Read Loma HIIƂULUITIƐ 3 Bible Online

HIIƂULUITIƐ 3 - Loma bible

HIIƂULUITIƐ 3

¹Na ma wai wo wuloai su ga tee ga Gala na numaa, wo ga bàitiɛ, wai wo wɔɔ laa é Gala ta liligi va, a ɣi gaa ziɛ Ziizɛ maʋaa ma, nii é ga keelai ta laa‐ʋaale gwalai fai nii ma de siɣia ga gaama.

²É ɣɛni ga nui nu ɣa laa la nui nii ʋaa ma é yee ƃadoni ba, è ɣɛ velei nɔ Mooze ɣɛni la ga nui nu ɣa laa la Gala na pɛlɛi wu.

³Na ƃalaa ɣɛɛvɛ te Ziizɛ ziyini ga nui kuloai bu bɛ́ ga ƃaa ƃakpa wala la ma é leve Mooze va, è ɣɛ velei nɔ ƃaa ƃakpai la pɛlɛ‐lo nui ma é leve pɛlɛi ɣagi va.

⁴Ƃɔvɛlaale pɛlɛ ta nɛpɛ ka nɔ ga ŋɛnii togɛi nu ta vɛ. Kɛ̀ Gala ka é ga ŋɛni pɛ to nui.

⁵Tɔwɔ Mooze ɣɛni ga nui nu ɣa laa la Gala pɔ pɛlɛ wu ʋai ɣaazɔ zu togi nii zu é ɣɛni su. Na ɣa ga kɛ́ɛ bogɛi ɣɛ ga Gala na tii‐ɣɛɛ nu kɛɛ ʋaa ma yíɛ fai niitiɛ mazeele woo ʋe te ɣɛni vaazu wosu ga ná yee luo vele.

⁶Kɛ̀ Kolai ɣɛni ga nui nu ɣa laa la kɛ́ɛ ʋai ma Gala na pɛlɛi maazu yíɛ kɛ duu‐ɣaa togi zu. Na wɔ ka ɣɛɛ na, a da ga ná pɛlɛ, ani da ɣata na laa va la de wɔɔlɔi ƃɔɔ ɣaazu da ɣi‐togi zu.

⁷Na ma è ɣɛ velei Gala baa ŋinɛgi bosu la Gala kɔlɔi zu mawoi ga “Zai ŋɛ ni wa dáa woi mɛni na,

⁸a mɛ lɛ gui‐zu‐ƃɔlɔ kulo è ɣɛ velei é ɣɛɛni la to‐dai na zu te ɣɛ bosu ga ʋoloi te ɣɛni su‐wɔ̃ɔgi wosu la gàazu kpooʋei zu.

⁹Ná ɣa wo mama gwɔlɔni te sù wɔ̃ɔni na, ta wɔ te wɛlɛ kɛ̀ɛ ʋai zu va kwena zee naagɔ yee wu.

¹⁰Na ma zìi ɣaa wãlani na ziɛgi zu ʋala― wonɛɛgitiɛ ya gè ɣɛ tea, ‘Ta ɣɛ ɣakasu wɔ ga te yii zu vele. Tɛ dɛ tùo velei wɛ̃ɛni.’

¹¹È ɣɛ velei gè woto leveni la goei‐levei zu gè boni, gè ɣɛni tea, ‘Tɛ lɛ wɔlɔ‐wɔlɔ lia nà doowo ŋada laavɛ.’ ”

¹²Nà numaa, a wɛlɛ wũ maazu va tuƃo‐vele‐yowũ yii mɛ lɛ va ɣɛɛzu wo ta wuu zu nii é ga zee‐la‐ma lala ɣi‐gaa‐ziɛi ɔ́ ɣɛ pele wulozu ga wiɛ ga wo ziɣi ʋululai maƔalagi va.

¹³Kɛ̀ a wiɛ ɣiini tɛnɛ ga gela‐bo pele ɣile‐gile, tei tɔwɔ bogɛi wo ma ga “A kɛ zai ŋɛ ni,” kɛɛ ʋaa ma wo ta nɛpɛ ge mɛ lɛ gui‐zu‐ƃɔlɔ kulo faa yowũ‐ɣɛɛ ɣaa‐wɔlɔ‐bogai mavele ma.

¹⁴Toku ge zei ga de wɔɔ laa ɣa ɣɛ Kolai maʋaa va, ani nɔ da ɣata na laa va la kpãa é yɛsu é ziiti kwɛ̃ɛ ma.

¹⁵È ɣɛ velei é wosu la Gala kɔlɔi zu mawoi ga, “Wa dàa woi mɛni na zai ŋɛ ni, a mɛ lɛ gui‐zu‐ƃɔlɔ kulo, è ɣɛ velei é ɣɛɛni la to‐dai zu é woni gàazu.”

¹⁶Ƃɛni ka te Gala daa woi mɛnini tiɛ dɛ nɔ lo da? Kɛ̀bɛ te ɣɛni ga niitiɛ ɣaazɔ te ziɣini Iije yui zu Mooze ga te malo‐tuoi, kɛlɛɛ?

¹⁷Na ɣa ɣɛɛ na ƃɛni ka Gala zii ɣaa wãlani te ya kwena zee naagɔ yee wu? Kɛ̀bɛ é ɣɛni ga niitiɛ te faa yowũ ɣɛɛni, na ɣa ga niitiɛ pɔlɔ wuuni te ya kpooʋei zu, kɛlɛɛ?

¹⁸Ƃɛni ka wɔnɔ é wonani ga tɛ lɛ lia ná doowo ŋada laavɛ? Kɛ̀bɛ niitiɛ te ɣɛni ga goo‐mɛni tala vea, natiɛ te ɣɛni le, kɛlɛɛ?

¹⁹Na ma de wɛlɛɛ na va ga zobo gɛ lɛ ŋɛni tiɛ tɔ li na toku ge zei ta yee‐la‐ma lalai va.