Read Loma HIIƂULUITIƐ 4 Bible Online

HIIƂULUITIƐ 4 - Loma bible

HIIƂULUITIƐ 4

¹Na ma tei nu lee ʋai ná ŋada laavɛ, na ɣa ga doowo‐bo‐suvɛ, maɣi‐togi dɛ laani laa‐zu, pagɛ a diɛ luo, wo ta mɛ lɛ va ɣɛɛzu ga nui é ʋɛŋɛɛ ga é ziiti na.

²Toku ge zei ga woo niinɛ vagɔi vaani de wɔ, è ɣɛ velei nɔ é vaani la Gala to‐da veai natiɛ wɔ. Kɛ̀ keela woi te mɛnini malɔnɔ nɛpɛ gɛ lɛ ŋɛni ba te vɛ, ƃɔvɛlaale tɛ lɛ ŋɛni mɛnini ga zee‐la‐ma zu vele.

³Daitiɛ de siɣia ga gaama da ziiti doowo ŋada laavɛ minɛ. Doowo ŋada laavɛ vɛ ɣa Gala ge faa woni é vile ná va yíɛ ɣɛ tea, “È ɣɛ velei gè woto leveni la goei‐levei zu gè boni, gè ɣɛni tea, ‘Tɛ lɛ wɔlɔ‐wɔlɔ lia nà doowo ŋada laavɛ.’ ” To mu ná tiitiɛ te woloni é ziɣi ƃɔɔ ŋeteai lɔɔ‐zei ʋolo ma.

⁴Bogɛ ŋadɛi ta Gala kɔlɔi ʋaa va é vile foloi dɔfela kelei ʋaa va dɔwɔ wui zu ga pelei nii zu vele. Mawoi ɣa ga “Gala ge loowoni foloi dɔfela kelei ma ná tii ɣaazɔ zu é kɛɛni.”

⁵Tɔwɔ é boni wɔnɔ yíɛ ɣɛ tea, “Tɛ lɛ wɔlɔ‐wɔlɔ lia nà doowo ŋada laavɛ.”

⁶Na ma tei tɔwɔ ná yɛga de taniga wɔ ga de li na, niitiɛ wɔgi wɔlɔ woo niinɛ vagɔi ziitia te ma tɛ lɛ zooni tɔ ziiti na toku ge zei goo‐mɛni talai va,

⁷Gala ka kui laazu kɔnɔ folo ta ma. É ɣɛni tea, “Zai ŋɛ ni.” Tei sa su woozani, é puuni Deeve la nà yìɛ bo woi niitiɛ zu de lɛɛ ma de bo. Woi natiɛ ta ga “Zai ŋɛ ni wa dáa woi mɛni na, a mɛ lɛ gui‐zu‐ƃɔlɔ kulo.”

⁸Su‐wulo‐zu ɣa ga è ɣɛ Jasua é doowo daa ziitini te ma, Gala gɛ lɛ ƃega faa wo ɔ́ vile na wulu ʋolo va doowo‐fee ʋaa ma.

⁹Na mavelei ma Gala ta loowo‐bogai ɣa laani laa‐zu Gala na numaitiɛ ʋaa ma.

¹⁰Toku ge zei ga nui nɛpɛ yá li Gala na doowo ŋada laavɛ manui tɔ ƃalaa towaa wɛ̃ɛ tii‐ɣɛɛ va è ɣɛ velei nɔ Gala ge wɛ̃ɛni da ná dɛi va.

¹¹Na ma pagɛ diɛ wɔ ga de li doowo ŋada laavɛ minɛ, kɛɛ ʋaa ma goo‐mɛni tala zii ɣilagi nɔ mɛ lɛ kɛ nu ta nɛpɛ gɔ ziɣi pele va.

¹²Su‐wulo‐zu ɣa ga Gala daa woi ɣa ga ŋɛnii kɛɛ‐zu ma maʋaa maa wui‐wuigɛi. Gaa liɛvɛ é leve gaa‐fele boa ta nɛpɛ ba. Towaa lɔ nu ƃɔga zɛʋui te yɔɔzu é pele la te yɔɔzu, nu maɣai vile‐suvɛ da ta maɣai maƃɔlɔi yíɛ pele la te yɔɔzu, nu na ki‐gaa‐ziɛi ƃɔga zaƃui yá ɣɛ kigi zu yíɛ natiɛ yɔɔzu wulo.

¹³Ʋulu ŋɛni ta nɛpɛ gɛ lɛ loowuni Gala gaazu. Te pɛ te laavɛ kpawu nui nii ɣaazu de vaazu woo zu wulozu gáazu ƃɔɔ ti.

¹⁴Tei tɔwɔ laa‐ʋaale kpakpa wala de ya nii é levega gee‐zuvɛ, na ɣa ga Ziizɛ nii é ga Gala dui, pagɛ a de ɣata fai nii va de siɣia ga gaama.

¹⁵Ƃɔvɛlaale laa‐ʋaale gɛ lɛ de ya ɔ́ ɣɛ ga nui nii zobo gɛ lɛ bɛ́ ga é de maa wõi zo da zobo‐bala‐bɛ ʋai zu. Kɛ̀ laa‐ʋaalegi nii é de ya tɛ‐ga woga la pele mazii ɣaazɔ zu è ɣɛ velei nɔ é ɣɛɛzu la ga diɛ. Na pɛ ge ɣɛɛvɛ, faa yowũ ʋaa lɛ maʋaa va.

¹⁶Nii mavelei ma a de lɔtɔ maa‐wõi‐ɣaa ƃɔ‐bai mamasa kpɔkpɔgi va ga duo lala, kɛɛ ʋaa ma maa‐wõi‐ɣaa wo ga diɛ ga de kpɔ‐ba maa zɔlɔ wo siɛgi zu maƃala ɣa loo la de ma.