Read Loma JĨI 1 Bible Online

JĨI 1 - Loma bible

JĨI 1

¹Nài gè ga Jĩi gè ga Gala na tii‐ɣɛɛ nu ta de maliɣii Ziizɛ Kolai, gà kɔlɔi nii wonɛzu wo wɔ, wai wo ga nu zuwu zei‐zu puugɔ kai felegɔi wo yɛzɛgɛi. Gè wo luoni gè wo luo.

²Nà numaa, ani kɔ̃ɔ‐kɔ̃ɔ sii laali‐taaliga ta wo na ga wiɛ, a te ziɣi nɔ ga kuu‐zu‐nɛɛ ƃakpa.

³Ƃɔvɛlaale wa yee‐la‐mai zu‐wɔ̃ɔgai ɣa a va ga wo lo fai kpãa.

⁴Na ɣa ɣɛɛ na, a ƃe ba to‐kpãagi zu‐lɔnɔ ɣɛ ba ga daa‐ʋega, kɛɛ ʋaa ma maa‐wulo‐zu mɛ lɛ ɣɛ wo maʋaa va, ŋada ta nɛpɛ ge mɛ lɛ yɛ wo ʋaa va, wo maʋaa ɣaa wooligɛi fai pɛ su.

⁵Ani kele‐ɣele ka vala na wo ta nɛpɛ ma, pagɛ manui Gala gaa‐zaɣa kɛ ma. Towaa fe zéea. Towaa yá ŋɛni ʋe nu pɛ zeea ga gaazu‐wodo vele. Zii‐ɣaa‐wãla ʋaa lɛ ɣɛɛ ba nu ya.

⁶Kɛ̀ maa nɛɛvɛ manui gaa‐zaɣa kɛ ma zee‐la‐ma zu, sakpe nɛpɛ ge mɛ lɛ ɣɛ kígi zu. Toku ge zei ga nui sakpe ka ɣɛ zíi zu máʋaa ɣa wulo ga yuwu maɣiligi fãga ɣa ɣɛ zeizu su yíɛ kɛ takpa‐takpa.

⁷Maa lɛ nɛɛni na ɣavele nui ɣi gɔ ɣɛ na ga towaa ŋɛni ta nɛpɛ sɔlɔ wo de maliɣii ya.

⁸Na ɣa ga nui ki‐to‐su fele ɛ́ lɛ loni kpãa tuo velei ɣaazɔ zu.

⁹Maa nɛɛvɛ a de wɔi nii toai bu é yoka teve ná bɔɔlɔlai mazaƃu ma,

¹⁰kpɛtɛ nui wɔ yíɛ kɛ na too‐bu ŋeteai mazaƃu ma. Su‐wulo‐zu ɣa ga è ɣɛ velei nɔ tifei mawoei ɣa kɛɛ la, vele nɔ na kpɛtɛ nui maʋaa ɣa ƃea la gá.

¹¹Ƃɔvɛlaale foloi ɣa daa lao maƃadi yee ɣaa‐wãla‐wãlagi tifei woto‐woto mawoeitiɛ te wu. Nà wɔ ka ɣɛɛ na ná pagi zu‐ƃɔnɔ‐woga ɣa na. Vele nɔ na kpɛtɛ nui ɣa ɣɛ da ɣɛɛ ʋai wulu ná ŋeteai maʋaa ƃea gá.

¹²Tuuyiɛ ɣa nui nii ma yá yii la su‐wɔ̃ɔ ga. Toku ge zei ga yá ziɛ na su‐wɔ̃ɔgi wu, towaa ƃaa‐la‐ma wɔɔlɔgi nii maa zɔlɔ wo é ga zɛʋui Gala ge numaitiɛ ɣi toga la. Na ɣa ga numai niitiɛ te wõiyai ga Gala.

¹³Tɛ‐ga ɣa wo na ga nu ta nɛpɛ, maa lɛ nɛɛni manui ɔ́ ɣɛ tea, “Gala ka é tɛ̀ɛ gá.” Ƃɔvɛlaale faa yowũ‐ɣɛɛ lɛ‐ga lɛ zooga ɔ́ wo ga Gala. Na ɣa ɣɛɛ na tɔ ɣagi ɛ́ lɛ nu ta nɛpɛ tɛɛ gá.

