Read Loma HIIƂULUITIƐ 9 Bible Online

HIIƂULUITIƐ 9 - Loma bible

HIIƂULUITIƐ 9

¹Deʋe maa wũgi ƃalaa tɔ kpɛtɛi ɣɛ tiɛ ziɛ la maƔala‐feli yekegi zu. Na ɣa ɣɛɛ na ŋeteai‐nii‐zu ŋada maa wua ʋaa ɣɛni maʋai va.

²Ƃɔvɛlaale seɣe vɛlɛ ta ƃɛtɛi ɣɛ. Na luovɛ vele seɣe vɛlɛi nii ʋaa va gulo labo vile‐su ɣɛni na, teeve na kpoolo‐ʋɔɔ gá nii tɔ da gá ga é ɣɛ na Gala gaazu. Tɔ minɛ lili seɣe vɛlɛi ʋaa va ga ŋada maa wuai zu.

³Seɣei fele kelei wuluvɛ seɣe vɛlɛ ɣɛni loni na tiɛ tili ga vɛ ná maa wuai maa‐wuo ŋɛni ɣaazɔ va.

⁴Gala zeke‐kɛɛ vana ge ɣɛni na kpɛtɛi ga zɛni ŋɛni wũ‐nɛɛ‐nɛɛ gala ʋaa ma ta deʋei maŋala‐ŋalagi nii maavɛ ƃɔgɔpɛ pɛi ɣɛ ga zɛni. Zɛni ŋɛni yãka ɣɛni kãla‐ŋalagi nii zu, Gala ta laa‐mii ŋɛnii wɔ ge ŋɛni yãkai ƃɔɔ zu. Na ɣa ɣɛɛ na Eelɔ̃ na tukpogi nii é ƃuʋuni ba wɔlɔ nà vɛɛ kwɔti lɛʋɛi nii va deʋei wonɛi ma natiɛ te ɣɛni kãla‐ŋalagi zu.

⁵Kãla‐ŋalagi maazuvɛ Gala ta ŋɛnia te mawo‐kɔ̃ɔga te ɣɛni na gove ge te va te ga Gala na saala‐malai maŋɛnia. Te maa niinigi ziai ɣɛ maa‐wõi‐ɣaa ŋada laavɛ maazu kãla‐ŋalagi ʋaa va. Gɛ́ lɛ zooga gɔ́ ŋɛnii niitiɛ maʋaa zu wulo tɛ‐tɛ ƃɔɔ nɔ ŋɛ ni.

⁶Tei sa kavele‐ƃɛtɛ ʋai wuloa ba ŋɛ na, laa‐ʋaalegitiɛ ta li wɔ ná luo zeɣe vɛlɛi wu tiɛ ta Ɣala zekegitiɛ ɣɛ na.

⁷Kɛ̀ seɣe vɛlɛi fele kelei wu laa‐ʋaale gwalai nɔ ɣa yá li na, tɔwɔ towaa nii ɣɛ nɔ kwena su ɣile. Nà wɔ ka ɣɛɛ na, ɛ́ lɛ lia na ɔ́ ƃe ŋama ziɣizu ga é kulo ga zalaɣa ƃɔɔ ʋaa ma é kulo kɔnɔ faa yowũi niitiɛ ʋaa ma numaitiɛ ta kɛ liti su.

⁸Nii mavelei ma, pelei nu ɣa lii la ŋada maa wuai zu Gala baa ŋinɛgi ɣa dɛɛzu ga daa lɛ dɛ laoni, ani nɔ ná luo zeɣe vɛlɛi ɣa dɛ loni.

⁹Tɔ ga po‐kɔ̃ɔ zaa ŋeteai ʋaa ma. Nii mavelei zu vele, faa‐nɛitiɛ ta ɣɛ zalaɣaitiɛ te wulo natiɛ wɔ tɛ lɛ zooga tɔ Gala‐feli nui na ki‐gaa‐ziɛi ɣɛ ga ŋɛnii maa‐wulo‐zu lɛ ɣɛɛ maʋaa va.

