Read Loma 1 PITE 5 Bible Online

1 PITE 5 - Loma bible

1 PITE 5

¹Na ma è ɣɛ velei gè la ga Gala pɛlɛi malo‐tuoi ta gè ga Kolai na daa‐nɔwɔ‐wogi mazeelei ta pɔ̀ɔ laa wɔ ge wɔnɔ saala‐malai nii va maʋaa vaazu wulozu kɛnɛ ma, gà fai nii laazu Gala pɛlɛ wũ‐tuo veaitiɛ vɛ te wo zaama.

²A Gala na baala kpulugi nii maazu vɛtɛ wo logɛi maʋaa ƃawola. Ɛ́ lɛ ga wo kɛ wo ɣɛlɛ gbɛdɛɛ maazu. Kɛ̀ a wiɛ kɛ ga velei wo yii lai la máʋaa zu, è ɣɛ velei Gala ge wõini la ga wo kɛɛ la. Ɛ́ lɛ ga wo kɛ wũfe tala ŋɛni zɔlɔ‐wo faa ma. Kɛ̀ a wiɛ kɛ ga wo zɔƃɛlɛ‐ɣɛɛ vele máʋaa zu.

³Ɛ́ lɛ wɔnɔ ga wiɛ kɛ ga gaa‐ƃaa ɣɛɛ vele wo ya numai niitiɛ maazu wo logɛi te maʋaa ƃawola. Kɛ̀ to mu wa ɣɛ ga po‐kɔ̃ɔ te ʋaa ma. Ta ɣa te ga baala kpulugi.

⁴Tɔwɔ baala‐maazu‐vɛtɛ nu walai maʋai ɣa wulo na kɛnɛ ma, wa saala‐malai mamaa‐wuu masa bɔɔlɔgi zɔlɔ wo nii gaazu lɛ wɔlɔ‐wɔlɔ wuloa ba.

⁵Pele zii ɣilagi nɔ zu, wai wo ga nu niinɛitiɛ, a wolo niitiɛ vɛ te ga nuwutia. Wo ƃɔgɔpɛ a kolo‐wuloai ɣɛ ga seɣe wo maa ɣili la wiɛ wolo ɣiini bɛ, toku ge zei ga ponɛvɛ Gala kɔlɔi zu mawoi ga, “Gala ka wɔ ga kpɔɔ‐ʋaa‐wɔɔlɔ‐gaazu vea, kɛ̀ towaa maa‐wõi‐ɣaa ƃɔ‐ba wo ga kolo vea.”

⁶Na ma a ƃɔɔ ɣɛ ga kolo‐wulo vea Gala na gaa‐ƃaa yee wu, kɛɛ ʋaa ma kui ɣa lɛɛ na gá é wo wɔɔlɔ.

⁷A wa yii‐zɛlɛ fai ɣaazɔ wu Gala ma, ƃɔvɛlaale kpalavɛ wo ʋaa ma.

⁸A ɣɛ ga gaa‐lei vea wiɛ ƃɔɔ wũ maazu vɛtɛ. Wo wɔɔ yɔ̃wɔi dɛvele ɣa leve‐tevesu è ɣɛ zalai nii yá ɣɛ zukɛsu yíɛ nu ta ɣaa ziɛ ga é mi.

⁹A lo da kpãa, wo zu ƃaa zee‐la‐mai zu. A ɣi zɛ su ga wo vaitiɛ te zui wɔlɔ‐kɔlɔ ma ɣaali ta daa‐nɔwɔ‐wo sii ɣilagi nii wosu.

¹⁰Wa laa nɔwɔ wo na ga ta wolo nà wulo ba, kpɔ‐ba mazii ɣaazɔ‐wo Galagi ɣa wo loo zu é wo maʋaa ɣavele ƃɛtɛ é wo zu ƃaa é wo lo kpãa. É wo liliga ná saala‐malai ma kwɛ̃ɛ gɛ lɛ ba wo ɣɛɛ vele ma su ɣilekpu wa Kolaini.

¹¹Towa gaa‐ƃaa ɣa ɣɛ zéea wɔlɔ‐wɔlɔ ta wɔlɔ‐wɔlɔ. Na nɔ yá ɣɛ.

¹²Gè kɔlɔi nii wonɛni wo wɔ ga su ƃua a de wɔi Sevaanɔ zaala zu nii gè ɣi gaa ziɛzu ma ga tɔ ga nui nu ɣa laa la. Gè kɔlɔi nii wonɛni ga gè wo yii lɔ gìɛ seele woo ʋe ga kɔlɔi nii zu woi vilegɛ Gala na maa‐wõi‐ɣaa ƃɔ‐ba ƃɔɔƃɔɔgi va. A lo su kpãa.

¹³Gala pɛlɛ wu nu ƃulugi é Babelɔ̃ lai zu, é ga nu ƃɔgi nii Gala zee ƃakogɛi ba ƃalaa pɛ, te wo luoni. Vele nɔ na é la ga Maki nii gè siɣia ga luu.

¹⁴A wiɛ ɣiini tuo wiɛ kɛ ga wõila. Waitiɛ ɣaazɔ wo su ɣilekpu wa Kolaini, zii‐laa ɣa ɣɛ wo ya fãa.