Read Loma HIIƂULUITIƐ 13 Bible Online

HIIƂULUITIƐ 13 - Loma bible

HIIƂULUITIƐ 13

¹A mɛ lɛ ƃɔlɔ wõiya va ga wo vai niitiɛ te ga Kolai maa vea.

²A mɛ lɛ laa wulo gaazu‐wodo luo‐wogai zu ga wɛ̃ɛya. Toku ge zei ga nii mavelei zu ɣa nui taniga te ƃala zoga la wɔlɔ Gala ta ɣeelaa ma lei zu.

³A ɣi zɛ niitiɛ zu te kpidi vɛlɛ wu wiɛ kɛ è ɣɛ wa tiɛni wa ɣɛ kpidi vɛlɛi wu. A wiɛ daamɔdai ɣɛ ga niitiɛ te te zo pele yowũzu, ƃɔvɛlaale wa ƃalaa wa dɛ nu ƃuse ŋeteai zu.

⁴A ƃe ba ŋaza‐wulo ʋai ɣɛ ga fai ƃaa ɣa ɣɛ ma wo pɛ wo ya. Na ɣa ɣɛɛ na pagɛ ŋaza‐wulo ʋai ɣɛ ga fai maa lɛ woolaga. Ƃɔvɛlaale ŋaza keea nu ɔɔ nui zini ge bɛ́ ta wɛ̃ɛ‐zo fai vɛɛ wɛ̃ɛ‐ziɛ‐boga va kaƃawɔ vɛ ta tabolo, Gala ka faa vɛɛ te va fai nii zu.

⁵A ƃɔɔ ƃe teve naʋolo‐wõi va wa ŋeteai zu, nii yá ɣɛ wo ya nà é wo yii la. Ƃɔvɛlaale Gala ge ɣɛɛ tea, “Gɛ̀ lɛ wɔlɔ‐wɔlɔ ƃega yìɛ ɔ́ nɔ ɣɛ ga gè leve è va è yɛ folo vɛ.”

⁶Nii mavelei ma de ɣile‐giledai ɣa zoo é bo ga yee‐laa‐ʋũi pele yíɛ ɣɛ tea, “De maliɣii ɣa ga nà kpɔ‐ba nu, gɛ̀ lɛ lua. Zɛƃɛ ɣa nu ƃuse ɣa kɛ gàazu?”

⁷A ɣi zɛ wa lo‐tuoitiɛ zu niitiɛ te Gala goi woni wo ma. A ɣi gaa ziɛ nii ma é ɣɛni ga ta ŋeteai mawulo‐nu‐mai. Na ɣa ɣɛɛ na zee‐la‐mai é ɣɛni te ya wo masa te ma ga nà ɣɛ wo ya.

⁸Ziizɛ Kolai ɣɛni ga ɣavele ŋina, tɔ nɔ ga ɣavele zai ŋɛ ni, towaa yɛ wɔnɔ ga ɣavele wɔlɔ‐wɔlɔ ta wɔlɔ‐wɔlɔ.

⁹A mɛ lɛ ƃe ba faa niinɛ laali‐taaliga tɔ wo ziɣi pele va. Ƃɔvɛlaale tɔ ga faa vagɔ ga maa‐wõi‐ɣaa ƃɔ‐bai é de zu ƃaa ga de yii zu vele, ɛ́ lɛ ga de zia ga daa‐mii ŋɛnia te maɣala‐bogi. Na ɣa ga nii malɔnɔ lɛ dɛ zɔlɔ woni ba taitiɛ ʋaa ma te ɣatagɛi zia va la.

¹⁰Gala zeke‐kɛɛ vana ka de ya. Daa‐mii ŋɛnii yá ɣɛ Gala zeke‐kɛɛ vanagi nii ɣa, taitiɛ te tii ɣɛɛzu seɣe vɛlɛi wu ɛ́ lɛ ga ta woo gaama ʋaa ga te mi.

¹¹Ƃɔvɛlaale suoi natiɛ laa‐ʋaale gwalai ɣa va ga te maŋamai ŋada maa‐wuai zu ga é kulo ga zalaɣa faa yowũ ʋaa ma, ta wulo ga suoitiɛ ƃɔɔ te malɔtɔi ƃuwui va te te ɣala.

