Read Loma TAITƆ 2 Bible Online

TAITƆ 2 - Loma bible

TAITƆ 2

¹Kɛ̀ yà dɛi, kɛni yà kala‐bogi nii wo solowogɛi kala‐bogi ma maʋaa ɣaa wuai.

²Bo zina nuwutiitiɛ ma te ɣaa lei te zɔƃɛlɛ ɣɛ ma te ɣɛ ga pele su ʋaa‐ɣɛɛ vea, te za‐su wuai zee‐la‐mai mavele ma ta wõilai é vɛɛ te lo fai va kpãa.

³Vele nɔ na wɔnɔ yà bo da ŋaza nuwutiitiɛ ma ga wũfe‐ma wɔɔlɔ te ya te luo velei zu Gala zekegi mavele ma, te mɛ lɛ ɣɛ ga daa‐ŋala‐ŋala kpɔɛ‐wo bea ɔ́ nɔ ɣɛ ga te ƃɔɔ ɣɛ ga dɔɔ na dua. Maa nɛɛvɛ nii pagɛi tiɛ ŋaza lopoitiɛ ɣala bo na zu

⁴tiɛ te maa wolo na mavele ma ga te wõi ga te zinigitiɛ ta te leaitiɛ.

⁵Maa nɛɛvɛ te te ɣala bo ga te ɣɛ ga pele su ʋaa‐ɣɛɛ vea te yii zu wuai, te ga pɛlɛ wu yeke‐kɛɛ vea te luola nɛi. Na ɣa ɣɛɛ na te wolo te wɔɔ veaitiɛ vɛ kɛɛ ʋaa ma numaa te mɛ lɛ ƃe laazu ga Gala daa woi.

⁶Vele nɔ na wɔnɔ é la ga zolopoitiɛ. Te lɛnɛ ga tiɛ ƃɔɔ zu zo faa ma.

⁷Ƃɔɔ lɛ pelei ɣaazɔ zu ga yà ga po‐kɔ̃ɔ pagɔ ga nu vile pulu tuo vele vagɔi zu. Na ɣa ɣɛɛ na dɛ ga è ɣaa lɔgɛ tẽi yà ɣala‐bogi zu è maʋaa wuu viiyai.

⁸Yíɛ woi nii wo maʋaa ɣaa ɣa wuo maa‐wulo‐zu lɛ ɣɛɛ ba, kɛɛ ʋaa ma nui nɛpɛ yá lo è la è wũfe pili manui ma, faa yowũ ta nɛpɛ ge mɛ lɛ ɣɛ dá ga é bo ga de la.

⁹Bo duoitiɛ ma ga te wolo ta nu kɛɛ veaitiɛ vɛ pele mazii ɣaazɔ zu tiɛ te yii la. Maa lɛ nɛɛni tɔ ɣɛ ga gui‐zɔ‐ƃɔlɔ bea

¹⁰ɔ́ nɔ ɣɛ ga te ɣɛ ga numaitiɛ ta ŋɛni sa‐sa siɣi. Kɛ̀ pagɛ te ƃɔɔ lɛ ga ta ga numaitiɛ nu ɣa la ga tiɛ ƃɔɔ ga gaama é wolo wulu ma, kɛɛ ʋaa ma ƃaa la de valo nui Gala na kala‐bogi ma fai ɣaazɔ zu.

¹¹Toku ge zei ga Gala na gaazu‐maa‐wõi‐ɣaa ƃɔ‐bai wulovɛ nu pɛ balo ʋaa ma.

¹²Kpɔ‐bai nii ɣa pele wulozu ga diɛ ga de yee wulo Gala tuo‐wo talai zu é vɛɛ zui zu ʋaitiɛ te mayii ƃude‐ƃudegi va. Na ɣa ɣɛɛ na diɛ zu zo tuoitiɛ ma da ɣɛ bosu, de ɣaa lɔgɛi diɛ wɔnɔ Gala tuo wo ŋeteai nii zu.

¹³Da ɣɛ niitiɛ ɣɛɛzu diɛ da ɣi‐togi nii maa kpowũ tuuyiɛ ma. Ki‐togi na ɣa ga da Ɣala gwalai é ga de valo nui Ziizɛ Kolai na saala‐malai‐wulo ʋai de ɣaazu.

¹⁴Ziizɛi nii ɣa é ƃɔɔ ʋeeni de ʋaa ma ga é de wũ maa wo faa yowũ ɣaazɔ zu. Na ɣa ɣɛɛ na é de maa wuo ga de ɣɛ ga ná dɔ numaa de ɣɛ ga nui niitiɛ ta wɔɔlɔ faa vagɔ‐ɣɛi zu.

¹⁵Fai niitiɛ wulo la è bo. Yíɛ tɛnɛ bo yìɛ lo numaa la ga gaa‐ƃai ɣaazɔ. Mɛ lɛ ƃe ba nu ta nɛpɛ gɔ ɣaazu vili ga yìɛ.