Read Loma TAITƆ 3 Bible Online

TAITƆ 3 - Loma bible

TAITƆ 3

¹Numaitiɛ ɣi too ná zu ga te wolo maazu‐ʋaa‐wo‐bo bea vɛ, niitiɛ gaa‐ƃaa te ya numaa maazu, te ɣɛ ga goo‐mɛni‐kulo vea te ɣavele ƃɛtɛi ƃaa‐la‐ma lii ta nɛpɛ kɛɛ ʋaa ma.

²Na ɣa ɣɛɛ na te mɛ lɛ faa yowũ wo ga nu la, te ƃe teve kpɔɛi‐woga va te ɣɛ ga sɛ‐sɛ‐bo tuo‐wo bea tiɛ wũfe‐ma luo wo ga nu pɛ maa‐wulo‐zu nɛpɛ ge mɛ lɛ ɣɛ maʋai va.

³Ƃɔvɛlaale da ɣagi de litigɛi ɣɛ wɔnɔ diɛ goo‐mɛni tala wulo. De ɣakagɛi ɣɛ de duola zu ŋɛni‐wõi‐leve‐ma mazii laali‐taali zeea ta zii‐ma‐ɣɛɛ ʋaa, diɛ da ŋeteai ɣɛ wãla‐lɔɔ‐wuloa zu ta kuu‐zu‐yowũ‐ma, te ziliai ga diɛ, da wɔ de ziliai ga ɣiini.

⁴Kɛ̀ tei de valo nui Gala na tuo vele vagɔi ƃɔga ná wõila luola nɛɛ te maʋaa wuloni kɛnɛ ma,

⁵é de valoni. Ɛ́ lɛ ga tuo ta ɣa de boga gaa lɔgɛi, kɛ̀ é kɛɛni kpɔɔ ɣaazu‐maa‐wõi‐ɣai mavele ma. Ɛ́ nii ɣɛɛni ga de wuo vele bɛ́ de ɣɛ kaa niinɛda zu ta de ɣatagi baa ŋinɛgi bosu nu niinɛlai zu.

⁶Na ɣa ga baa ŋinɛgi nii é daa looni ga diɛ ga kpakpaa de valo nui Ziizɛ Kolai zaalai zu,

⁷kɛɛ ʋaa ma ná gaazu‐maa‐wõi‐ɣaa ƃɔ‐bai mavele ma de ɣɛɛ‐zɔgi mɛ lɛ ɣɛ de va ga faa. Na ɣa ɣɛɛ na de ɣɛ ga kweligi kɛɛ vea de ɣi togɛi zeʋui nii va kwɛ̃ɛ gɛ lɛ ba.

⁸Woi niitiɛ ta ga gaama. Mayii viligɛ kùu zu ga è ɣata fai niitiɛ woga va, kɛɛ ʋaa ma taitiɛ te Gala maʋaa ziɣia ga gaama te ƃɔɔ wũ maazu vɛtɛ ga te ɣɛɛ‐zɔgi va. Niitiɛ ta ga faitiɛ te vagɛi maa‐wulo‐zu nɛpɛ gɛ lɛ te va, te ga nu ƃusea ta wulo‐nu‐ma ʋaa.

⁹Ƃe teve titi sakpe‐toa va è ƃe teve dɔlɔ‐boga va é vile wo mama gwɔlɔni maʋaa va ta gaa‐wɛɛ‐wo fai woo ma é vɛɛ kpɔɛi‐woga va tɔ maazu. Ƃɔvɛlaale nà ɣaveleitiɛ te mawulo‐nu‐ma lɛ ba. Tɛ lɛ ga faa maa nɛɛ.

¹⁰Nui nii yá va ga de ɣaa‐wɛɛ ʋaa woo ma nà ná dɛi, yà tɛnɛda ɣɛ ɣile ɔɔ fele. É ziɣi sa na ma yà ʋaa nɛpɛ ge mɛ lɛ ɣɛ ná faa zu,

¹¹kwɛ̃ɛgɛi è vɛ ga nà ɣavele nui ɣa ga nui nii siɣiai gaamai wulu é ga faa yowũ‐ɣɛɛ nu. Towaa ɣɛ ga nui faa yɛgɛi bɛ́ ƃɔɔ ma.

¹²Atema ɔɔ Tekekɔ gà te ɣila teve na è wɔ vɛ, pelei nɛpɛ yà zoo è leve da ɣaa ƃaa è leve da è va pɔ̀ vɛ Nikapole. Ƃɔvɛlaale gè deʋea ga gè yɛ na é yɛsu kɔɔlɛ ziɛgi leve.

¹³Pelei nɛpɛ yà zoo è leve da ɣaa ƃaa è leve da ga è ƃɔ lɔɔyai Zina va ta Apɔɔla ga è ta ziɛi maʋaa yee leve tuo. Wɛlɛ na va ga ŋɛni ta nɛpɛ mavalà ge mɛ lɛ loo te ma.

¹⁴Pagɛ da numaitiɛ te faa maa woli é vile te ƃɔɔ ɣɛɛ ʋai va ga tuo‐vele‐vagɔ vea, kɛɛ ʋaa ma faa ɣaa wuai nɛpɛ yá wulo te ɣakala kpuse maƃala numaa ma tiɛ kpɔ‐ba wo nà zu, te mɛ lɛ ɣɛ ga tɔnɔ‐ba lala vea.

¹⁵Taitiɛ nɛpɛ te bà vɛ te è luoni. Gè numai niitiɛ luo te gé wõini gá tiɛni gá yee‐la‐mai ɣɛɛ vele ma ɣilekpu. Maa‐wõi‐ɣaa ƃɔ‐bai ɣa wo ga wo ɣaazɔ fãa.