Read Loma HIIƂULUITIƐ 1 Bible Online

HIIƂULUITIƐ 1 - Loma bible

HIIƂULUITIƐ 1

¹Wɔlɔ‐wɔlɔi zu Gala ge woo wuuni dáa woo‐wo beaitiɛ la pele lamaa zu ta pele zii laali‐taaliga te ƃɔɛ la de mama gwɔlɔni pɔ.

²Kɛ̀ siɛ gaa‐ƃelagi nii zu zai ŋɛ ni é woo wua dúi la nà ƃɔɛ la de wɔ. Na ɣa ga dúi nii é yee ƃadoga ba ga ŋɛni ɣaazɔ pɛ keea nu. Tɔ nɔ ɣa ƃalaa pɛ é zui ƃɛtɛni ga zee.

³Tɔ Gala na saala‐malai maʋoloi lɛɛzu é ga Gala tuo velei mawo‐kɔ̃ɔ kpɔɔƃɔɔgi. Zée ɣa zui va ta gee ga ná gaa‐ƃaa woi. Tei sa é faa yowũ wuoni nu ƃuse ma, é zeini ɣalaso gwalai yee za‐su vele gee‐zuvɛ.

⁴To‐suvɛ wala ƃakpani sa é leve Gala ta ɣeelaitiɛ va ga velei ná daa‐zeigi é maa zɔlɔ woga gwala wɔɔlɔi la é leve Gala ta ɣeelaitiɛ ta dɛi va.

⁵Su‐wulo‐zuvɛ ɣa: Gala ta ɣeela zɛƃɛ ɣa wɔlɔ Gala ge ɣɛɛ ma, “Yà ga dùu. Zaa ɣa ge ɣɛɛ la ge è ɣeea”? Ƃaa é ɣɛ tea, “Gà ɣɛ ga kéea, é ɣɛ ga dùu”?

⁶Na ɣa ɣɛɛ na wɔnɔ nii ɣa é bosu é vile siɛgi va é ɣɛni vaazu vaazu la ga duu maa wũgi zui zu. Tɔ ɣɛɛzu tea, “Ƃe ba Gala na keelaitiɛ ƃɔgɔpɛ te vɛɛ kɔ́wɔ wu.”

⁷Gala kɔlɔi ɣa bosu ŋɛ ni é vile Gala ta ɣeelaitiɛ va yíɛ ɣɛ tea, “Towaa ná keelaitiɛ maa wote ga fãga, é ná tii‐ɣɛɛ veaitiɛ maa wote ga ŋabu‐zo.”

⁸Kɛ̀ Gala kɔlɔi ɣa bosu ŋɛ ni é vile Gala dui va yíɛ ɣɛ tea, “Gala, yà masa kpɔkpɔgi ɣa na wɔlɔ‐wɔlɔ ta wɔlɔ‐wɔlɔ. Yà lele‐bo gaa‐ƃai ɣa é ga gaa‐ƃai yà masadai ʋaa ma.

⁹È wõiya ga tuo ɣaa‐lɔga è zili ga tɔ tala luo. Na ma Gala, yà Ɣalagi, é kuu‐zu‐nɛɛ wulo ƃadi wua è wũmɔ. É pua è wũmɔ zee wudɛ è vaitiɛ maazu.”

¹⁰Gala kɔlɔi ɣa bosu wɔnɔ yíɛ ɣɛ tea, “Yài è ga gé maliɣii, yà nɔ ɣa è zui maʋaa wɔwɔ vileni tɔɔ‐zei‐zuvɛ. Na ɣa ɣɛɛ na gee‐zuvɛ ɣa ga è yee‐wo.

¹¹Gee wɔlɔgi ƃɔga zui te zu ɣa ŋala‐ŋala, kɛ̀ yà yɛ na. Ta wɔlɔ zaɣa è ɣɛ seɣe.

¹²Yà te maa ƃiti è ɣɛ pɛɛ‐ma zeɣe, na ɣa ɣɛɛ na te maa ɣa ʋeli è ɣɛ velei nu ɣa seɣe maa ʋeli da. Kɛ̀ yà nɔ ga ɣavele, yà ɣɛ‐ŋetea wenagi lɛ wɔlɔ‐wɔlɔ wɛ̃ɛga.”

¹³Kɛ̀ Gala ta ɣeelai zɛƃɛ ɣa wɔlɔ Gala ge ɣɛɛ ma, “Zei ga zèe za‐su vele é yɛsu gè è wɔɔ yɔ̃wɔitiɛ vɛɛ è wɔwɔ wu”?

¹⁴Kɛ̀bɛ ta ga Gala ta lii‐ɣɛɛ ŋɛnii niitiɛ te levegɛi ga te tii ɣɛ numai niitiɛ te vaazu balolai maa zɔlɔ wosu te mazaƃu ma, kɛlɛɛ?