Read Loma JĨI 2 Bible Online

JĨI 2 - Loma bible

JĨI 2

¹Nà numaa, tei tɔwɔ de maliɣii Ziizɛ Kolai nii é ga saala‐malai maliɣi máʋai ziɣiai wiɛ ga gaama, a mɛ lɛ su‐yɛvɛ bo.

²Toku ge zei ga ani nui nii zɛni bala ɣaiga ta ɣɛ zée va maa ɣiliai ga zeɣe vapa, yá va na vɛ wo ƃɔgɛi na, na ɣa ɣɛɛ na mɔɔlɛ nu va na tɔ ƃalaa seɣe zaɣa ma,

³nui nii maa ɣiliai ga seɣe vagɔ wo wui to na woo ma wiɛ ɣɛ ma, “Sei‐zu ɣa na,” tɔwɔ wiɛ ɣɛ mɔɔlɛ nui ma, “Lo minɛ,” ɔɔ “Zei kɔ̀wɔ wu,”

⁴kɛ̀bɛ wa letele ka na wa ƃɔɔ zu yɛvɛ wo ɣɛ ga faa‐wo gaa‐leve vea faa yowũ‐ɣɛɛ ɣi‐gaa‐ziɛi zu, kɛlɛɛ?

⁵Wõìla veaitiɛ, a wui to dɛɛ ma wo nii mɛni. Kɛ̀bɛ Gala ge yee ƃakoni niitiɛ va te mɔɔlɛi ŋeteai nii zu ga te ɣɛ ga kpɛtɛ vea zee‐la‐mai zu, na ɣa ɣɛɛ na te weli ge ɣɛ ga ná masadai é numai niitiɛ ɣi toga la te wõiyai la, kɛlɛɛ?

⁶Tɔwɔ wɛ lɛ kɛɛni wɔ ƃaa la mɔɔlɛ vea ma. Kɛ̀bɛ kpɛtɛ veaitiɛ ɣa te zeizu wo ɣa tiɛ wo mai kuuti zu, kɛlɛɛ?

⁷?Ta lei tɔ ɣɛ daa‐ŋala‐ŋala tuoi wosu ga wiɛ é vile ƃaa‐la‐ma laa‐zeigi nii va seiyai wo va?

⁸Ani wa ɣɛ na ziɛzu ga ɣalasogi na tɔgi è ɣɛ velei Gala kɔlɔi bosu la yíɛ ɣɛ tea, “Wõi ga è wɔɔ nu è ɣɛ velei è ƃɔɔ wõini la,” wa ɣɛ kɛɛzu ga pagɔ.

⁹Kɛ̀ ani wa ɣɛ na su‐yɛvɛ bosu, wa ɣɛ faa yowũ ɣɛɛzu. Nà wɔ ka ɣɛɛ na, tɔgi laa woi ɣa faa vɛɛ wo va ga wa ga tɔ‐kãla‐ŋala bea.

¹⁰Ƃɔvɛlaale nu nɛpɛ ka ɣɛ na ziɛzu ga tɔgi zɔitiɛ ɣaazɔ tɔwɔ manui lɛ kɛɛni ɔ́ ziɛ ga toso ɣila, a kɛ tii te pɛ te ŋala‐ŋala fai yɛga ma.

¹¹Toku ge zei ga nui é tɔgi lɛɛ yíɛ ɣɛ tea, “Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo,” tɔ nɔ ɣa kɔnɔ é ɣɛɛ tea, “Mɛ lɛ nu vaa.” Ani wɛ lɛ ɣɛni wɛ̃ɛ‐ziɛ bosu wa wɔ wiɛ nu vaa, wo ɣɛɛ nɔ na ga tɔ‐kãla‐ŋala bea.

¹²Na ma zɛpɛi wa ɣɛ puuzu ta tuoi wa ɣɛ bosu, a wiɛ kɛ è ɣɛ nui ná faa‐wo gaa vaazu levezu wɔɔlɔlai malɔgi yee wu.

¹³Ƃɔvɛ‐laale nui ɛ́ lɛ gaazu‐maa‐wõi‐ɣaa woga, gaazu‐maa‐wõi‐ɣaa ʋaa lɛ ɣɛɛ faa‐wogi va gaa ɣa leve manui ya. Na ƃalaa ɣɛɛvɛ gaazu‐maa‐wõi‐ɣaa yee ɣa wudɛ faa‐yɛ‐mai maazu.

