Read Loma HIIƂULUITIƐ 6 Bible Online

HIIƂULUITIƐ 6 - Loma bible

HIIƂULUITIƐ 6

¹Na ma a de ƃe sa Kolai maɣala‐bogi lɔɔ‐zei‐zuvɛ lɛɛ ʋaa va, a de lɛ ga yee luo vele fai nii zu pagɛi nui ʋaa ma kulo‐ɣɛɛ wogɛi bɛ́. Dɛ lɛ vaazu niitiɛ maʋaa lɔɔ zeizu wɔnɔ. Natiɛ ta ga nu wulu‐ɣaa‐ʋe fai tii niitiɛ va te zu zai, zee‐la‐ma ɣɛɛ ʋai nu ya é vile Gala ba,

²kala‐bo‐bo fai é vile faa yowũ‐wua va nu ma, zee‐vɛɛ‐wo fai nu wũmɔ, saa vea wu‐ziɣi ʋai saa ya, ta faa‐wo gaa‐leveai nii yá yɛ laani laa‐zu wɔlɔ‐wɔlɔ ta wɔlɔ‐wɔlɔ.

³Tɔwɔ ani Gala ka ʋaa na bu, a da tɛi nii wo ga yee luo vele.

⁴Ani numai niitiɛ ta ziɣi na fai nii wulu te siɣia ga gaama, ɛ́ lɛ ga solowo faa ga te va wɔnɔ wulu Gala pɔ. Na ɣa ga numai niitiɛ te ɣi daa wodoa, Gala ta ʋaa‐nɛi wɔ̃ɔgɛi te vɛ, ta dɔ laa loai Gala baa ŋinɛgi maʋaa va,

⁵te ga numaitiɛ Gala goi maʋaa vagɔi wɔ̃ɔgɛi te vɛ ta ŋeteai nii é vaazu vaazu maɣaa‐ƃai.

⁶Toku ge zei ga ani ta fai na ɣɛɛ na, Gala dui ɣa na ta ɣɛ kpakosu gului ma ta ɣagi tiɛ ƃaa wulo ma.

⁷Zui nii tine ɣa ɣɛ puuzu ma ti‐ti yíɛ lɔ ba, na ɣa ɣɛɛ na sii‐zii ŋɛnii yìɛ ƃɛtɛ ma numai niitiɛ ʋaa ma zui ƃɔɔ lɛi ga tulu te ʋaa ma, tuuyiɛ ɣa wulo Gala da é too mayui ma.

⁸Kɛ̀ ani ŋai gulua ta ƃɛtɛ na ma ta bobo‐kɔlɔ‐zua, mayui lɔnɔ lɛ ɣɛɛ ba. Na ɣa ɣɛɛ na su ɣa ƃuo sa ga koto loo bɛ́. Maʋai ɣaa‐ƃela‐su nɔ ga zui ƃɔɔ ɣala.

⁹Gé wõila veaitiɛ, velei ƃalaa gé yɛpɛzu la ŋɛ na, wa dɛi gé laavɛ ƃɔɔ ga faa vagɔa ta wa dɔ ʋai zu te ga fai niitiɛ te balolai ʋaa ma.

¹⁰Ƃɔvɛlaale Gala gɛ lɛ ga tele‐bo tala nu ga gaazu wudɛ wa lii maazu ta wa wõila luoi wo dɛɛ tii‐ɣɛɛ vele ma wiɛ saƃu ma ná dɔ numaitiɛ ʋaa ma, wiɛ dɛ nɔ kɛ.

¹¹Towaa nɛɛ gé vɛ ga wo ɣile‐giledai wo dɛ ŋɛ na é ga wo zɔƃɛlɛ wo ɣigi zu wo loai ga ná laa ga daa ʋega ga wa ɣi‐togi maʋaa ɣa ga ƃɔɔƃɔɔ su ʋaa é yɛsu é ziiti daa‐wulo‐zu.

¹²Wa nii ɣɛ kɛɛ ʋaa ma wo mɛ lɛ fii‐ƃɛɛ wulo su, kɛ̀ wo ɣɛ ga numai niitiɛ wo‐kɔ̃ɔ bea te weli ge ɣɛɛ ga ŋɛnii ki‐togi wogɛi la zee‐la‐ma ƃɔga zii‐lɔɔ te zaala zu.

¹³Gala kɛi ma ki‐togi wosu ga Eeƃɔlɔhɛ̃ɛ, tei tɔwɔ nu ta lɛ ŋɛni na ɔ́ ƃakpa ɔ́ leve ba ga é kona wo ga ná daa‐zeigi, é boni ga kpɔɔ laa‐zeigi

¹⁴yíɛ ɣɛ tea, “Ƃɔɔƃɔɔ su gà tuuyiɛ loo yìɛ gè mazuwui maa wɔɔlɔ.”

¹⁵Nii mavelei ma, tei tɔwɔ Eeƃɔlɔhɛ̃ɛ ziɛni ná wu ga zii‐lɔɔ vele, é ki‐togi zu ŋɛnii maa zɔlɔ woni.

¹⁶Ƃɔɔƃɔɔ su nu ƃusea ta wona ŋɛnii nii ma yá leve te ɣagi va. Tɔwɔ kpɔɛi ɣaazɔ ta bo, kona ɣa yá gaamai lɛ su ga ƃɔɔƃɔɔ su, nu ta lɛ sa faa woga na wulu.

¹⁷Na ma tei é ɣɛni ga Gala zii‐ma ʋaa ga numai niitiɛ te weli ge ga ki‐togi é te ɣi daa wodo ga fai nii é pulu é ga ná deʋei maa lɛ ʋeliga, é deʋei ƃɔɔ ɣilini ga kona.

¹⁸É nii ɣɛɛni, kɛɛ ʋaa ma ŋɛni felegɔi niitiɛ te maa lɛ ʋeliga te ga fai lɛ zolowoga ga Gala goo ɣɛ te zu ga zɛɛ, a dai de velaa de va maa‐ƃɛɛ ʋaa ma de yii lɔ ga kpaanaga a de yee ka ki‐togi va é laani a de yee luo.

¹⁹Ki‐togi nii ɣa de ya è ɣɛ de yɛʋui lɔɔ‐ƃako‐su é ga ŋɛnii de lai la togɛi kpãa. Siitivɛ seɣei wuluvɛ é li ŋada maa wuai zu.

²⁰Na ɣa ga vɛ Ziizɛ liini na de ʋaa ma ga velei é loni da de luo kɛ́i ma ga laa‐ʋaale gwalai Mɛkisidɛ na laa‐ʋaaledai maleʋei zu wɔlɔ‐wɔlɔ ta wɔlɔ‐wɔlɔ.