɛ̀ to mu kɛni é ɣɛ ga nui tuola nɛi ga nu pɛ, solowogɛi su ga kala‐mɔɔ, zii lɔi numaa ɣɛɛ‐zɔ ga.

²⁵Niitiɛ te logɛi manui la, pagɛ yíɛ te vile pele va ga sɛ‐sɛ‐bo. Ɣee ta Gala ka ʋa bu te ya ga te wulu ɣaa ʋe ta ʋaa yowũi va te va te gaamai wɛ̃ɛ.

²⁶Na wɔ ka ɣɛɛ na, te zogi dɛvele boga ga te zii‐mai ɣɛ, ta wulo sa na mavelii ɣa.