Read Loma 1 PITE 2 Bible Online

1 PITE 2 - Loma bible

1 PITE 2

¹Na ma a wãla‐lɔɔ luo ɣaazɔ loo ya ta gaa‐wɔlɔ‐bo gbana luo‐wogai. A daa‐nɛɛ‐wũ‐ba luoi loo ya ta kuu‐zu‐yowũ‐ma é vɛɛ daa‐ŋala‐ŋala faa mazii ɣaazɔ va.

²È ɣɛ velei duu‐ɣaa niinɛga ta kɛɛ la, a wiɛ Gala ta ŋini yiɛ ɣaa‐zekagi maa‐wõi‐wõi kulo, kɛɛ ʋaa ma wo wɔɔlɔ balolai zu sáala zu.

³Ƃɔvɛlaale wo de maliɣii na tuola‐nɛi wɔ̃ɔga.

⁴A va pɔ́ vɛ. Towa é ga ʋululai mawɔtii nii nu ƃuse ɣɛlɛɛ bá, tɔwɔ siɣiai Gala bɛ é gáazu ga ŋɛnii tɔnɔ wɔɔlɔi ba.

⁵Na ɣa ɣɛɛ na è ɣɛ velei wo la ga ʋululai mawɔti, a ƃɔɔ ɣɛ ga nui togɛi ga Gala ta vɛlɛ wo ɣɛ laa‐ʋaaledai nii zu maa wuai wiɛ Gala ta zalaɣa wulo nii Gala ka yee zei bu Ziizɛ Kolai zaala zu.

⁶Ƃɔvɛlaale ponɛvɛ Gala kɔlɔi zu mawoi ga “A wɛlɛ! Gà kwɔti laazu Zaayã veaitiɛ zaama é ɣɛ ga kwɔtii nii zɔitiɛ ta vile ba. Towa zèe ƃakogɛi bá, tɔnɔ ƃakpai bá. Nui dái ga máʋai ɛ́ lɛ wũfega.”

⁷Wai wo máʋaa ziɣia ga gaama wa dɛi tɔ wo ya ga tɔnɔ‐ba ŋɛni. Kɛ̀ è ɣɛ velei ponɛi la, taitiɛ tɛ lɛ máʋaa ziɣini ga gaama tɔ te ʋaa ma ga “Kwɔti ƃɔɔƃɔɔgi nɔ pɛlɛ‐lo beaitiɛ te ɣɛlɛni ba, tɔwɔ é ɣɛɛ ga kwɔtii maʋaa wɔɔlɔi baa pɛ ba.”

⁸Tɔwɔ, “Tɔ ga kwɔtii yá kɛ numaa te ɣali é ga kwɔtii yá kɛ numaa te loo.” Ta ɣali, toku ge zei ga tɛ lɛ goo‐mɛni kuloa Gala daa woi zu, è ɣɛ velei é ná yɛni da ná luo é dɛ ga te kɛ.

⁹Kɛ̀ wa dɛi wa ga ziitiɛ Gala zee ƃakogɛi te va wo ga ɣalaso laa‐ʋaalega wo ga zii nii maa wuai. Wa ga Gala tɔ ƃɔɔ ná numaa. Nii ɣɛɛvɛ ga nui é wo liliga wo wulo kpidi zu wo va ná ŋada wodoa maa‐wɔlɔ‐wɔlɔgi zu, wiɛ kɛ́ɛ ʋaa maa‐wɔlɔ‐wɔlɔgitiɛ wo.

¹⁰Siɛ ta zu wɛ lɛ ŋɛni wuloni su ga zii, kɛ̀ wa sa ga Gala na numaa. Siɛ ta zu wɛ lɛ ŋɛni gaazu‐maa‐wõi‐ɣaa maa zɔlɔ woni, kɛ̀ gaazu‐maa‐wõi‐ɣaa maa zɔlɔ wogɛ sa wo vɛ.

¹¹Wõìla veaitiɛ, tei wɛ lɛ wɔ taa zu wo ga wɛ̃ɛ, wo veevɛ a ƃe teve ŋeteai nii zu ŋɛniitiɛ mayii‐leve faa va wuu zu. Ta ɣa te kɔɔ vɛɛzu wo yɛʋui va.