¹⁰Natiɛ te mayekegi ɣa ɣɛ nɔ ga mii ŋɛni ta kpoale ŋɛni é vɛɛ maa‐wuo ʋaa mazii laali‐taaliga va. Ta ga tɔgitiɛ te lɛi ga nu yìɛ ziɛ ga tiɛ nu ƃuse lɔtɔi ʋaa ma é yɛsu siɛgi ziiti ga ŋetea ƃɛtɛ wulu ga maniinɛ.

¹¹Kɛ̀ tɔwɔ Kolai vaani ga é ɣɛ ga laa‐ʋaale gwalai faa vagɔi niitiɛ ʋaa ma te vaa. Ná Gala zeke‐kɛɛ zeɣe vɛlɛi maʋaa wala ƃakpavɛ. Maa‐wulo‐zu lɛ maʋaa va. Ɛ́ lɛ ƃɛtɛni ga nu ƃuse yee. Na zu‐wulo‐zu ɣa ga ɛ́ lɛ ga ŋeteai nii zu ŋɛni.

¹²É leveni ná luo zeɣe vɛlɛi wu é li ŋada maa‐wuai zu ná ɣɛ nɔ ɣile. Nà wɔ ge kulo‐ɣɛɛ woni. Ɛ́ lɛ ŋama zalaɣai wuloni ga bili ŋama ɔɔ nikɛ ŋama. Kɛ̀ é kuloni ga kpɔɔ ŋamai. Nii mavele ma wũ‐maa‐wogi é boga towaa yɛ ma wɔlɔ‐wɔlɔ ta wɔlɔ‐wɔlɔ.

¹³Ani bili ƃɔga nikɛ zinɛ te maŋamai vɛɛ nikɛ ƃea niinɛ ɣalaa mayuwu va te ʋaza fai maa‐woola bea ma, na ɣa kɛ maveaitiɛ te kulo bu te lɔtɔi maa‐wuo ʋaa ma,

¹⁴Kolai maŋamai mu teɣa sa? Kolai maŋamai ɣa da ɣi‐gaa‐ziɛi maa wuo é de ziɣi tii niitiɛ wulu te zu zai kɛɛ ʋaa ma de tii ɣɛ ʋululai maƔalagi vɛ. Ƃɔvɛlaale Kolai ƃɔɔ wuloa ga zalaɣa é ƃɔɔ ɣɛ Gala bɛ ga faa‐nɛi nii maa‐wulo‐zu lɛ ba. É nii ɣɛɛni toku ge zei ga tɔ ga nui ná ŋeteai wɛ̃ɛ gɛ lɛ ba.

¹⁵Na ma towaa é de yɔɔzu da Galani deʋe niinɛi ʋaa ma, kɛɛ ʋaa ma niitiɛ te liligɛi te weligi nii maa zɔlɔ wo maʋaa wɛ̃ɛ gɛ lɛ ba nii te ɣi togɛi la. Ƃɔvɛlaale saa loovɛ. Na ɣa ga sai nii é te wũ maa wosu faa yowũi niitiɛ zu te te ɣɛɛni deʋe wɔlɔ‐zaɣagi yee wu.

¹⁶Vɛ po ŋɛni ʋaa ɣa ɣɛ na, nui é wo ŋɛnii keea nu lɛɛ kɛni manui zaa ʋai ɣɛ ga fai é ɣɛɛ.

¹⁷Toku ge zei ga nu ɣa za pɛ pó ŋɛni ʋai ɔ́ ɣɛ teɣa ɣɛɛzu ga fai zɛgɛi ma, ƃɔvɛlaale nui é wo ŋɛnii keea nu wuloa, ani nɔ zɛʋui ɣa dɛ su maʋai lɛ laa ma.

¹⁸Na ma deʋe maa wũgi ƃalaa maʋaa lɛ ŋɛni laani pele ma ŋama ʋaa ɔ́ ƃe ɣɛɛzu ba.