¹⁴Nà numaa, ani nu ɣa bo na ga zee‐la‐ma ɣa zéea tɔwɔ ɛ́ lɛ malii ɣɛɛzu, zɛƃɛ ɣa yá ɣɛ ga nà mawulo‐nu‐mai? ?Ná zee‐la‐mai ɣa zoo é balo?

¹⁵Ani de wɔi ta ɔɔ de maŋaza nui ta tete ɣa loo na te ta ma pulu loo te ma,

¹⁶wo ɣila ge ɣɛ te ma, “A li zii‐laa zu, kɔɔlɛ ɣa ƃɛ wiɛ wo vile,” tɔwɔ ɛ́ lɛ ŋɛnii niitiɛ ʋeeni te ya te maƃala te ma nu lɔtɔi maʋaa ma, zɛƃɛi yá ɣɛ ga mawulo‐nu‐mai?

¹⁷Vele nɔ na é la ga zee‐la‐ma. Ani tɔ ɣilekpu nɔ ve malii lɛ ɣɛɛzu, a kɛ tii su zaavɛ.

¹⁸Kɛ̀ ɣee ta nu ta ɣa ɣɛ tea, “Zee‐la‐ma ɣa è ya, nà wɔ gìɛ tii ɣɛ.” Gà bo manui ma ga yà yee‐la‐mai lɛ gàazu yà lii mɛ lɛ vɛɛ ba, nà dɛi gà nà zee‐la‐mai lɛ nà tii‐ɣɛɛ vele ma.

¹⁹Gà bo má ga,“? Siɣivɛ yìɛ ga gaama ga Gala ka ɣilekpu?” Yà na ɣɛɛzu ga pagɔ. Maa‐luo gɔʋɛitiɛ ƃalaa te na ziɣivɛ ga gaama tiɛ ƃeli su ga duo.

²⁰?Bɔ̀i, yài ŋɛ ni è litigɛi, è wõini é lɛ ga yìɛ ga zee‐la‐mai nii malii‐ɣɛɛ ʋaa lɛ ba tɔ ga mayãka?

²¹Tei de mama gwɔlɔ Eeƃɔlɔhɛ̃ɛ é dui Aize wuloni ga é ɣɛ ga zalaɣa Gala zeke‐kɛɛ vanagi ma, kɛ̀bɛ é dɛɛni ga nui é ga tele‐bo tuo‐wo nu ná tii mavele ma, kɛlɛɛ?

²²Wa wɛlɛ na va ga zee‐la‐mai maʋaa wũ bu ziɣiai ɣɛ ná tii‐ɣɛɛ zu, maʋaa ɣaa wooligɛi tii‐ɣɛɛ mavele ma.

²³Tɔwɔ Gala kɔlɔi laa woi leveni ma. Na ɣa ga tei é boni yíɛ ɣɛ tea, “Eeƃɔlɔhɛ̃ɛ laani ga Gala, nà wɔ ge kɛ Gala ge siɣi ga tele‐bo tuo‐wo nu.” Tɔ Eeƃɔlɔhɛ̃ɛ lili ga Gala na wɛ̃ɛ vagɔi.

²⁴Wa wɛlɛ na va ga nu ɣa ɣɛ ga tele‐bo tuo‐wo nu ná tii‐ɣɛɛ mavele ma, ɛ́ lɛ nɔ ga ná zee‐la‐mai tɔ ɣilekpu.

²⁵Pele zii ɣilagi nii zu, ŋaza nui Lɔihɛɛ nii é ƃɔɔ ɣɛɛni ga yawo, kɛ̀bɛ é ɣɛɛni ga tele‐bo tuo‐wo nu ná tii mavele ma, kɛlɛɛ? Na ɣa ga tei é yee zeini keelaitiɛ wu é te leve ga pele ƃɔnɔ.

²⁶Velei nɔ nu lɔtɔi ɣa ziɣi la zɛʋui va é ɣɛ ga ŋɛnii sái, vele nɔ na zee‐la‐mai ɣa ziɣi la tii‐ɣɛɛ va é ɣɛ ga ŋɛnii su zai.