¹⁴Kɛ̀ tɛ‐ga ɣa wo ga nu ɣile‐giledai kígi zu vele ani faa ta ɣa va na manui ɣaazu. na ɣa ɣɛɛ na tɔ ɣagi wõi‐ɣɛ‐ma ʋai maa nɛɛ gáazu.

¹⁵Tɔwɔ nu wõi‐ɣɛ‐ma ʋai wɔ ka ɣɛɛ na nu va ga ko, towaa malui ɣa nɔ ga faa yowũ. Faa yowũ wɔ ka wɔɔlɔ na é daa ʋe, towaa a va ga saa.

¹⁶Wõìla veaitiɛ, a mɛ lɛ ƃe ba gaa‐wɔlɔ gɔ wo ga wiɛ.

¹⁷Faa‐nɛɛ‐ɣɛi nɛpɛ pagɛi ta faa‐nɛɛ nɛpɛ maa‐wulo‐zu lɛ ba te wulovɛ ga de wũ maazu vele. Kulovɛ ŋada wodoai maɣeeai ya é yii. Na ɣa ga nui nii maa lɛ ʋeliga kpidi zei‐zu ɔ́ ɣɛ maʋaa va.

¹⁸É siɣini ƃɔɔ yii ma é de wulo ŋetea ga gaama woi, kɛɛ ʋaa ma de ɣavele ɣɛ ga ʋulu ŋɛnii niitiɛ é te ƃɛtɛɛ te mamaa wũga.

¹⁹Wõìla veaitiɛ, a nii wɛ̃ɛ. Kɛni nu pɛ ka ɣɛ ga nui nii ná faa‐mɛnisu ʋileai, kpɔɛzu ƃai, zii‐ɣaa‐wãlazu ƃai.

²⁰Ƃɔvɛlaale nu ƃuse na zii‐ɣaa‐wãla ɣɛɛ‐zu lɛ ma Gala na tele‐bo tuoi zu.

²¹Na ʋaa ma a maa‐yɛ̃ɛlɛ fai ɣaazɔ loo ya ta tuo vele yowũ lama‐lamagi, na ɣa ɣɛɛ na woi nii yá wɔ̃lɔ wo yii zu é wo yɛʋui wulo faa zu wo yee zei na wu ga kolo vele.

²²A ɣɛ ga Gala goi zu‐ʋaa‐ɣɛɛ vea wo mɛ lɛ nɔ ɣɛ ga mɛni bea a wɔ ɣɛ ƃɔɔ ɣaa wɔlɔsu.

²³Ƃɔvɛlaale nui nii yá Gala goi mɛni nɔ tɔwɔ ɛ́ lɛ su ʋaa ɣɛɛ, máʋai wulovɛ ga nui nii yá wɛlɛ pɛtɛ su va é ɣaazuvɛ maa ƃɛɛ ná yɛga ba é wulo la ŋetea.

²⁴Yá ɣaazuvɛ maa ƃɛɛ na ŋɛ na é ziɣi na é li gaazuvɛ‐ƃɛtɛ velei yeema bɛ́ ga maa ʋilea.

²⁵Kɛ̀ tɔgi nii maa‐wulo‐zu lɛ maʋaa va é ga tɔgi yá de ɣɛ ga wɔɔlɔa, nui yá wɛlɛ maʋai zu va é ɣaazu kɛ nɔ ba é ga nui nii ɛ́ lɛ nɔ faa mɛniga ɔ́ yeema ma, kɛ̀ nii yá faa mɛni yíɛ su ʋaa ɣɛ, tuuyiɛ ɣa ɣɛ ma kɛ́ɛ ʋai zu.

²⁶Ani towaa ɣɛ na nu ta nɛpɛ kuu zu ga sɔƃɛlɛ ɣa Gala zeke‐kɛɛ ʋaa zu tɔwɔ manui lɛ zia laavɛ wu, to mu yíɛ ƃɔɔ ɣaa wɔlɔ, manui na Gala zeke‐kɛi ɣa ɣɛ ga ƃɔɔvɛ ʋaa.

²⁷Gala zeke‐kɛi nii maa wuai maa ziɣia de ɣeea Gala gaazu tɔ ga nii. Tɔ ga nu li po duitiɛ vɛ ta po ŋazai niitiɛ zini gɛ lɛ te vɛ ani ta vili na faa ƃoei zu. Na ɣa ɣɛɛ na manui mɛ lɛ ƃe ba ŋeteai nii zu ʋai ɔ́ pɔtɔ.