¹²Vele nɔ na Ziizɛ laa nɔwɔ woni la taa ziɣigi wuluvɛ vele, kɛɛ ʋaa ma é numaitiɛ wulo su ga tee ga Gala na dɔa maŋamai zaala zu.

¹³Na ma a dii na pɔ́ vɛ ƃuwui wuluvɛ vele a diɛ yii lɔ so‐pele yowũi ɣa yá wo ga diɛ máʋaa ma.

¹⁴Toku ge zei ga taa nɛpɛ gɛ lɛ ŋeteai nii zu de ya ɔ́ ɣɛ ga tai yá yɛ na wɔ. Kɛ̀ da tai nii maa vele ɣaa ziɛzu é vaazu wuuzu.

¹⁵Pagɛ a diɛ zalaɣa wulo wɔ ga daa‐maa‐lɛɛ‐woga ga Gala Ziizɛ zaala zu. Na ɣa ga de laa‐vele‐zuvɛ malɔnɔi é ga ná daa‐zeigi wuloa la diɛ bo.

¹⁶A mɛ lɛ laa wulo faa vagɔ‐ɣɛɛ zu, nii yá ɣɛ wo ya wɔ laa wulo ta leve faa zu wo vaa wɔ, ƃɔvɛlaale na ɣavele zalaɣaitiɛ ɣa te ga Gala zii‐laa ʋaa.

¹⁷A wiɛ goo‐mɛni kulo wa lo‐tuoitiɛ ya wiɛ wolo te vɛ. Ƃɔvɛlaale ta wo yɛʋui maazu vɛtɛsu te maʋaa wuloai ga numaitiɛ é ga te vaa ʋaa ga te mawoo‐zu‐wulo bo. Pagɛ tiɛ nii ɣɛ ga kuu‐zu‐nɛɛ‐wulo vele, kɛ̀ é mɛ lɛ ɣɛ ga maa‐wõi vele. Toku ge zei ga nà mawulo‐nu‐ma lɛ ɣɛɛ ba wo ʋaa ma.

¹⁸A wiɛ Gala feli gé ʋaa ma, ƃɔvɛlaale gé ɣi gɛ lɛ ɣɛɛ‐zɔ ba. Gá wõi ɣɛɛzu ga kpakpaa ga gé ƃaa‐la‐ma luo wo faa ɣaazɔ zu.

¹⁹Gà wo maa nɛɛnɛsu é ƃɔɔ gàazu ga faa ga wo Gala feli gé ʋaa ma. Wa nii ɣɛ kɛɛ ʋaa ma su mɛ lɛ wooza wo màa zɔlɔ wo wulu.

²⁰Zii‐lai maƔalagi é de maliɣii Ziizɛ wu ziɣini saa ya deʋei nii maŋamai zaala zu nii yá yɛ ma wɔ, na ɣa ga Ziziɛi nii é ga baalagitiɛ‐maazu‐vɛtɛ nu walai.

²¹Galagi nii ɣa wo ɣavele ƃɛtɛ faa vagɔ ɣaazɔ zu fãa, kɛɛ ʋaa ma wo zii‐mai ɣɛ, yíɛ tii ɣɛ de yii zu ga nii pagɛi gáazu de na ɣɛ Ziizɛ Kolai zaala zu. Galagi nii ɣa saala ɣa la ma wɔlɔ‐wɔlɔ ta wɔlɔ‐wɔlɔ. Na nɔ yá ɣɛ.

²²Nà numaa, gà daazu wiɛ ga wo nà tɛnɛ goi mɛni ga zii‐lɔɔ, ƃɔvɛlaale kɔlɔ ƃuo nɔ ɣa gè ponɛɛ wo wɔ.

²³Pagɛ wo gaa ɣa ga te ƃega sa a de wɔi Temete va. Towa é vaazu vɛɛzu bà gá tɔ gé va gé wo ɣalama ɣa, ani yá vaa na ɣaʋu.

²⁴Gè wo lo‐tuoitiɛ ƃɔgɔpɛ tuo ta Gala na dɔ numaitiɛ. Numai niitiɛ te wuloai Etali yui zu te wo luoni.

²⁵Maa‐wõi‐ɣaa ƃɔ‐bai ɣa wo ga wo ɣaazɔ fãa.