¹²A ɣata tuo vagɔ‐woga va zii ƃalaa‐gitiɛ zaama, kɛɛ ʋaa ma ani ta bo na ga wo la ga wa ga tuo vele yowũ‐wulo vea, te wɛlɛ wo ɣɛɛ ʋaa vagɔi va te Gala daa maa lɛ ga ʋoloi yá wulo la de maazu.

¹³A kolo wulo nu ƃuse yaa ɣaa‐ƃaa ɣaazɔ zu de maliɣii mazaƃu ma. Ani ƃalaa ɣalaso gwalai ɣa maɣaa‐ƃai zéea, a wolo bɛ́.

¹⁴Ani wɔnɔ gɔmɛti veai niitiɛ ɣalaso gwalai ɣa te leve ga te tɔ kpɛ pele‐ma lala luo‐wo bea ma te pele‐ma luo‐wo bea laa maa lɛ, nàtiɛ ɣa maɣaa‐ƃai te ya, a wolo te vɛ.

¹⁵Ƃɔvɛlaale Gala zii‐mai ɣa ga wo titi beai niitiɛ ɣaa yii ta wo ɣɛɛ‐zɔ bo ta ʋaa ɣaa‐ɣaa lalai zaƃu zu. A nii ɣɛ ga gaama luo‐woga.

¹⁶A luo è ɣɛ wɔɔlɔa. Na pɛ ge ɣɛɛvɛ, a mɛ lɛ wa wɔɔlɔlai ziɣi ga ŋɛnii nii yá tɔ siɣi wo va ga wiɛ faa yowũ ɣɛ. Kɛ̀ a luo è ɣɛ Gala na dua.

¹⁷A wũfe nu pɛ ma. A wõi ga wo vaitiɛ. A luo Gala ba, wo wũfe ɣalaso gwalai ma.

¹⁸Wai wo ga tii‐ɣɛɛ vea, a wolo wa nu kɛɛ veaitiɛ vɛ wũfe‐ma velei ɣaazɔ zu. A mɛ lɛ nɔ kɛ wa nu kɛɛ veai niitiɛ vɛ te luola ɣa nɛɛ te ɣaa vele lai. Kɛ̀ a kɛ niitiɛ vɛ ƃalaa ta luoi ɣa vii wo yee ma é teve kɛɛ‐zu va.

¹⁹Gala ka yee zei nui maʋaa wu ani manui ɣa yii lɔɔzu daa‐nɔwɔ‐wogi ɣa é bosu kɛɛ‐zɔ gɛ lɛ su kí ge Gala ba.

²⁰Ani wa faa yowũ ɣɛɛ na tiɛ malowa wo ga wiɛ wa yii lɔ gá, zɛƃɛ ɣa a ɣɛ ga mawulo‐nu‐mai? Kɛ̀ ani wa faa ɣɛ na é pele ma wiɛ malaa‐nɔwɔ‐wo bo wo yii lɔ gá, Gala ka lo wo wulu.

²¹Nii ɣavele luoi ɣa wo liligɛi ma ga wo bo, ƃɔvɛlaale Kolai ƃalaa laa‐nɔwɔ woni wo ʋaa ma. Nii mavele ma é po‐kɔ̃ɔ zɛni wo ya ga wo vile kɔ́wɔ wogi zu.

²²“Ɛ́ lɛ faa yowũ ta nɛpɛ kɛɛni. Nu lɛ gaa‐wɔlɔ goo nɛpɛ pɛtɛni nɛ ma.”

²³Tei te dáa woo zu looni ga yowũa, ɛ́ lɛ te laa woo zu looni ga yowũa tɔ ƃalaa. Tei é ɣɛni laa nɔwɔ wosu, ɛ́ lɛ ƃaa zaɣani nu ma, kɛ̀ nui yá faa‐wo gaa leve ga tele‐bo, dái ɣɛ la.

²⁴Tɔ ɣagi é da ʋaa yowũi maɣaa‐wãlai ziɣini gului ma, kɛɛ ʋaa ma de wɛ̃ɛ ge leve faa yowũ‐ɣɛɛ va de ŋetea ɣɛ tele‐bo tuo zu. Ŋadai é zeini bá, nà mavele ma wo valoa.

²⁵Ƃɔvɛlaale wo ɣakagɛi ɣɛ è ɣɛ baalaga, kɛ̀ wo vaa sa wulu wo maazu‐vɛtɛ nui wɔ nii yá ƃaa wo yɛʋui maazu.