Read Loma JĨI 4 Bible Online

JĨI 4 - Loma bible

JĨI 4

¹Zɛƃɛ ɣa a kɔɔ leve? Zɛƃɛ ɣa a ŋapi leve wo zaama? Kɛ̀bɛ wa ŋɛni‐wõi‐leve‐mai ɣa é kɔɔ ɣa wo yii zu, kɛlɛɛ?

²Ŋɛni‐wõi wala ɣa vili wo yii zu wɛ lɛ sɔlɔ woga, wiɛ numaa vaa nà mazaƃui ma. Na ɣa ɣɛɛ na wa wo vaa te weli mayii vili wuu zu, wa wɔ wɛ lɛ maa zɔlɔ woga, wiɛ ŋapi wɔ nà mazaƃui ma wiɛ kɔɔ loo numaa ma. Ɛ́ lɛ ɣɛɛ wo ya, ƃɔvɛlaale wɛ lɛ Gala felizu máʋaa ma.

³Wa Gala feli ŋɛni maʋaa ma wɛ lɛ maa zɔlɔ woga, ƃɔvɛlaale wɛ lɛ felia ga feli vele. Wa kɛ ga wo tii ɣɛɛ la wa ŋɛni‐wõi‐leve‐ma yekegi zu.

⁴Wai ŋɛ ni wo ga nui nu lɛ laa la!? Wɛ lɛ kwɛ̃ni ga nu wõi ʋai ga ŋeteai nii tɔ ga sili Gala faa ma? Na ma nui nɛpɛ é wõini ta ŋeteai nii te ɣɛ siɛ‐pulu zu, manui ɣa ɣɛ ga Gala sili yɔ̃wɔ.

⁵?Ƃaa wo ɣigi zu tɔ ga faa yãka ga velei Gala kɔlɔi bosu la yíɛ ɣɛ tea, “Zɛʋui kpɛtɛi ga é ɣɛ de ya Gala ka gwala wõi ɣɛɛzu yíɛ kɛ ga maa‐lolo‐wulo vele”?

⁶Kɛ̀ tɔ maa‐wõi‐ɣaa ƃɔ‐ba lamaa wosu. Na ma tɔ wosu Gala kɔlɔi zu mawoi ga “Gala ka wɔ ga kpɔɔ‐ʋaa‐wɔɔlɔ‐gaazu vea, kɛ̀ towaa maa‐wõi‐ɣaa ƃɔ‐ba wo ga kolo vea.”

⁷Na ma a wolo Gala bɛ. A lo dɛvele la. Wa na ɣɛɛ na la, towaa ziɣi wo wulu é vela.

⁸A lɔtɔ Gala ba. Wa na ɣɛɛ na, towaa lɔtɔ wo va. Waitiɛ wo ga faa yowũ‐ɣɛɛ vea, a yee wulo su wo maa wuo su. Na ɣa ɣɛɛ na wo yiitiɛ maa ziɣi, wai ŋɛ ni wo ɣi‐to‐su ɣɛɛ fele.

⁹Pagɛ maa‐wõi ƃakpa loo wo ma zii‐zuuli wo ga wiɛ wo ɣaazu‐maa‐yiɛ yìɛ loo wiɛ. Pagɛ wa ŋɛɛ ʋai wote ga zii‐zuuli, wa wuu‐zu‐nɛi wɔ ge wote ga maa‐wõi‐loo‐ma.

¹⁰A wolo de maliɣii vɛ. Towaa wo wɔɔlɔ.

¹¹Nà numaa, a mɛ lɛ ɣɛ faa yowũ wosu ga ɣiini da. Nui yá ɣɛ faa yowũ wosu ga bɔɔ la ɔɔ yíɛ faa vɛɛ bɔɔ nu va, manui ɣa ɣɛ faa yowũ wosu é vile Gala na tɔgi va yíɛ faa vɛɛ bá. Tɔwɔ ani yà faa vɛɛ na tɔgi va, ɛ̀ lɛ ɣɛɛ ga tɔgi zu‐ʋaa‐ɣɛɛ nu, kɛ̀ yà ɣɛ ga máʋaa ɣaa‐leve nu.

¹²Tɔ‐da nui ɣa nɔ ɣilekpu, é wɔnɔ ga faa‐wo gaa‐leve nui tɛ ɣilekpu. Na ɣa ga nui zobo ge bɛ́ ga é nu valo, zobo ge bɛ́ wɔnɔ ga é nu zu ŋala‐ŋala. Kɛ̀ è lo‐su ɣa ga minɛ è è wɔɔ nu na faa‐wo gaa levezu?

¹³A nii mɛni na, wai wo ɣɛɛzu tea, “Zaa ɔɔ ŋina gá li tai nii zu ɔɔ gá li tai nu zu gé kwena siɣi na gé podi lɔ na ga gé ŋɛni zɔlɔ wo.”

¹⁴Tɔwɔ wɛ lɛ faa wɛ̃ni ɔ́ vile nii va é vaazu ɣɛɛzu ŋina. Zɛƃɛ ɣa é ga wa ŋeteai? Ƃɔvɛlaale wo maʋaa wulovɛ è ɣɛ kolo ʋo‐ʋogi yá vɛɛ, na ta wolo ɣa kɛ nɔ é yɛ̃ɛlɛ.

¹⁵Nii mugi pagɛi wo bo tɔ ga wo ɣɛ tea, “Ani de maliɣii Gala ka ʋa na bu, gá yɛ ŋetea. Gá wɔ gá sa gá fai nii ɣɛ ɔɔ gá sa gá na ɣɛ.”

¹⁶È ɣɛ velei é la, wa yoka teve ga ƃɔɔ wɔɔlɔ vele. Na ɣavele yoka‐teveai ɣaazɔ ɣa ga faa yowũ.

¹⁷Nui nɛpɛ é kwɛ̃ni ga nii é pele ma ga é kɛ, kɛ̀ tɔwɔ ɛ́ lɛ kɛɛni ɔ́ kɛ, towaa ɣɛ ga faa yowũ manui ʋaa ma.