Read Loma HIIƂULUITIƐ 2 Bible Online

HIIƂULUITIƐ 2 - Loma bible

HIIƂULUITIƐ 2

¹Na ma maa nɛɛvɛ nii a de mɛniga de wui lo ma ƃɔɔ sɛ‐sɛ a de mɛ lɛ va ziɣizu pulu.

²Toku ge zei ga ani keela woi Gala ta ɣeelaitiɛ te boni é ɣɛni ga gaama, na ɣa ɣɛɛ na tɔgi nɛpɛ nu kãla‐ŋalani ɔɔ goo‐mɛni talai nɛpɛ nu kuloni tɔ‐kpɛ‐mai solowogɛi manui ma é nà maa zɔlɔ wo,

³a da wulo su ɣɛ le, ani da yee wulo na nà ɣavele valola ƃakpa walai wu de maliɣii maʋaa woni ga maa wũ pa? Taitiɛ te mɛnini dá ta ɣa te seele wuloni maʋaa ma de ya.

⁴Gala ge balolai nii mazeele woo ʋeeni ƃalaa pɛ ga faa‐ɣɛɛ é dɛ ga seele ta faa maa‐wɔlɔ‐wɔlɔga é vɛɛ tii maa‐wɔlɔ‐wɔlɔ‐kɛɛ va. É kɛɛni wɔnɔ baa ŋinɛgi maʋaa‐nɛi ɣaa‐wɛɛ vele ma bɛ́ è ɣɛ velei kpɔɔ yii‐mai la.

⁵Su‐wulo‐zu ɣa ga ŋeteai nii é vaazu vaazu, Gala ta ɣeelaa lei Gala gɔ te lo ŋeteai na maazu. Na ɣa ga ŋeteai nii de faa wosu é vile ba.

⁶Mazeele woi ʋeevɛ ŋada ta Gala kɔlɔi ʋaa va mawoitiɛ te ga “Zɛƃɛ ɣa ga nu ƃuse è vaazu ɣi daazu maʋaa ma? Ɔɔ zɛƃɛi ga nu ƃuse ta nɛpɛ è vaazu ƃalazu maʋaa ma?

⁷È kɛɛni nu ƃuse loo è wɔ vɛ ɣeelaitiɛ wu ga ta wolo é yɛsu na ta wolo kɛ, è masada‐ɣɛɛ wɔɔlɔ pɛɛ ẃũmɔ ga saala‐mala ta ƃaa‐la‐ma.

⁸È ŋɛni pɛ pua kɔ́wɔ wu ga te ɣɛ bú.” Tɔwɔ tei Gala ge ɣɛni ŋɛni pɛ dɔɔzu nu ƃuse wu, ɛ́ lɛ ŋɛni ta nɛpɛ zɛni na wulu ɔ́ ƃe ɣɛɛzu ná deʋei yee wu. È ɣɛ velei é la, a dɛ lɛ dɛ wɛlɛzu ŋɛni pɛ ba ɔ́ ɣɛ bu.

⁹Kɛ̀ a da wɛlɛzu Ziizɛ va masada‐ɣɛɛ wɔɔlɔgi vɛɛni sa wũmɔ ga saala‐malai ta ƃaa‐la‐mai toku ge zei sai malaa‐nɔwɔ‐wogi va é boni kɛɛ ʋaa ma Gala na maa‐wõi‐ɣaa ƃɔ‐bai mazaƃui ma é saa maɣaa‐wãlai ɣaa ɣa nu pɛ faa ma. Ziizɛi nii looni dɛ Gala ta ɣeelaitiɛ wu ga ta wolo.

¹⁰Gala nii ŋɛni pɛ ge ŋetea faa ma ŋɛni pɛ ge wɔnɔ ŋetea saala zu, solowogɛi ɣɛ su ga ɔ́ ɣɛ ná saala‐malai laa ziitizu déaitiɛ lamaa ma, nui é ga to‐tuoi ta valolai ʋaa ma, é kɛ ga nui nii maa‐wulo‐zu lɛ ɣɛɛ maʋaa va daa‐nɔwɔ‐wogi zaala zu.

¹¹Ƃɔvɛlaale nui yá nu wulo su leelaa Gala faa ma é vɛɛ taitiɛ va te wuloai su leelaa te pɛ te wulo yeɣei ɣa ɣilekpu. Na ɣa é kɛɛ ɛ́ lɛ wũfega ga é te lili ga baani.

¹²Tɔ ɣɛɛzu Gala ma, “Gà yà laa‐zeigi wo ga woo maa zeezea bàitiɛ ma. Gà è maa wui nu ƃulugi zaama.”

¹³Tɔ wɔnɔ ɣɛɛzu tea, “Gà la ga yìɛ.” Yíɛ ɣɛ tea, “Nà ɣaa, gá ƃɔga Gala deaitiɛ é te ʋeea zèea.”

¹⁴Na ma tei tɔwɔ déaitiɛ ƃɔɔ te ƃɛtɛɛ ga nu ƃuse, tɔ ɣagi é ɣɛɛni ga te ta, kɛɛ ʋaa ma sai ɔ́ bo nà kɛ é nui nii zu ŋala‐ŋala saa maɣaa‐ƃai zéea, na ɣa ga dɛvele.

¹⁵Na ɣa ɣɛɛ na niitiɛ ƃɔɔ te ɣɛni ga dua ta ŋeteai ɣaazɔ zu saa na duo‐bai mazaƃu ma, é natiɛ wulo duolai zu.

¹⁶Ƃɔɔƃɔɔ su Gala ta ɣeelaa lei te maƃala ɔ́ ɣɛ ma. Kɛ̀ Eeƃɔlɔhɛ̃ɛ manu zuwui ɣa maƃala wogɛi bɛ́.

¹⁷Na ma maa nɛi ɣɛ é ɣɛ ga baitiɛ ɣavele pele mazii ɣaazɔ zu, kɛɛ ʋaa ma é ɣɛ ga gaazu‐maa‐wõi‐ɣaa‐wo laa‐ʋaale gwalai nii nu ɣa laa la Gala na tii zu ga towaa numaitiɛ ta ʋaa yowũi zu ƃɛtɛ.

¹⁸Toku ge zei ga tei tɔwɔ tɔ ɣagi laa nɔwɔ woga tɛ‐ga wo da, zobo ka bɛ́ ga é ƃɔ niitiɛ va tɛ‐ga wogɛi ga tiɛ.