¹⁹Ƃɔvɛlaale tei Mooze é Gala na tɔgitiɛ ɣaazɔ wuloni la é bo numaitiɛ ma, é nikɛ yuwua te maŋama ziɣini ta baala deɣa ƃoei kpake‐kpake é vɛɛ tife wũ‐nɛɛ‐nɛɛ ba. Ŋamai ƃɔga ziɛi é te ʋazani sa tɔ kɔlɔi ma ta ƃɔga numaitiɛ.

²⁰É ɣɛni ɣɛɛzu tea, “Nii ɣa é ga ŋamai deʋei ʋaa ma Gala ge daa wo ya.”

²¹Vele nɔ na kɔnɔ é ŋamai ʋazani la seɣe vɛlɛi ma ta ŋɛni yãkaitiɛ ɣaazɔ tɔ tii ɣɛɛ la Gala zeke‐kɛɛ ʋai zu.

²²Ƃɔɔƃɔɔ su yá ɣɛ na ga tɔgi yee wu vele, nu ɣa bo ga ŋɛni bɔɔlɔ kele maa ɣa wuo ga ŋama. Na ɣa ɣɛɛ na ani ŋama lɛ wuu‐ni, faa yowũ zu‐ʋaa‐ɣɛ faa lɛ ɣɛɛ na.

²³Nii mavele ma, pagɛi Gala ta zɔɔlai mawo‐kɔ̃ɔgitiɛ te maa wuo ga Gala zeke‐kɛi niitiɛ. Na ɣa ɣɛɛ na Gala ta zɔɔlai ɣagitiɛ te maa‐wuo zalaɣai ɣɛ ga ŋɛniitiɛ ta va é leve natiɛ va.

²⁴Su‐wulo‐zu ɣa ga Kolai lɛɛ ŋada maa wuai nii zu vɛ ná lɛ ƃɛtɛni ga nu ƃuse yee ƃeɣa. Vɛtiɛ ná ƃɛtɛi ga nu ƃuse yee ƃeɣa natiɛ ta nɔ ga ŋada maa wua ƃɔɔƃɔɔgi mawo‐kɔ̃ɔ. Kɛ̀ é lɛɛni Gala ta ga é wulo Gala gaazu de mazaƃu ma.

²⁵Ɛ́ lɛ wɔnɔ ŋɛni ƃalaa ga yíɛ ƃɔɔ wulo ga zalaɣa ti‐ti, è ɣɛ velei laa‐ʋaale gwalai ɣa lɛɛ la ŋada maa wuai zu ga kwena‐kulo vele ɣile‐gile yíɛ li na ga ŋamai nii ɛ́ lɛ ɣɛɛ ga tɔ ƃɔɔ ŋama.

²⁶Ani ɔ́ ɣɛ na ŋɛ na, kɛni Kolai ɔ́ ɣɛ laa‐nɔwɔ wosu wɔ é ziɣi ƃɔɔ ŋeteai lɔɔ‐zei ʋolo ma. Kɛ̀ è ɣɛ velei é la, é wulola ɣɛɛni nɔ ɣilekpu ŋeteai nii wɛ̃ɛgi ma, nà wɔ ge kulo‐ɣɛɛ wo, kɛɛ ʋaa ma é faa yowũ maʋaa ziɣi gá kpɔɔ wulo vele ma ga zalaɣa.

²⁷Tɔwɔ è ɣɛ velei nɔ é la nu ƃuse maʋaa ma ga é zaala ɣɛ ɣile, na ɣa wulo na ba faa‐wo gaa‐leve ʋai va,

²⁸vele nɔ na é la ga Kolai. Tei é wuloa ga zalaɣa ná ɣɛ ɣile ga é nu lamaa na faa yowũ ziɣi ga vɛ, tɔ vaazu kulolai fele kelei ɣɛɛzu. Ɛ́ lɛ ga é va é faa ta ɣɛ é vile faa yowũ va, kɛ̀ towaa wulo ga é numai niitiɛ valo te ɣaazu túo maʋai te ɣaazu ga faa.